IFINGAFWA INDUPWA
Ifyo Mwingacita pa Kuti Mulelanga Ukuti Mwalitemwana
Abaupana bamo balaya baleleka ukucita ifilanga ukuti balitemwa abena mwabo nga papita imyaka iingi ukutula apo baupanina. Nga ca kuti ifi e filecitika mu cupo cenu, bushe mulingile ukusakamana?
Ifyo mulingile ukwishiba
Ukulanga abena mwenu kuti mwalibatemwa kwalicindama sana mu cupo.
Nga filya fine ukulya ifya kulya no kunwa amenshi lyonse kwingalenga twaba no bumi ubusuma no kuba abakosa, e fyo no kulanga ukutemwa kwingalenga icupo cakosa. Nangu papite imyaka iingi ukutula apo abalume na bakashi baupanina, balingile ukulacita ifingalenga abena mwabo bamona ukuti balibatemwa kabili bali babikako amano.
Mu kutemwa kwa cine tamwaba ukulafwaya fye ifingatuwamina. Mu kutemwa mwaba ukucita ifingalenga umuntu umbi aba ne nsansa. Kanshi ukucila ukulalanga fye ukutemwa ilyo mulefwaya, umukashi nelyo umulume uwabika amano ku fikabila umwina mwakwe akalailuka ukuti umwina mwakwe alakabila ukumulanga ukutemwa kabili akalabikako amano ukucita ifyo fine.
Mu cifyalilwa fye, abakashi balakabila sana ukubalanga ukutemwa ukucila abalume. Abalume kuti batemwa sana abakashi babo. Nomba nga balelanga fye abena mwabo ukuti balibatemwa ulucelo no bushiku nelyo ilyo balefwaya ukupanga icupo, abena mwabo tabakashininkishe ukuti balibatemwa icine cine. Cilawama sana nga mulelanga ukuti mwalitemwa abena mwenu inshita yonse cila bushiku.
Ifyo mwingacita
Mulebeba ukuti mwalibatemwa. Ukweba abena mwenu amashiwi ayapala “nalikutemwa” nelyo “walicindama sana kuli ine” kuti yalenga baumfwa bwino.
Ishinte lye funde: “Pantu umuntu alanda ifyaisula mu mutima wakwe.”—Mateo 12:34.
Ifyo mwingacita: Mulingile ukweshako inshila ishalekanalekana isho mwingalangilamo ukutemwa. Kuti mwabalembela ka kalata, meseji ya pa kompyuta, nelyo meseji ya pa foni.
Mulecita ifilanga ukuti mwalibatemwa. Mulebakumbatilako, mulebatomona, nelyo fye ukubekatako amaboko pa kulanga ukuti tamubepa nga mwabeba ukuti mwalibatemwa. Kuti mwalanga ukuti mwalibika amano ku bena mwenu nga mulebekatako, mulebalolesha mu nshila iilelanga ukuti mwalibatemwa, nelyo nga mulebapeelako ubupe mu nshita mu nshita. Nalimo kuti muleyafwako abakashi benu imilimo pamo nga ukwimya ifyola, ukwisula iciibi, ukusuka imbale, ukuwasha, nelyo fye ukwipika. Abantu abengi balishiba ukuti ukucita ifi te kwafwa fye abena mwabo lelo ni nshila ya kulangilamo ukutemwa!
Ishinte lye funde: “Twitemwa fye ku mashiwi nangu ku lulimi, lelo tutemwane mu milimo na mu cine.”—1 Yohane 3:18.
Ifyo mwingacita: Mulelangulukilako abena mwenu nga filya fine mwalecita ilyo mwaleishishanya.
Mulekwatako inshita ya kuba pamo. Nga mulebako na bena mwenu babili fye, icupo cenu cikakosa kabili ninshi muleeba abena mwenu ukuti mulatemwa ukuba pamo nabo. Kwena nga mwalikwata abana kuti cayafya ukukwatako inshita ya kuba fye babili nelyo nga mwalikwata ifya kucita ifingi. Nalimo kuti mwapanga ukulacitila pamo utuntu utunono lyonse pamo nga ukulaendelako pamo.
Ishinte lye funde: “Mwishibe bwino bwino ifyacilapo ukucindama.”—Abena Filipi 1:10.
Ifyo mwingacita: Abaupana bamo abakwata sana ifya kucita balaya mu kulila pamo nga filya balecita ilyo baleishishanya, ubushiku bumo mu mulungu nelyo pa mpela ya mulungu.
Ishibeni abena mwenu. Inshila cila muntu alangilamo ukutemwa ilapusanapusana. Lanshanyeni pa nshila iyo cila muntu afwailamo ukumulanga ukutemwa no kumona nga kuti mwawamyako mu nshila mulangilamo ukutemwa. Lyena muleitemenwa ukucita ifyo abena mwenu bafwaya. Muleibukisha ukuti ukutemwa kwalicindama pa kuti icupo cikose.
Ishinte lye funde: “Mu kutemwa . . . tamwaba ukucita ifya kuisekesha, tamwaba ukukalifiwa.”—1 Abena Korinti 13:4, 5.
Ifyo mwingacita: Ukucila ukulaeba abena mwenu ukuti balemulanga ukutemwa, yipusheni amuti ‘Finshi ningile ukucitila abena mwandi pa kuti balenanga ukutemwa?’