Futunoti
c Ili funde lyali ilisuma nga nshi, kabili ku calo Ruti afumine takwali ifunde lyaweme nga ili. Kale sana ku Middle East, bamukamfwilwa balebasunga ububi sana. Icitabo cimo catila: “Umulume nga afwa, abana e balesakamana nyinabo uwashala mukamfwilwa; nga takwata abana, nalimo mukamfwilwa aleishitisha mu busha, ukutendeka bucilende, nelyo ukuipaya.”
[Akabokoshi pe bula 26]
Ibuuku Ilinono Umwaba Amasambililo Ayacindama
Ibuuku lya kwa Ruti balilondolola ukuti libuuku ilinono, lelo ifyabamo fisuma sana. Ca cine ukuti ifyalembwa muli ili buuku finono sana nga kufilinganya ku fyaba mwi buuku lya Abapingushi ilyatangilila ibuuku lya kwa Ruti. Ibuuku lya Abapingushi lilatwafwa ukwishiba ilyo ifyalembwa mwi buuku lya kwa Ruti fyacitike. (Ruti 1:1) Aya mabuuku yabili yalembelwe na kasesema Samwele. Nga mwabelenga Baibolo, kuti mwasumina ukuti apabela ibuuku lya kwa Ruti, palilinga sana. Pa numa fye ya kubelenga pa fya nkondo ifyalembwa mwi buuku lya Abapingushi, pakonka ili buuku ilinono ilya kwa Ruti ilitulanga ukuti Yehova talaba ku bantu bakwe abashomboka na mafya cila bushiku. Ilyashi lyalembwa mwi buuku lya kwa Ruti ililanda pa fyacitikile ulupwa lumo, lilatusambilisha amasambililo ayacindama pa kutemwa, pa citetekelo, pa kuba ne cishinka, na pa fyo ciba nga twafwilwa.