• Ubukombe bwe Subilo Kuli Bankole Abakungumana
    Ukusesema kwa kwa Esaya—Ulubuuto lwa Bantu Bonse 2

    • Ukutetekela Ifya Fye

      8. Ni bani abaYuda abengi batetekele, te mulandu no kusokwa nshi?

      8 Ukufika na nomba abaYuda abengi tabalati batetekele Yehova umupwilapo ukuti e wingabapususha. Ku ca kumwenako, ilyo Yerusalemu talawa, bakateka bakwe bayalukile ku nko isha maka ukuti e sho shibaafwe, bali nga balecita bucilende kuli Egupti na Babele. (Esekiele 16:26-29; 23:14) E ico, Yeremia abasokele ati: “Alitiipwo muntu uutetekela abantunse, uwacito wa mubili e kuboko kwakwe, na kuli Yehova umutima wakwe wafumako.” (Yeremia 17:5) Lelo, ici cine fye e co abantu ba kwa Lesa bacitile!

      9. Ni shani cingaba ukuti abaYuda abengi pambi ‘balepoosa indalama pa cishili cilyo’?

      9 E co nomba nabatekwo busha ku luko lumo pali shilya batetekelemo. Bushe nabasambililako cimo? Nakalimo abengi tabasambilileko, pantu Yehova abepusha ukuti: “Cinshi ico [mupoosela indalama pa, NW] cishili cilyo, indalama sha mu kucucutika kwenu mu cishili ca ciikushi?” (Esaya 55:2a) Nga ca kuti aba baYuda bankole baletetekela umuntu umbi ukucilo kutetekela Yehova, ninshi ‘balepoosa indalama pa cishili cilyo.’ Cine cine Babele takabalubuleko ne co alikwete ne funde lishalealulwa ilya kukanasuminisha bankole ukubwelela ku mwabo. Ukulanda fye cine, Babele, uwatemwishishe ukuteka inko shimbi, amakwebo, no kupepa kwa bufi, te kuti acitile abaYuda bankole icisuma nangu cimo.

      10. (a) Yehova akalambula shani abaYuda bankole nga baumfwa kuli wene? (b) Cipingo nshi Yehova apingene na Davidi?

      10 Yehova apaapaata abantu bakwe atila: “Umfwisheni kuli ine, lyeni ne cisuma, no kuleke myeo yenu iilemene ku fyanona.