Yeremia

52 Sidekia+ ali ne myaka 21 ilyo aishileba imfumu, kabili atekele imyaka 11 mu Yerusalemu. Nyina ali ni Hamutali+ umwana wa kwa Yeremia uwa ku Libna. 2 Sidekia alecita ifyabipa mu menso ya kwa Yehova, nga filya fine Yehoyakimu alecita.+ 3 Icalengele fyonse ifi ficitikile aba mu Yerusalemu na mu Yuda ni co Yehova alibafulilwe, mpaka abafumya pa cinso cakwe.+ Kabili Sidekia alipondokele imfumu ya ku Babiloni.+ 4 Mu mwaka walenga 9 ukutula apo Sidekia atendekeele ukuteka, mu mweshi walenga 10, pa bushiku bwalenga 10 ubwa uyu mweshi, Nebukadnesari* Imfumu ya ku Babiloni aishile pamo na bashilika bakwe bonse mu kulwisha umusumba wa Yerusalemu. Balipangile inkambi pa kuti balwishe uyu musumba kabili balikuulile ne cibumba ukushinguluka umusumba onse.+ 5 Kabili bashingile umusumba mpaka na mu mwaka walenga 11 ukutula apo Imfumu Sidekia yatendekeele ukuteka.

6 Mu mweshi walenga 4, pa bushiku bwalenga 9 muli uyu mweshi,+ icipowe calicililemo mu musumba, kabili abantu tabakwete ifya kulya.+ 7 Basukile batoba icibumba ca musumba, kabili abashilika bonse balifulumwike mu musumba ubushiku. Bapitile pa mpongolo iyali pa kati ka fibumba fibili mupepi ne bala lya mfumu, ninshi abena Kaldi nabashinguluka umusumba; kabili bapitile mu nshila yalola ku Araba.+ 8 Lelo abashilika abena Kaldi balikonkele imfumu, kabili basangile Sidekia+ mu ciswebebe ca mu Yeriko. Ilyo bamusangile abashilika bakwe bonse balibutwike. 9 Lyena abashilika abena Kaldi balikete imfumu, baitwala na ku mfumu ya Babiloni ku Ribla mu calo ca Hamati, kabili bali-ipingwile. 10 Kabili imfumu ya ku Babiloni yaipeye abana ba kwa Sidekia ninshi alemonako, yaipeye ne ntungulushi shonse isha mu Yuda mu Ribla. 11 Lyena imfumu ya ku Babiloni yatonkwele Sidekia amenso,+ yamukaka amaceni ya mukuba, e lyo yamusenda ku Babiloni. Kabili yamubikile mu cifungo mpaka no bushiku afwile.

12 Mu mweshi walenga 5, pa bushiku bwalenga 10 ubwa uyu mweshi, e kutila mu mwaka walenga 19 ukutula apo Nebukadnesari* imfumu ya Babiloni yatendekeele ukuteka, e mo Nebusaradani umukalamba wa balelonda, uwali umubomfi wa mfumu ya Babiloni, aishile ku Yerusalemu.+ 13 Aocele ing’anda ya kwa Yehova,+ ing’anda ya mfumu* na mayanda yonse mu Yerusalemu. Aocele na mayanda yonse ayakalamba. 14 Kabili abashilika bonse abena Kaldi abali no mukalamba wa balelonda babongolwele ilinga lya Yerusalemu lyonse.+

15 Nebusaradani umukalamba wa balelonda asendele abapiina bamo na bantu bonse abashele mu musumba pa kuti bayeba bankole. Asendele na bailundile ku mfumu ya Babiloni na baishibe sana ifya kupangapanga.+ 16 Lelo Nebusaradani umukalamba wa balelonda alishiileko bamo abali abapiina sana pa kuti balelima imyangashi kabili balebomba mu mabala.+

17 Kabili abena Kaldi baliputawile inceshi sha mukuba+ ishali ku ng’anda ya kwa Yehova, baliputawile ne fya kusendelapo amenshi+ ne Cishiba ca mukuba+ ifyali mu ng’anda ya kwa Yehova, kabili umukuba onse uwali ku fyo baputawile baliusendele ku Babiloni.+ 18 Basendele ne fya kukushilapo imito, amafosholo, utwa kushimishako inyali, imbale shafonka,+ amakapu+ ne fipe fyonse ifya mukuba ifyo balebomfya mwi tempele. 19 Umukalamba wa balelonda asendele ifya kubikamo amenshi,+ ififutumwino, imbale shafonka, ifya kukushilapo imito, apa kuteka inyali,+ amakapu ne mbale shafonka ifyo bapangiile na golde iisuma ne fyo bapangiile na silfere iisuma.+ 20 Umukuba uo Imfumu Solomone yapangiile inceshi shibili, Icishiba, ing’ombe 12 isha mukuba+ apaikele Icishiba, ne fya kusendelapo amenshi ifya pa ng’anda ya kwa Yehova, walifulile ica kuti balifililwe uku-upima.

21 Cila luceshi lwalepele imikono* 18, kabili intambo iyalepele imikono 12, e yalekumana ukushingulusha uluceshi lumo;+ lwatikeme iminwe* 4, kabili lwalikwete icipunda mu kati. 22 Pa muulu wa luceshi abikilepo icali ngo mutondo ico bapangiile no mukuba, kabili calepele imikono 5;+ kabili utwa kuyemfeshako ne fyali nge fisabo fya mapomegranate ifyashingulwike ici icali ngo mutondo, fyonse bafipangiile no mukuba; pa muulu wa luceshi ulwalenga bubili napo balibikilepo icali ngo mutondo, na co calikwete ifyali nge fisabo fya mapomegranate. 23 Ku cali ngo mutondo kwalemoneka ifya kuyemfeshako ifyali nge fisabo fya mapomegranate 96, lelo fyonse pamo ukushinguluka icali ngo mutondo ifya kuyemfeshako ifyali nge fisabo fya mapomegranate fyali 100.+

24 Umukalamba wa balelonda asendele na Seraya+ shimapepo mukalamba, Sefania+ uwali inkonkani ya kwa shimapepo mukalamba na balelonda pa mwinshi batatu.+ 25 Kabili mu musumba asendelemo intungulushi ya kwi sano imo iyaleangalila abashilika, abaume 7 abali ifibusa fya mfumu abo asangile mu musumba na kalemba wa mukalamba wa bashilika uwalelonganika abengaba abashilika mu calo. Asendele na baume 60 pa bantu yaweyawe abo asangile mu musumba. 26 Nebusaradani umukalamba wa balelonda alibasendele, abatwala na ku Ribla ukwali imfumu ya ku Babiloni. 27 Imfumu ya ku Babiloni yalibepeye mu Ribla,+ mu citungu ca Hamati. E fyo abaYuda babafumishe mu calo cabo, babasenda pa kuti bayeba bankole.+

28 Aba e bantu abo Nebukadnesari* asendele pa kuti bayeba bankole: mu mwaka walenga 7, asendele abaYuda 3,023.+

29 Mu mwaka walenga 18 ukutula apo Nebukadnesari*+ atendekeele ukuteka, abantu* 832 e bo basendele ukufuma mu Yerusalemu.

30 Mu mwaka walenga 23 ukutula apo Nebukadnesari* atendekeele ukuteka, Nebusaradani umukalamba wa balelonda alisendele abaYuda pa kuti bayeba bankole. Asendele abantu* 745.+

Abantu* bonse abo basendele pa kuti bayeba bankole bali 4,600.

31 Lyena mu mwaka walenga 37 ukutula apo basendeele Yehoyakini+ imfumu ya mu Yuda pa kuti ayeba nkole, mu mweshi walenga 12, pa bushiku bwalenga 25 ubwa uyu mweshi, mu mwaka Ebili-merodaki uwa ku Babiloni aishileba imfumu, e mo afumishe* Yehoyakini imfumu ya mu Yuda mu cifungo.+ 32 Ali ne cikuuku kuli ena kabili acindamike icipuna cakwe ica bufumu ukucila ifipuna fya bufumu ifya mfumu shimbi isho ali na sho mu Babiloni. 33 E ico Yehoyakini afuulile ifya kufwala fyakwe ifya mu cifungo, kabili lyonse alelya ne mfumu mpaka ilyo afwile. 34 Cila bushiku imfumu ya mu Babiloni yalemupeela ifya kulya ifyo alelya inshiku shonse isho ali no mweo, mpaka afwa.