Ifipusho Ukufuma ku Babelenga
Bushe “kutusha” nshi kwalandwapo pa AbaHebere 4:9-11, kabili ni shani umuntu ‘engengila mu kutusha kulya’?
Umutumwa Paulo alembele Abena Kristu abaHebere aba mu mwanda wa myaka uwa kubalilapo, ati: “Kwashilwapo abantu ba kwa Lesa isabata lya Kutusha pantu umuntu ilyo aingila mu kutusha kwakwe, wene atusha na ku milimo yakwe, ifyo fine na Lesa atushishe ku milimo yakwe iine. E ico tucincile ukwingila mu Kutusha kulya.”—AbaHebere 4:9-11.
Lintu Paulo alandile pa kutusha kwa kwa Lesa ku milimo Yakwe, afwile alelosha ku fyalandwa pa Ukutendeka 2:2, apo tulebelenga ukuti: “Mu bushiku bwa cinelubali [7] e mo Lesa apwishishishe imilimo yakwe iyo acitile; kabili mu bushiku bwa cinelubali e mo atushishe ku milimo yakwe yonse iyo acitile.” Mulandu nshi Yehova atushishe “mu bushiku bwa cinelubali”? Kwena, te pa mulandu wa kuti alekabila ukutusha “ku milimo yakwe yonse iyo acitile.” Icikomo cakonkapo catulanga ico atushiishe pa kusosa ukuti: “Lesa apaalile ubushiku bwa cinelubali, no kubushisha: pantu muli ubo e mo atushishe ku milimo yakwe yonse iyo Lesa alengele ku kuicita.”—Ukutendeka 2:3; Esaya 40:26, 28.
“Ubushiku bwa cinelubali” bwalipusene ku nshiku mutanda [6] ishabalilepo pantu bwena bwali bushiku ubo Lesa apaalile no kushisha, e kutila, alibupaatwile, atemwa ukubupeela, ku bufwayo bwaibela. Bushe bwali bufwayo nshi? Mu kubangilila, Lesa ali nasokolola ubufwayo bwakwe pa bantunse ne sonde. Lesa alandile ku muntu wa ntanshi no mukashi wakwe, ati: “Fyaleni, fuleni, kumaneni pe sonde no kupanasha; kabili mube na bukateka kwi sabi lya muli bemba, na ku fyuni fya mu lwelele, na ku fya mweo fyonse ifyenda pe sonde.” (Ukutendeka 1:28) Nangu ca kutila Lesa apeele abantunse ne sonde intendekelo yapwililika, inshita ikalamba yali no kupitapo pa kuti isonde lyonse linashiwe no kusangulwa paradise uwaisulamo abantunse bapwililika, nga fintu Lesa afwaile. E ico, pa “bushiku bwa cinelubali,” Lesa alitushishe, ku milimo ya kulenga ifya pe sonde pa kuti aleke ifyo alengele filunduluke umwabela ukufwaya kwakwe. Ku mpela ya “bushiku” bulya, fyonse ifyo Lesa afwaile fyali no kufishiwapo. Bushe kulya kutusha kwali no kufika ku nshita nshi?
Nga twabwelela ku fyalandile Paulo mu AbaHebere, tulemona ukuti atile “kwashilwapo abantu ba kwa Lesa isabata lya Kutusha,” kabili acincishe Abena Kristu ukubombesha “ukwingila mu Kutusha kulya.” Ici cilanga ukuti lintu Paulo alandile aya mashiwi, “ubushiku bwa cinelubali” ubwa kutusha kwa kwa Lesa, ubwatendeke imyaka 4,000 mu kubangilila, bwali bucili tabulapwa. Tabwakapwe bukasuke ubufwayo bwa kwa Lesa pa lwa bantunse ne sonde bukafishiwepo ku mpela ya Myaka Ikana Limo iya Kuteka kwa kwa Yesu Kristu, “Shikulu we sabata.”—Mateo 12:8; Ukusokolola 20:1-6; 21:1-4.
Ulwa ico cilolelo icishaiwamina icili ku ntanshi, Paulo alondolwele ifyo umuntu engengila mu kutusha kwa kwa Lesa. Alembele ati: “Umuntu ilyo aingila mu kutusha [kwa kwa Lesa], wene atusha na ku milimo yakwe.” Ici ciletulanga ukuti nangu abantunse bakwete intendekelo yapwililika, te bonse capamo baingilemo mu kutusha kwa kwa Lesa. Ni pa mulandu wa kuti Adamu na Efa tababakile pa nshita ntali ukutusha kwa kwa Lesa pa “bushiku bwa cinelubali” ukupitila mu kupokelela ifyo abateyanishishe. Lelo bena, balipondweke no kufwaya ukuipaatula kuli Lesa. Na kuba, bakonkele amapange ya kwa Satana, no kukanakonka ubutungulushi bwa kwa Lesa ubwa kutemwa. (Ukutendeka 2:15-17) E ico, balufishe icilolelo ca kwikala pe na pe mwi sonde lya paradise. Ukutula lilya line, abantunse bonse balitekelwe ubusha ku lubembu ne mfwa.—Abena Roma 5:12, 14.
Ukupondoka kwa bantunse takwafubalishe ubufwayo bwa kwa Lesa. Ubushiku bwakwe ubwa kutusha e po bucili. Lelo, pa mulandu wa kutemwa, Yehova ateyenye icilubula, ukupitila mu Mwana wakwe, Yesu Kristu, pa kuti bonse abakacipokelela no kucitetekela bakalubulwe no kutusha ku cisendo ca lubembu ne mfwa. (Abena Roma 6:23) Uyu e mulandu Paulo acincishishe Abena Kristu banankwe ‘ukutusha ku milimo yabo.’ Balekabila ukupokelela ifyo Lesa abateyanishishe ku kupusuka no kukanaibombela inshita yabo iya ku ntanshi, ifyo Adamu na Efa bacitile. Kabili balekabila ukuleka ukukonkelela imilimo yabo iya kuilungamika.
Umuntu nga asuula bukaitemwe nelyo ifya pano isonde pa kuti acite ukufwaya kwa kwa Lesa kuti apembesulwa no kusanga ukutusha. Yesu alaalike abantu ati: “Iseni kuli ine, bonse mwe bacucutika kabili abafinwa, na ine nalamupeelo kutusha. Sendeni ikoli lyandi no kusambilila kuli ine, pa kuti ndi wafuuka kabili uwapetama umutima; e lyo mwalasango kutusha ku mitima yenu; pantu ikoli lyandi lyalyanguka, ne cisendo candi calipepuka.”—Mateo 11:28-30.
Ifyalandile Paulo pa kutusha kwa kwa Lesa ne fyo umuntu engengilamo fifwile fyakoseleshe Abena Kristu abaHebere mu Yerusalemu, abashipikishe ukupakaswa ukwingi no kupumwa pa mulandu wa citetekelo cabo. (Imilimo 8:1; 12:1-5) Na lelo, e fyo aya mashiwi ya kwa Paulo yengakoselesha Abena Kristu. Apo nakupalama ukufishiwapo kwa bulayo bwa kwa Lesa ubwa kuleta isonde lya paradise ilikatekwa ku Bufumu bwakwe ubwalungama, na ifwe bene tufwile ukutusha ku milimo yesu no kubombesha ukwingila muli kulya kutusha.—Mateo 6:10, 33; 2 Petro 3:13.
[Ifikope pe bula 31]
Ubulayo bwa kwa Lesa ubwa paradise wa pe sonde bukafishiwapo ku mpela ya bushiku bwakwe ubwa kutusha