Cinshi Twabela pano Calo?

Icasuko ca mu Baibolo

Baibolo ilanga ukuti ico twabela pano calo kuba ifibusa fya kwa Lesa. Moneni amashiwi yamo ayacindama ayaba muli Baibolo.

• Lesa ni Kabumba wesu. Baibolo itila: “[Ni Lesa] e watupangile, tatwaipangile fye iyo.”—Amalumbo 100:3; Ukusokolola 4:11.

• Kwaliba umulandu Lesa apangiile ifintu fyonse, ukubikako na ifwe bene.—Esaya 45:18.

• Lesa atupangile ukuti ‘tulekabila ifya kwa Lesa,’ ici cisanshamo no kwishiba umulandu twabela pano calo. (Mateo 5:3) Afwaya ukuti twishibe ifya kwa Lesa.—Amalumbo 145:16.

• Kuti twaishiba ifya kwa Lesa nga ca kuti twaba ifibusa fyakwe. Bamo kuti bamona kwati umuntu te kuti abe cibusa wa kwa Lesa, lelo Baibolo itukoselesha ukuti: “Palameni kuli Lesa, na o akapalama kuli imwe.”—Yakobo 4:8; 2:23.

• Nga tulefwaya ukuba ifibusa fya kwa Lesa, tufwile ukulacita ifyo afwaya ukuti tulecita. Baibolo yalilanda ifyo afwaya tulecita pali Lukala Milandu 12:13, apatila: “Tiina Lesa wa cine no kusunga amafunde yakwe. Pantu ici e cifwaikwa ku bantu bonse.”

• Ku ntanshi, ilyo Lesa akafumyapo ukucula konse pano calo no kupeela umweo wa muyayaya ku fibusa fyakwe, abamupepa, e lyo tukalaikala ukulingana ne fyo Lesa afwaile ukuti tuleikala.—Amalumbo 37:10, 11.