Ifyo Yehova Alenga Twashininkisha Ukuti Paradaise Ikesa

1. Finshi kasesema Esaya alefwaya Abena Israele ukwishiba?

KASESEMA Esaya alandile ukuti Yehova ni “Lesa wa cishinka.” Ishiwi bapilibula ukuti “icishinka” lipilibula no kuti “ameni.” (Esa. 65:16) Ishiwi “Ameni” lipilibula ukuti “nacibe ifyo fine,” ne lyo “cine cine.” Mu Baibo nga babomfya ishiwi lya kuti “ameni” ilyo balelanda pali Yehova ne lyo Yesu, ninshi balelangilila ukuti ifyo balelandapo fya cine cine. Kanshi Esaya alefwaya Abena Israele beshibe ukuti fyonse ifyo Yehova alaya, kuti twaficetekela. Yehova alilanga ukuti kuti twamucetekela pantu lyonse alafikilisha fyonse ifyo alaya.

2. Cinshi cingalenga twacetekela ifyo Lesa atulaya ukutucitila ku ntanshi, kabili mepusho nshi twalalandapo?

² Bushe kuti twacetekela ukuti ifyo Yehova atulaya fikafikilishiwa? Ilyo papitile imyaka mupepi na 800 ukutula apo Esaya afwilile, umutumwa Paulo alilandile umulandu twingacetekela ifyo Lesa atulaya. Atile, Lesa te kuti abepe. (Heb. 6:18) Nga filya fine umumana ushingakwata amenshi ayatalala e lyo na menshi aya mucele, Yehova Intulo ya cine te kuti abepe ubufi. Kanshi kuti twacetekela fyonse ifyo Yehova alanda ukubikako fye ne fyo atulaya ifikacitika ku ntanshi. Muli cino cipande twalalanshanya aya amepusho yabili: Finshi Yehova atulaya ukutucitila ku ntanshi? Kabili finshi alanda ifyalenga tushininkishe ukuti ifyo atulaya fikafikilishiwa?

FINSHI YEHOVA ATULAYA?

3. (a) Bulayo nshi ubo ababomfi ba kwa Lesa abengi batemwa? (Ukusokolola 21:​3, 4) (b) Bushe abantu bamo balanda shani nga twababelengela ubu ubulayo?

³ Ababomfi ba kwa Lesa mwi sonde lyonse balitemwa ubulayo twalalandapo. (Belengeni Ukusokolola 21:​3, 4.) Yehova alilaya ukuti inshita ileisa ilyo “imfwa tayakabeko na kabili takwakabe no kuloosha nangu ukuteta nangu ukukalipwa na kabili.” Fwe bengi twalitemwa ukubomfya ili lembo ililanda pa fyo mu Paradaise mukaba ilyo tulebila imbila nsuma. Bushe abantu bamo balanda shani nga twababelengela ubu ubulayo? Batila: “Ifi fyawamisha te kuti ficitike.”

4. (a) Ilyo Yehova alandile pa fyo atulaile, finshi aishibe ukuti e fili no kucitika ku ntanshi? (b) Finshi fimbi Yehova acitile?

⁴ Ilyo Yehova aebele Yohane ukulemba ubu ubulayo, ubwalelanda pali Paradaise alishibe ukuti na ifwe tukalaebako abantu ilyo tulebila pa Bufumu. Yehova na kabili alishibe ukuti abantu abengi bakulafilwa ukusumina ifi alaya. (Esa. 42:9; 60:2; 2 Kor. 4:​3, 4) Kuti twalenga shani abantu bashininkisha ukuti ifyo Lesa atulaya ifyaba pa Ukusokolola 21:​3, 4 fikafikilishiwa? Kabili finshi twingacita na ifwe pa kuti tucetekele Yehova e lyo ne fyo atulaya? Yehova tatwebele fye aya amalayo ayasuma, lelo alitweba no mulandu twingacetekela ukuti ifyo atulaya fikacitika. Finshi atwebele ifyalenga tucetekele?

YEHOVA ALITWEBA IFYALENGA TUCETEKELE IFYO ATULAYA

5. Fikomo nshi ifilenga twacetekela ifyo Lesa atulaya, kabili finshi ifi fikomo fyalanda?

⁵ Kwaliba imilandu iilenga twacetekela ifyo Yehova atulaya pali Paradaise iyo tubelenga mu fikomo fyakonkapo. Tubelenga ukuti: “Uwaikala pa cipuna ca bufumu atile: ‘Moneni! Ndelenga ifintu fyonse ukuba ifipya.’ Kabili, atile: ‘Lemba, pantu aya mashiwi ya cishinka kabili ya cine.’ Kabili anjebele ati: ‘Fyonse nafifikilishiwa! Nine Alifa kabili Omega, nine intendekelo kabili impela.’”—Ukus. 21:​5, 6a.

6. Mulandu nshi amashiwi ayaba pa Ukusokolola 21:​5, 6 yalengela twacetekela ifyo Lesa atulaya?

⁶ Mulandu nshi aya amashiwi yalengela twacetekela sana ifyo Lesa atulaya? Icitabo ca Akalume ka Ukusokolola cilanda pa mashiwi ayaba muli ifi fikomo ukuti: “Cili kwati Yehova umwine wine alesaininako umutundu wa muntu uwa citetekelo ukwebekesha, nelyo icipepala ca nsambu, kuli ayo mapaalo ya nshita ya ku ntanshi.”b Ifyo Lesa atulaya fyaba pa Ukusokolola 21:​3, 4. Lyena mu cikomo 5 na 6, caba kwati Yehova alisainapo pa kuti alenge tushininkishe ukuti ifyo atulaya fikafikilishiwa. Lekeni tulande pa mashiwi Yehova abomfya pa kuti alenge tucetekele ifyo atulaya.

7. Nani uwalanda amashiwi ayaba mu Ukusokolola 21:5 kabili mulandu aya amashiwi yacindamina?

⁷ Icikomo 5 catendeka na mashiwi ya kuti: “Uwaikala pa cipuna ca bufumu atile.” (Ukus. 21:5a) Aya amashiwi yalicindama sana pantu yaba pa mashiwi yatatu ayo Yehova umwine ailandile mwi buuku lya Ukusokolola. Yehova tabomfeshe malaika uwa maka ne lyo Yesu pa kulanda aya amashiwi, lelo mwine wailandiile! Ici cilalenga twacetekela sana amashiwi yakonkapo. Mulandu nshi tuyacetekelela? Pantu Yehova “tabepa.” (Tito 1:2) Kanshi amashiwi ayo tubelenga pa Ukusokolola 21:​5, 6 yakafikilishiwa.

“MONENI! NDELENGA IFINTU FYONSE UKUBA IFIPYA”

8. Finshi Yehova alanda pa kuti tucetekele sana ukuti ifyo atulaya fikafikilishiwa? (Esaya 46:10)

⁸ Lekeni nomba tulande pe shiwi lya kuti “Moneni!” (Ukus. 21:5) Ishiwi lya ciGriki ilyo bapilibulako ishiwi lya kuti “moneni!” balilibomfya sana mwi buuku lya Ukusokolola. Ukulingana ne fyo bafwailisha, ili shiwi “lilalenga umuntu uulebelenga ukubika sana amano ku mashiwi ayalakonkapo.” Finshi Lesa akonkeshepo ukulanda? Atile: “Ndelenga ifintu fyonse ukuba ifipya.” Yehova akalenga ifintu ukuba ifipya ku ntanshi, nomba apo alicetekela sana ukuti akafikilisha ifyo atulaya alanda kwati alelenga ifintu ukuba ifipya ino ine inshita.—Belengeni Esaya 46:10.

9. (a) Amashiwi ya kuti “ndelenga fyonse ukuba ifipya” yalosha kuli finshi fibili ifyo Yehova afwaya ukucita? (b) Finshi fikacitika ku “muulu wa ntanshi” ne “calo” ca ntanshi?

⁹ Lekeni nomba tusambilile pa mashiwi yaba pa Ukusokolola 21:5 ayatila: “Ndelenga ifintu fyonse ukuba ifipya.” Ni mwi aya amashiwi yalola? Muli ici cipandwa aya amashiwi yalanda pa fintu fibili ifyo Yehova akacita. Ica kubalilapo, Yehova akonaula ifintu fyonse ifya kale. Icalenga bubili, Yehova akalenga ifintu fyonse ukuba ifipya. Fintu nshi ifyo Yehova akonaula? Pa Ukusokolola 21:​1, tubelengapo ukuti: “Umuulu wa ntanshi ne calo ca ntanshi ninshi nafiya.” “Umuulu wa ntanshi” upilibula amabuteko ayo Satana ne fibanda fyakwe batungulula. (Mat. 4:​8, 9; 1 Yoh. 5:19) Lyena “icalo” cimininako abantu. (Ukute. 11:1; Amalu. 96:1) Kanshi “icalo ca ntanshi” cimininako, abantu ababipa muno nshiku. Yehova takawamye fye amabuteko ya bantunse na bantu abacita ifyabipa lelo akayafumyapo. E ico akalenga imyulu iipya ne sonde ilipya, e kutila ubuteko bumbi bukatendeka ukuteka abantunse abalungama.

10. Finshi Yehova akalenga ifipya?

¹⁰ Pa Ukusokolola 21:​5, tulabelenga na fimbi ifyo Lesa akalenga ukuba ifipya. Ibukisheni ukuti Yehova tatile,“Ndepanga ifintu ifipya.” Lelo atile: “Ndelenga ifintu fyonse ukuba ifipya.” E ico cikaba kwati Yehova akalenga abantu e lyo ne sonde ukuba ifipya pantu akalenga fyonse ukuba ifyapwililika. Nga fintu Esaya asobele, cikaba kwati Yehova akalenga isonde lyonse ukuba nge bala lya Edeni. Kabili akalenga na fwe bantunse ukuba abapya pantu tukapola ku malwele yonse. Abalemana, abashimona, na bankomamatwi bakapola, kabili na bafwa bakabuuka.—Esa. 25:8; 35:​1-7.

“AYA AMASHIWI YA CISHINKA KABILI YA CINE. . . . FYONSE NAFIFIKILISHIWA!”

11. Finshi Yehova aebele Yohane ukucita kabili mulandu nshi amwebele ukucita ifyo?

¹¹ Finshi fimbi Yehova alandile ifingalenga twamucetekela? Yehova aebele Yohane ukuti: “Lemba, pantu aya amashiwi ya cishinka kabili ya cine.” (Ukus. 21:5) Yehova taebele fye Yohane ‘ukulemba.’ Lelo kwali na fimbi ifyo amwebele. Alimwebele no mulandu alingile ukulemba. Atile: “Aya amashiwi ya cishinka kabili ya cine,”—e kutila amashiwi ya kwa Lesa kuti twayacetekela pantu ya cine. Tulatasha sana pali ifi Yohane aumfwilile ifyo bamwebele ‘ukulemba.’ Ne ci kuti calenga twalabelenga pa fyo Lesa atulaya ukuti kukaba Paradaise, no kutontonkanya pa mapaalo ubwingi ayakaba ku ntanshi.

12. Mulandu nshi Yehova alandile ukuti, “fyonse nafifikilishiwa!”

¹² Finshi fimbi ifyo Lesa alandile? Atile: “Fyonse nafifikilishiwa!” (Ukus. 21:6) Yehova alandile kwati fyonse ifyo alaile pali Paradaise nafifikilishiwa. Kabili kuti alanda ifi fine pantu tapali uwingamulesha ukufikilisha ifyo afwaya ukucita. Nomba kwaliba na fimbi ifyo Yehova alanda ifilenga twacetekela ukuti nangu cibe shani ifyo atulaya fikafikilishiwa. Finshi ifyo fine alanda?

“NINE ALIFA KABILI OMEGA”

13. Mulandu nshi Yehova alandile ukuti: “Nine Alifa kabili Omega”?

¹³ Nga fintu twacilanda pa kubalilapo, Yehova umwine alilandile kuli Yohane imiku itatu mu cimonwa. (Ukus. 1:8; 21:​5, 6; 22:13) Pa miku itatu yonse Yehova alandile ukuti: “Nine Alifa kabili Omega.” Muli alufabeti ya ciGriki ishiwi lya kuti alifa e cilembo catendekelapo, lyena ishiwi lya kuti omega e cilembo calekeleshako. Filya Yehova alandile ukuti ni “Alifa kabili na filya atile ni Omega,” filalenga twaishiba ukuti nga atendeka cimo alacipwisha.

14. (a) Ni lilali Yehova alandile ukuti “Alifa” kabili ni lilali akalanda ukuti “Omega.” (b) Bushe amashiwi ayaba pa Ukutendeka 2:​1-3 yalenga twacetekela finshi?

¹⁴ Ilyo Yehova abumbile Adam na Efa alilandile ifyo alefwaya ukucitila abantu e lyo ne sonde. Baibo itila: “Lesa alibapaalile no kubeba ati: ‘Fyaleni, fuleni, kumaneni pe sonde.’” (Ukute. 1:28) Pali iyi nshita cali kwati Yehova alelanda ukuti nine “Alifa.” Yehova alefwaya ukuti abana ba kwa Adamu na Efa kabili abapwililika bakekale pe sonde no kulilenga ukuba Paradaise. Pali iyi nshita cikaba kwati Yehova aletila nine “Omega.” Ilyo Yehova apwile ukupanga umuulu e lyo ne sonde alilandile amashiwi ayalanga ukuti akafikilisha ifyo afwaya ukucita. Aya amashiwi tuyabelenga pa Ukutendeka 2:​1-3. (Belengeni.) Yehova atile ubushiku ubwalenga 7 bwa mushilo. Bushe aya amashiwi yalolele mwi? Yehova alaile ukuti akafikilisha ifyo afwaya ukucitila abantu e lyo ne sonde. Ifi fikafikilishiwa pa mpela ya bushiku bwalenga 7.

15. Mulandu nshi Satana atontonkanishishe ukutila kuti alenga Lesa afilwa ukufikilisha ifyo alaile?

¹⁵ Ilyo Adamu na Efa bapondweke baishileba ababembu kabili balengele abana babo ukuba ababembu no kulafwa. (Rom. 5:12) Camoneke kwati abantu abapwililika kabili abali ne cumfwila kuli Yehova tabali no kukumana pano isonde. Ici cali kwati Yehova alanda ukuti “Omega.” Satana alemona ukuti Yehova takafikilishe ifyo alaya. Satana alemona ukuti Yehova ali no kwipaya Adamu na Efa kabili ali no kubumba abantu bambi pa kuti bafikilishe ifyo Yehova alefwaya ukucitila abantu. Nomba Lesa acite ifi, Kaseebanya nga alandile ukuti Lesa wa bufi. Mulandu nshi ali no kulandila ifi? Pantu ukulingana na amashiwi ayaba pa Ukutendeka 1:​28, Yehova alyebele Adamu na Efa ukuti abana babo bali no kukumana pe sonde.

16. Mulandu nshi Satana aletontonkanishisha ukutila kuti abepesha Yehova ukuti alifililwe ukucita ifyo alaile?

¹⁶ Finshi fimbi Satana aletontonkanya ukuti e fyo Lesa ali no kucita? Nalimo Satana aletontonkanya ukuti Yehova ali no kuleka Adamu na Efa ukukwata abana abashali no kuba abapwililika. (Luk. Mil. 7:20; Rom. 3:23) Ifi aficitika Satana nga aebele Lesa ukuti alifililwe ukucita ifyo alefwaya. Mulandu nshi twalandila ifi? Pantu ifyo Lesa alefwaya fya kuti abana ba kwa Adamu na Efa abapwililika, kabili abacumfwila bakakumane pe sonde mu Paradaise.

17. Finshi Yehova acitile filya Satana, Adamu na Efa bamupondokele kabili finshi akacita ku ntanshi? (Moneni ne cikope.)

¹⁷ Satana taishibe ifyo Yehova ali no kucita pa kufikilisha ifyo alefwaya nangu ca kuti Adamu na Efa e lyo na Satana wine balimupondokele. (Amalu. 92:5) Yehova alilekele Adamu na Efa bakwata abana kabili ifi acitile fyalilangile apabuuta tuutu ukuti Yehova tabepa. Kabili Yehova alilangile ukuti takuli nangu cimo icingalenga afilwa ukufikilisha ifyo alanda. Alishininkishe ukuti ifyo alaile fyali no kucitika, ilyo atumine “umwana” uwali no kupususha abana ba kwa Adamu na Efa. (Ukute. 3:15; 22:18) Satana tale-enekela ukuti Yehova ali no kutuma umwana wakwe uwali no kwisafwa pa kuti alubule abantunse. Mulandu nshi twalandile ifi? Pantu icilubula cilangilila ukuti Lesa kutemwa. (Mat. 20:28; Yoh. 3:16) Satana taba no kutemwa, ni kaitemwe. Finshi fikacitika pa mulandu wa cilubula? Pa mpela ya myaka 1,000 iya kuteka kwa kwa Kristu, abana ba kwa Adamu na Efa abapwililika kabili abacumfwila bakekala mu Paradaise pe sonde nga filya fine Lesa alefwaya. Pali iyi nshita Yehova akatila, “Omega.”

IFYO TWINGACETEKELA SANA IFYO YEHOVA ATULAYA UKUTI KUKABA PARADAISE

18. Fintu nshi fitatu ifilanga ukuti Lesa akafikilisha ifyo atulaya? (Moneni akabokoshi kaleti “Ifintu Fitatu Ifingalenga Twacetekela Ifyo Yehova Atulaya.”)

¹⁸ Finshi twingebako abantu abatwishika ukuti Lesa akafikilisha ifyo atulaya, pa fyo twasambilila ukuti kukaba Paradaise? Ica kubalilapo, Yehova umwine e watulaya ukuti kukaba Paradaise. Ibuuku lya Ukusokolola litila: “Uwaikala pa cipuna ca Bufumu atile: ‘Moneni! Ndelenga ifintu fyonse ukuba ifipya.’” Alikwatisha amano, wa maka kabili alafwaisha no kufikilisha ifyo alaya. Icalenga bubili, Yehova alishiba ukuti ifyo alaya fikacitika kabili kuli ena fyalicitika na kale. E mulandu wine alandile ukuti: “Aya amashiwi ya cishinka kabili ya cine. . . . Fyonse nafifikilishiwa!” Takuli icingalenga Yehova afilwa ukufikilisha ifyo alefwaya ukucita. E co alandile ukuti : “Nine Alifa kabili Omega.” Yehova akashinina Satana ukuti wa bufi kabili te kuti alenge Yehova ukukanacita ifyo afwaya.

19. Kuti mwacita shani abantu nga baletwishika ifyo Lesa atulaya ukuti kukaba Paradaise?

¹⁹ Muleibukisha ukuti nga mule-ebako abantu ifyo Lesa atulaya ukuti fikafikilishiwa, na imwe mukamucetekela sana. Nomba finshi mukacita nga umuntu aasuka ukuti amashiwi ayaba pa Ukusokolola 21:4 yasuma sana, te kuti yafikilishiwe ilyo mulelanshanya nankwe? Kuti mwabelenga no kulanshanya nankwe amashiwi ayaba mu cikomo 5 na 6. Lyena kuti mwamulanga ifyo Yehova alanda ifilenga twacetekela ifyo atulaya ifyaba kwati cifwati.—Esa. 65:16.