Ifipusho Ukufuma ku Babelenga
Bushe insoka yaebele shani Efa mwi bala lya Edene ukuti atobe ifunde lya kwa Lesa ilya kukanalya ku muti wa kwishibo busuma no bubi?
Pa Ukutendeka 3:1 patila: “Nomba insoka yabe ncenjeshi iyacilamo mu fya mweo fyonse ifya mpanga ifyo Yehova Lesa acitile. Na yo aiti ku mwanakashi, Kabili Lesa asosele, ati, Mwilalyako ku muti onse wa mwi bala, mwa?” Fingi abantu balandapo pa fyo insoka yalandile kuli Efa. Bamo batila insoka yabomfeshe ifishibilo nangu ukucebusha. Ku ca kumwenako, shimapepo umuNgeleshi Joseph Benson atile: “Cilemoneka kwati insoka yabomfeshe ifishibilo fya musango umo. Bamo batila fye no kuti insoka shalikwete amano no kulanda shalelanda, . . . lelo takwaba ubushininkisho.”
Lelo, ni shani fintu insoka ingabomfya fye ifishibilo no kweba Efa ukuti nga alyako ku muti wabindwa kuti aba nga Lesa, ukwishiba ubusuma no bubi? E lyo kabili, Efa na o alilandile pa kwasuka icipusho insoka yaipwishe. (Ukutendeka 3:2-5) Ifi bamo batila ukuti insoka yalelandila fye mu fishibilo cimo no kuti Efa na o aleyasukila mu fishibilo, lelo Baibolo isosa ukuti alelanda.
Ukulanda pali ici cacitike, umutumwa Paulo asokele Abena Kristu banankwe ukuti: ‘Ndetiina, epali yaonaika amatontonkanyo yenu nga filya insoka yabepele Efa mu bucenjeshi bwa iko.’ Ububifi Paulo alandilepo bwafumine ku “batumwa ba bufi, ababomfi ba bucenjeshi.” Ubucenjeshi bwa aba “abatumwa abacishamo” tabwacitilwe mu fishibilo fye no kucebusha. Bwasanshishemo imilandile, e kutila insoselo shabo isha bucenjeshi, isha kulufya bambi.—2 Abena Korinti 11:3-5, 13.
Nangu cingati ishiwi lyalibomfiwe ku kulufya Efa mwi bala lya Edene, tapabe cilanga ukuti insoka yalikwete akalikoliko akalenga iciunda ce shiwi ukumfwika. Tayalekabila ukukakwata. Ilyo malaika wa kwa Lesa alandile kuli Balaamu ukupitila mu mpunda nkota, iyi nama tayakabile umukolomino ngo wa muntu. (Impendwa 22:26-31) Ukwabulo kutwishika, ilyo “impunda iishisosa yalandile ishiwi lya buntu,” amaka yalengele ukuti ilande yafumine mu bwikashi bwa mipashi.—2 Petro 2:16.
Icibumbwa ca ku mupashi icalengele insoka ukulanda kuli Efa caishibikwa mu Baibolo nga “icisoka cikote iciitwa Kaseebanya kabili Satana.” (Ukusokolola 12:9) Amashiwi yaleumfwika yantu Efa aumfwile no kwasukako yafumine kuli Satana, ‘uifungushanya ku kuba malaika wa lubuuto.’—2 Abena Korinti 11:14.
[Icikope pe bula 27]
“Mukaba nge milungu, abaishibo busuma no bubi”