Yeremia
25 Aya e mashiwi ayo Lesa aebele Yeremia pa bantu bonse abekala mu Yuda, mu mwaka walenga 4 ukutula apo Yehoyakimu+ umwana wa kwa Yoshia imfumu ya baYuda atendekeele ukuteka, e kutila mu mwaka wa kubalilapo uwa kuteka kwa kwa Nebukadnesari* imfumu ya Babiloni. 2 Kasesema Yeremia alandile pa bantu bonse abekala mu Yuda na bonse abekala mu Yerusalemu ati:
3 “Ukufuma mu mwaka walenga 13 ukutula apo Yoshia+ umwana wa kwa Amone, imfumu ya baYuda atendekeele ukuteka ukufika na lelo, muli iyi myaka 23, Yehova alelanda na ine kabili lyonse nalemweba ifyo alenjeba,* lelo tamwaleumfwa.+ 4 Kabili lyonse Yehova alemutumina* ababomfi bakwe bonse bakasesema, lelo tamwaleumfwa nelyo ukubikako amano.*+ 5 Balelanda abati, ‘Umuntu onse afume mu nshila yakwe iyabipa kabili aleke ukucita ifyabipa;+ nga mwacita ifi mukatwalilila ukwikala mu calo ico Yehova amupeele, kabili ico apeele ifikolwe fyenu ukufuma kale. 6 Mwilakonka tulesa tumbi, mwilatubombela kabili mwilatukontamina, pa kuti mwilankalifya ne milimo ya minwe yenu. Nga tamucitile ifi nkamuletela ubucushi.’
7 “‘Lelo tamwaumfwile ifyo nalemweba,’ e fyo Yehova alanda, ‘mwalinkalifye ne milimo ya minwe yenu kabili mwaileteele ubucushi.’+
8 “E ico Yehova wa mabumba alanda ati, ‘“Pa mulandu wa kuti tamwang’umfwilile, 9 ndeita indupwa shonse isha ku kapinda ka ku kuso,”+ e fyo Yehova alanda, “ndeita imfumu Nebukadnesari* iya ku Babiloni, umubomfi wandi,+ kabili nkalenga bakalwishe ici calo na bekalamo+ ne nko shonse isha bashinguluka.+ Nkonaula icalo na bantu, kabili nkalenga fikabe ica kutiinya, ica kulishisha umunsoli, kabili fikonaulwa umuyayaya. 10 Nkatalalika ishiwi lya kusekelela ne shiwi lya kusansamuka mu kati kabo,+ ishiwi lya kwa shibwinga ne shiwi lya kwa nabwinga,+ ne congo ce libwe lya kupelelako, kabili nkashimya ulubuuto lwa nyali. 11 Kabili ici calo conse bakaconaula, kabili cikaba ica kutiinya, ne shi inko shikabombela imfumu ya ku Babiloni pa myaka 70.”’+
12 “‘Lelo ilyo imyaka 70 ikapwa,+ nkalubulwisha* imfumu ya ku Babiloni na lulya uluko pa membu shabo,’+ e fyo Yehova alanda, ‘kabili nkalenga icalo ca bena Kaldi cikabe icibolya umuyayaya.+ 13 Nkaleta fyonse ifyo nalanda pali ici calo, fyonse ifyalembwa muli ili ibuuku lya kwa Yeremia ifyo asesemene inko shonse. 14 Pantu inko ishingi ne mfumu ishikalamba+ shikalenga bakabe abasha,+ kabili nkashikanda ukulingana ne fyo shicita e lyo ne milimo ya minwe ya shiko.’”+
15 Pantu Yehova Lesa wa kwa Israele anjebele ati: “Poka iyi kapu ya mwangashi iya bukali bwandi iili mu minwe yandi, kabili unweshe inko shonse isho ndekutumako. 16 Kabili bakanwa no kutalantanta, bakalacita nga bantu abapena pa mulandu wa lupanga ulo ndebatumina.”+
17 E ico nalipokele kapu ku minwe ya kwa Yehova kabili nalinweseshe inko shonse isho Yehova antumineko:+ 18 natampilepo ukunwesha Yerusalemu ne misumba ya mu Yuda,+ imfumu sha iko ne ntungulushi sha iko pa kuti nenge icalo na bantu fyonaulwe, fibe ica kupapa, ica kulishisha umunsoli kabili icitiipu,+ nge fi fine cili buno bushiku; 19 lyena Farao imfumu ya ku Egupti na babomfi bakwe ne ntungulushi shakwe na bantu bakwe bonse;+ 20 na bantu bonse abalekanalekana, imfumu shonse isha mu calo ca Usi, imfumu shonse isha mu calo baPelishiti,+ Ashkelone,+ Gasa, Ekrone na bashalapo mu Ashidode; 21 mu Edomu,+ mu Moabu+ e lyo na bena Amone;+ 22 imfumu shonse isha ku Turi, imfumu shonse isha ku Sidone+ ne mfumu sha pa cishi icaba pali bemba; 23 Dedani,+ Tema, Busi na bonse ababeya umushishi mu nsensematwi;+ 24 imfumu shonse isha bena Arabia+ ne mfumu shonse isha bantu abalekanalekana abekala mu matololo; 25 imfumu shonse isha ku Simri, imfumu shonse isha ku Elamu+ ne mfumu shonse isha bena Madai;+ 26 ne mfumu shonse isha ku kapinda ka ku kuso ishaba mupepi ne shaba ukutali, imo na imo, na mabufumu yambi yonse ayaba pe sonde; ne mfumu Sheshaki*+ e ikalekeleshako ukunwa.
27 “Kabili ufwile ukubeba auti, ‘Yehova wa mabumba, Lesa wa kwa Israele alanda ati: “Nweni mukolwe, muluke kabili muwe ica kuti mufilwe no kwima+ pa mulandu wa lupanga ulo ndemutumina.”’ 28 Kabili nga bakaana ukupoka kapu mu minwe yobe pa kuti banwe, ukabebe auti, ‘Yehova wa mabumba alanda ati: “Mufwile fye ukunwa. 29 Pantu moneni! Nga ca kuti ndebalilapo ukuleta ubucushi pa musumba uwainikwa ishina lyandi,+ bushe kuti nafilwa ukumukanda?”’+
“‘Nshakaleke fye ukwabula ukumukanda, pantu ndeita ulupanga ukuti lwise pali bonse abaikala pe sonde,’ e fyo Yehova wa mabumba alanda.
30 “Kabili ufwile ukubasesemena aya mashiwi yonse no kubeba ati,
‘Yehova akabuluma ukufuma ku cifulo cakwe icasansuka,
Akalenga ishiwi lyakwe likomfwike ukufuma mu cifulo ca mushilo umo ekala.
Akabulumina nga nshi icifulo cakwe ico ekalamo.
Akasansula ishiwi nga bantu abalenyantaula mu ca kukaminamo imyangashi,
Akembila abekala pano isonde ninshi nasekelela pantu akacimfya.’
31 ‘Icongo ca nkondo cikomfwika ku mpela sha pano isonde,
Pantu Yehova ali no mulandu wa kushinina inko.
Kabili akalenga abacita ifyabipa bakabepaye ku lupanga,’ e fyo Yehova alanda.
32 Yehova wa mabumba alanda ati:
‘Moneni! Ubucushi bulefuma ku luko lumo no kuya ku luko lumbi,+
Kabili nkaleka umwela uukalamba ukafume ku ncende ishabela ukutali sana pano isonde.+
33 Kabili muli bulya bushiku abo Yehova akepaya, bakaba fye konse pano isonde, ukufuma ku mpela imo iye sonde ukuyafika ku mpela imbi iye sonde. Tabakabalooshe, nelyo ukubalonganika nangu ukubashiika. Bakaba umufundo pa muulu wa mushili.”
34 “Loosheni mwe bakacema kabili pundeni!
Alanganeni mu lukungu mwe mpaanga ishacindama isha pa mukuni,
Pantu inshita yenu iya kumwipaya ne ya kumusalanganya naifika,
Kabili mukawa nge cipe ica mutengo!
35 Bakacema tabakwete ukwa kubutukila,
Kabili takuli ukwa kupusukila impaanga ishacindama pa mukuni.
36 Umfweni imisowa ya bakacema
No kulila kwa mpaanga ishacindama pa mukuni,
Pantu Yehova aleonaula umulemfwe wabo.
37 Kabili nabalenga mu fifulo fya mutende ifya kwikalamo mwilaikala ica mweo nangu cimo
Pa mulandu wa bukali bwa kwa Yehova ububilima ngo mulilo.