Mulebeba Ukuti Mwalibatemwa

Ba Ong-li ni Nte ya kwa Yehova kabili bekala ku Bulgaria. Balesambilisha Baibolo umwanakashi uwe shina lya Zlatka, abena mwabo ba ba Zlatka tabalesambililako Baibolo. Ba Ong-li bashimike abati: “Ilyo twalesambilila pa lupwa, nakomaile pa mulandu cacindamina ukweba abena mwesu na bana ukuti twalibatemwa. Ba Zlatka bandoleshe bulanda bulanda; kabili banjebele ukuti tababala abebapo abena mwabo no mwana wabo umwanakashi uwa myaka 9 ukuti balibatemwa!”

Ba Zlatka batile, “Kuti nabacitila icili conse nomba ndafilwa ukubeba kuti nalibatemwa.” Kabili batile, “Bamayo tababalile abanjebapo ati balintemwa na bamama nabo tababalile abebapo bamayo ati balibatemwa.” Ba Ong-li balangile ba Zlatka mu Baibolo ukuti Yehova alyebele Yesu ukuti alimutemwa. (Mateo 3:17) Ba Ong-li bakoseleshe ba Zlatka ukulapepa kuli Yehova ukuti abafwe no kulabombesha ukweba abena mwabo no mwana ukuti balibatemwa.

Ba Ong-li batile: “Ilyo papitile inshiku shibili, ba Zlatka bali ne nsansa ilyo banjebele ukuti balilombele Yehova ukuti abafwe. Ilyo abena mwabo bafikile pa ng’anda, balibashimikile ifyo basambilile muli Baibolo ukuti calicindama umukashi ukucindika no kutemwa umwina mwakwe. Lyena pa numa ya ku kutumanako panono, baebele abena mwabo ukuti balibatemwa sana! Ilyo umwana wabo afumine ku sukulu, ba Zlatka balimukumbatile kabili bamwebele abati balimutemwa! Ba Zlatka banjebele abati: ‘Nomba ndeumfwa bwino. Pa myaka yonse iyi nshalelanda ifyo naleumfwa, nomba Yehova nangafwa, ndeeba ulupwa lwandi ukuti nalibatemwa.’

Ba Ong-li balandile no kuti: “Pa numa ya mulungu umo, nalikumenye abena mwabo ba ba Zlatka, banjebele abati: ‘Abantu abengi balenjeba ukuti ndeshe Zlatka ukusambilila Baibolo, nomba nshiletwishika no kutwishika ukuti ifyo alesambilila mu Baibolo filetwafwa mu lupwa. Nomba twalitemwana kabili twaliba ne nsansa sana mu cupo.’”