Baibolo Ilaalula Abantu

CALI shani pa kuti umukashana uwaculile nga nshi ku bwaice asange insansa? Cinshi calengele umwaume cintomfwa uwapondokele ubuteko ukutendeka ukulashimikila imbila nsuma? Belengeni aya malyashi pa kuti mwishibe ifyo cali.

“Nalefwaisha Ukusanga Abantu Abengantemwa Kabili aba Cikuuku.”—INNA LEZHNINA

UMWAKA BAFYELWE: 1981

ICALO: RUSSIA

IFYO BALI: BALICULILE NGA NSHI KU BWAICE

INKULILO YANDI: Abafyashi bandi bali ni bankomamatwi, na ine nafyelwe nkomamatwi. Ukufuma ilyo nafyelwe ukwisafika lintu nali ne myaka 6, ifintu fyali fye bwino. Lyena abafyashi bandi balilekene. Nangu ca kutila nali umwaice, nalishibe ububi bwaba mu kulekana, kabili calenkalipa sana. Ilyo abafyashi bandi balekene, batata no mukalamba wandi umwaume bashele mu musumba wa Troitsk, e lyo ine na bamayo twakuukile ku Chelyabinsk. Mu kuya kwa nshita, bamayo balyupilwe na kabili. Batata abaupile bamayo bali ni bacakolwa, kabili ilingi balepuma bamayo kumo na ine wine.

Mu 1993, ndume yandi uo natemenwe sana alinwenene. Imfwa yakwe yalituputwile umusana. Pa kufwaya ukulabako ku mfwa ya kwa ndume yandi, bamayo batendeke ukunwa sana ubwalwa, kabili nabo batampile ukulancusha. Natendeke ukufwaya uko ningalaikalako bwino. Nalefwaisha ukusanga abantu abengantemwa kabili aba cikuuku. Natampile ukuya ku macalici ayalekanalekana pa kuti ningasanga icisansamushi, lelo nshacisangile.

IFYO BAIBOLO YA-ALWILE UBUMI BWANDI: Ilyo nali ne myaka 13, umunandi uo twalesambilila nankwe ku sukulu, uwali ni Nte ya kwa Yehova, alinshimikileko amalyashi yamo aya mu Baibolo. Nalitemenwe nga nshi ukusambilila pa bantu abalembwa mu Baibolo pamo nga Noa na Yobo, ababombeele Lesa te mulandu ne fyo balecula. Tapakokwele, nalitendeke ukusambilila Baibolo ne Nte sha kwa Yehova e lyo no kulongana.

Ukusambilila Baibolo kwalengele ukuti njishibe ifintu ifingi ifisuma. Nalitemenwe sana ukwishiba ukuti Lesa alikwata ishina. (Amalumbo 83:18) Nalitemenwe ukumona ifyo Baibolo yasobele bwino bwino ifikalacitika mu “nshiku sha kulekelesha.” (2 Timote 3:1-5) Kabili nalisansamwike nga nshi ukwishiba ukuti abafwa bakabuuka. Ala nalyumfwile bwino ukwishiba ukuti tukamonana na ndume yandi na kabili!—Yohane 5:28, 29.

Lelo te bonse abatemenwe ifyo nalesambilila. Bamayo na batata balipatile Inte sha kwa Yehova. Balyeseshe ukumpatikisha ukuti ndeke ukulasambilila Baibolo. Lelo nalitemenwe sana ifyo nalesambilila kabili nalikeene ukuleka ukusambilila.

Tacayangwike ukushipikisha filya balupwa balenkanya. Ubwafya bumbi ubwamponene bwa kuti umwaice wandi, uo naleya nankwe ku kulongana kwa Nte sha kwa Yehova, na o alinwenene. Lelo ba Nte lyonse balenkoselesha. Inte sha kwa Yehova e bantu abo nasangile ukuti e baba no kutemwa ne cikuuku abo nalefwaisha ukutula fye ku bwaice. Nalishibe ukuti e bali Abena Kristu ba cine. Mu 1996, nalibatishiwe no kuba Inte ya kwa Yehova.

IFYO NANONKELAMO: Napapita imyaka 6 ukutula apo naupilwa kuli ba Dmitry, ababa bwino sana. Tubombela pa maofeshi ya Nte sha kwa Yehova aya ku St. Petersburg. Mu kuya kwa nshita, abafyashi bandi balinashisheko ukunkaanya ifyo nasuminamo.

Ndatasha sana ifi naishiba Yehova! Ukubombela Yehova kwalinenga ukuba ne nsansa nga nshi.

“Nalikwete Amepusho Ayengi Ayalencusha.”—RAUDEL RODRÍGUEZ RODRÍGUEZ

UMWAKA BAFYELWE: 1959

ICALO: CUBA

IFYO BALI: BALI NI BACINTOMFWA ABAPONDOKELE UBUTEKO

INKULILO YANDI: Nafyalilwe mu musumba wa Havana, mu calo ca Cuba, kabili nakuliile mu ncende umwali abantu abapiina kabili umo ulukaakala lwaseekele. Ilyo nalekula, natendeke ukutemwa icangalo ca judo (icangalo ca kufuntulana) e lyo ne fyangalo fimbi ifya lubuli.

Nalikwete amano ku sukulu kabili abafyashi bandi bankoseleshe ukuya ku yuniversiti. Ilyo nali ku yuniversiti, natendeke ukutontonkanya ukuti imitekele mu calo cesu ifwile ukwaluka. E ico napingwilepo ukupondokela ubuteko. Ine no munandi nalesambilila nankwe twalisanshile kapokola, twalefwaya ukumupoka imfuti. Twalimuumine ica kuti twalimucenene sana ku mutwe. Balitupoosele mu cifungo pali uyu mulandu kabili batupingwile ukwipaiwa kwa kutupika imfuti. Pali iyi nshita nali fye ne myaka 20, lelo bampingwile ukufwa!

Ilyo nali mu cifungo neka, naletontonkanya ifyo nkacita pa ntanshi ya bashilika abali no kumpika imfuti. Nshalefwaya ukulamoneka kwati naletiina ukufwa. Na lyo line, nalikwete amepusho ayengi ayalencusha. Naletontonkanya nati: ‘Mulandu nshi muno calo mwabela ulufyengo ifi? Bushe fwe bantunse tukatwalilila fye ukulacula ifi fine?’

IFYO BAIBOLO YA-ALWILE UBUMI BWANDI: Mu kuya kwa nshita, baishilepingula ukuti tabakatwipaye, lelo tukekala mu cifungo imyaka 30. Pali iyi nshita e lyo naishibene na ba Nte abo bakakile pa mulandu wa fyo basuminemo. Nalitemenwe ifyo ba Nte bali abashipa kabili aba mutende. Nangu ca kutila babafyengele fye pa kubapoosa mu cifungo, tabakalipe.

Ba Nte bansambilishe ukuti Lesa afwaya abantu bakekale umuyayaya. Banangile muli Baibolo ukuti Lesa akalenga lino isonde ukuba paradaise umushakabe bumpulamafunde nelyo ulufyengo. Bansambilishe no kuti isonde likesulamo abantu abasuma, abakakwata ishuko lya kwikala umuyayaya.—Amalumbo 37:29.

Naleumfwa bwino sana ifyo ba Nte balensambilisha, nomba ifyo nalecita fyalipusene sana ne fyo ba Nte bali. Nalemona kwati te kuti ndeke ukuitumpa mu fikansa fya mitekele ya calo nelyo ukuleka ukubwesesha ububi pa bubi. E co napingwilepo ukulaibelengela Baibolo ne mwine. Ilyo napwishishe ukubelenga Baibolo, nalimwene ukuti ni ba Nte fye e baba nga Bena Kristu ba kubalilapo.

Ukulingana ne fyo nalesambilila mu Baibolo, nalimwene ukuti nalekabila ukwaluka sana mu bumi bwandi. Ku ca kumwenako, nalekabila ukwalula imilandile yandi pantu naletukana sana insele. Nalingile no kuleka ukupeepa. Nalekabila no kuleka ukuitumpa mu fikansa fya mitekele ya calo. Tacayangwike ukuleka fyonse ifi, lelo Yehova alingafwile, kabili panono panono nasukile naleka.

Cimo icankosele sana, kuleka ukufulwa bwangu. Ncili ndapepa ukuti ndeilama pa kuti nilafulwa bwangu. Amalembo pamo nga Amapinda 16:32 yalingafwa sana. Ili lembo litila: “Uukokola ukukalipa awama ukucila impalume, no ulama ubukali bwakwe awama ukucila uwapoka umusumba.”

Mu 1991, nalibatishiwe no kuba Inte ya kwa Yehova. Nabatishiwe mwi dalamu lyali mu cifungo. Umwaka wakonkelepo, fwe bafungwa bamo balitufumishe mu cifungo no kututuma ku Spain. Ilyo fye nafikile mu Spain, nshaikete na ku cani, naile mu kulongana kwa Nte sha kwa Yehova. Ba Nte balimpokelele bwino sana kwati nalimo kale twaishibene, kabili balingafwile ukusanga imikalile na kabili.

IFYO NANONKELAMO: Naliba ne nsansa nga nshi, kabili ndabombela Lesa pamo no mukashi wandi na bana besu abakashana babili. Nalikwata ishuko lya kupoosa inshita yandi iikalamba ukusambilisha abantu ifya mu Baibolo. Limo ndatontonkanya pa fyo nali no kufwa bwaice bwaice, kabili nalitemwa nga nshi ukuti nalisanga ifisuma ifingi sana. Ncili umumi, kabili nalikwata ne subilo. Ndafwaisha ukwisaba mu Paradaise, ilyo mwi sonde mukaba umulinganya kabili ilyo ‘imfwa ishakabeko na kabili.’—Ukusokolola 21:3, 4.

[Amashiwi pe bula 19]

“Nalitemenwe sana ukwishiba ukuti Lesa alikwata ishina”

[Icikope pe bula 20]

Ine na bena mwandi tulaipakisha ukutambisha abantu impapulo ishaba mu lulimi lwa bankomamatwi