“Mwapokele Ubupe, Peeleni Ubupe”

“MWAPOKELE ubupe, peeleni ubupe.” (Mateo 10:8) Yesu aebele abatumwa bakwe ici cipope ilyo abatumine ukuya baleshimikila imbila nsuma. Bushe abatumwa balyumfwilile ici cipope? Ee, kabili batwalilile ukucita ifyo abebele nangu fye lintu Yesu ali nafuma pe sonde.

Ku ca kumwenako, ilyo Simone, uwali uwa malele kale amwene amaka ya kupapusha ayo umutumwa Petro no mutumwa Yohane bakwete, abebele ukuti abalipile pa kuti bamupeko yalya maka. Lelo Petro ashimawile Simone ati: “Indalama shobe sha silfere shilobele pamo nobe, pantu wamwene kwati ni mu ndalama wingapokelela ica bupe ca kwa Lesa.”—Imilimo 8:18-20.

Umutumwa Paulo na o acitile filya Petro acitile. Paulo afwaya nga aicitile icisendo mu fya ndalama kuli bamunyina ba Bwina Kristu abali mu Korinti. Lelo, abombele ku minwe yakwe pa kuti aisakamane umwine. (Imilimo 18:1-3) E co mu kuicetekela alandile ukuti abilishe imbila nsuma ku bena Korinti “apabula umutengo.”—1 Abena Korinti 4:12; 9:18.

Ku ca bulanda, abengi abaitunga ukuba abakonshi ba kwa Kristu tabaitemenwa ‘ukupeela ubupe’ nga filya abatumwa bacitile. Ca cine, bashimapepo abengi aba mu Kristendomu “bafundila ukulipilwa.” (Mika 3:11, NW) Bashimapepo bamo basanguka abakankala pa mulandu wa ndalama bapoka ku mikuni yabo. Mu 1989, kashimikila umo mu United States apingwilwe ukukakwa imyaka 45. Cinshi acitile? “Aleibila abantu bakwe imintapendwa ya ndalama sha madola kabili alebomfya shimo ku kushitamo amayanda, bamotoka, ukuya inyendo sha kuyatuusha, kabili akuulile ing’anda ya kwikalamo imbwa yakwe no kubikamo ica kutalaliko mwela.”—People’s Daily Graphic, October 7, 1989.

Mu Ghana, ukulingana ne nyushipepala ya Ghanaian Times iya pa March 31, 1990, umupatili wa mu Roma Katolika abuulile ndalama abantu batuulile mu calici no kubapoosela. Inyunshipepala yatile icalengele ukuti acite ci “pantu, abantu abakalamba, baleenekelwa ukutuula indalama ishingi.” Te ca kupapa ukuti, amacalici ayengi yatunka fye na bantu babo pa kuti babe no bufunushi, babakoselesha ukucita ifyangalo fya cela mushuke ne nshila shimbi isha kupangilamo indalama.

Inte sha kwa Yehova bena te fyo baba, besha na maka ukupashanya Yesu na basambi bakwe aba kubalilapo. Tababa na bashimapepo bafola indalama. Nte umo na umo mutumikishi wapeelwa umulimo wa kushimikile ‘mbila nsuma ya Bufumu’ kuli bambi. (Mateo 24:14) E co, baNte ukucila pa mamilioni 6 mu calo conse babomba umulimo wa kupeela abantu “amenshi ya bumi” ukwabula ukulipilisha. (Ukusokolola 22:17) Muli yi nshila, na balya “abashaba na silfere [indalama]” kuti bamwenamo mu bukombe bwa mu Baibolo. (Esaya 55:1) Nangu line indalama babomfya pa kubomba umulimo mu calo conse shifuma mu misangulo ya kuitemenwa, tabalombelesha ndalama. Apo batumikishi ba cine aba kwa Lesa, ‘tabashitisha icebo ca kwa Lesa,’ lelo balanda “nga ba bufumacumi, e kutila nga batumwa na Lesa.”—2 Abena Korinti 2:17.

Lelo, mulandu nshi Inte sha kwa Yehova baitemenwa ukwafwa bambi, ukubomfya indalama shabo? Cinshi cibacincisha? Bushe ukupeela ubupe kupilibula ukuti takuli ico bamwenamo pa kubombesha kwabo?

Ukwasuka Ukusonsomba kwa kwa Satana

Icikalamba icicincisha Abena Kristu ba cine ileelo, kufwaya ukusekesha Yehova—te kuinonsha abene. E co balasuka Satana Kaseebanya pa kusonsomba kwakwe uko atendeke kale sana. Lintu Satana Kaseebanya alesonsomba Yehova pa mulandu wa kwa Yobo, umuntu umulungami, aipwishe ati: “Bushe Yobo atiinina Lesa apa fye?” Satana aletunga ati Yobo alebombela Lesa ni co fye Alimucingilile. Kabili atile nga ca kuti fyonse ifyo Yobo akwete fyalipokelwe, Yobo kuti atuka Lesa pa cinso cakwe!—Yobo 1:7-11.

Pa kwasuka uku kusonsomba, Lesa asuminishe Satana ukwesha Yobo, atile: “Conse ico akwata ndepeela mu minwe yobe.” (Yobo 1:12) Cinshi cacitike? Yobo ashinine Satana ukuba uwa bufi. Te mulandu na mafya yamuponene, Yobo atwalilile ukuba uwa cishinka. Atile: “Nsuke ndeke umweo te kuti ndeke bumpomfu bwandi.”—Yobo 27:5, 6.

Abena Kristu ba cine ileelo balanga imibele yakweteko Yobo. Tababombela Lesa pa mulandu wa fintu bakwata.

Icikuuku ca Bupe Fye ica kwa Lesa

Umulandu na umbi uo Abena Kristu ba cine baitemenwa ‘ukupeela ubupe’ wa kuti na bo “bapokelele fye ubupe” ukufuma kuli Lesa. Umuntunse ateekwa ubusha ku lubembu ne mfwa pa mulandu wa lubembu lwa mufyashi wesu Adamu. (Abena Roma 5:12) Mu kutemwa, Yehova ateyenye ukuti Umwana wakwe afwe imfwa ya bulilambo—icintu calengele Lesa ukuipusula nga nshi. Ukwabula ukutwishika, umuntunse talingile ukucitilwa icintu ca musango yu. Ubu bwali bupe fye ukufuma kuli Lesa.—Abena Roma 4:4; 5:8; 6:23.

Ukulingana ne fyalembwa pa Abena Roma 3:23, 24, Paulo aebele Abena Kristu basubwa ukuti: “Bonse balibembuka kabili balapelebela ku bukata bwa kwa Lesa, kabili ni ku luse fye balelungamikilwa ku cikuuku cakwe ica bupe fye mu cilubula ca kwa Kristu Yesu.” Balya ababa ne subilo lya kwikala umuyayaya pe sonde na bo babelelwa “uluse fye.” Ulu luse babelelwa lusanshamo ishuko lya kulengwa abalungami kabili nga bacibusa wa kwa Yehova.—Yakobo 2:23; Ukusokolola 7:14.

Ilambo lya cilubula ca kwa Kristu na lyo lyalenga Abena Kristu bonse ukubomba nga batumikishi ba kwa Lesa. Umutumwa Paulo alembele ati: “Nabele kapyunga wa ici cine [inkaama yashila] umwabela ica bupe ca cikuuku ca bupe fye [ica kwa Lesa].” (Abena Efese 3:4-7) Pa kupeelwa icipope ca kubomba ubu butumikishi ukupitila mu bupe ubo bashalingile kupeelwa nelyo ubo bashingabombela, abatumikishi bene bene aba kwa Lesa teti benekele ukulipilwa ifintu pa mulandu wa kwebako bambi imbila ya ubu bupe.

Bushe Icilambu ca Mweo wa Muyayaya Cilenga Ukuba na Bukaitemwe?

Bushe ici cilolele mu kuti kanshi Lesa enekela Abena Kristu ukumubombela ukwabula ukusubila icilambu? Awe, pantu umutumwa Paulo aebele abasumina banankwe ukuti: “Lesa tali uushalungama uwa kuti alabe umulimo wenu no kutemwa uko mwalangile kwi shina lyakwe.” (AbaHebere 6:10) Kabili Yehova taba na bupondamishi. (Amalango 32:4) Lelo, Yehova ni “kalambula wa bamufwaisha.” (AbaHebere 11:6) Lelo bushe ubulayo bwa mweo wa muyayaya muli Paradaise tabulenga abantu ukuba bakaitemwe?—Luka 23:43.

Napacepa. Umulandu umo wa kuti, ukufwaya ukwikala umuyayaya muli Paradaise pe sonde kwafuma kuli Lesa umwine. Ni Lesa e wapeele ili subilo ku baupana babili aba kubalilapo. (Ukutendeka 1:28; 2:15-17) Kabili alengele ukuti ili subilo Adamu na Efa baonawile libweshiwe ku bana babo. E co Lesa alaya ukupitila mu Cebo cakwe ukuti “ububumbo na bo bukalubulwa ku busha bwa kubola no kukwata ubuntungwa bwa bukata ubwa bana ba kwa Lesa.” (Abena Roma 8:21) E ico, kanshi cisuma sana Abena Kristu ba leelo ukutonta “amenso ku kupoka icilambu” nga filya Mose acitile. (AbaHebere 11:26) Lesa tapeela ici cilambu nga mafisakanwa. Apeela ici cilambu pa mulandu wa kutemwa kwine kwine atemwa abamubombela. (2 Abena Tesalonika 2:16, 17) Na ifwe “tulatemwa, pantu e wabalilepo ukututemwa.”—1 Yohane 4:19.

Ukubombela Lesa no Mutima wa Cishinka

Na lyo line, Abena Kristu ileelo bafwile lyonse ukuceeceeta ico babombela Lesa. Pali Yohane 6:10-13, tubelengapo ukuti Yesu mu cipesha amano alishishe abantu ukucila pali 5,000. Ukufuma apo, bamo batendeke ukukonka Yesu pa milandu ya bukaitemwe. Yesu abebele ati: “Mulefwaya ine . . . ni co mwaliile imikate no kwikuta.” (Yohane 6:26) Ilyo papitile imyaka bamo Abena Kristu baipeele balebombela Lesa lelo “te ku mutima wa cishinka.” (Abena Filipi 1:17) Bamo ‘abashasumine ifyebo ifituntulu ifya kwa Yesu Kristu’ balefwaya fye ne nshila sha kuinonseshamo ukubomfya ukubishanya balebishanya na Bena Kristu banabo.—1 Timote 6:3-5.

Umwina Kristu uubombela Lesa pa mulandu wa kuti afwaya ukwikala umuyayaya mu Paradaise kuti alebomba na bukaitemwe. Mu kuya kwa nshita, kuti afilwa ukutwalilila lwa ku mupashi. Pantu ubwikashi bwa kwa Satana bulemoneka ukukokola ukucila ifyo aleenekela, kuti ‘atompoka,’ ukutontonkanya ukuti impela yakokola. (Abena Galatia 6:9) Nalimo kuti akalipa pa fintu aipusulako. Yesu atucinkulako ati: “Uletemwa Yehova Lesa obe no mutima obe onse, no mweo obe onse, no kutontonkanya kobe konse.” (Mateo 22:37) Ca cine, umuntu uubombela Lesa pa mulandu wa kutemwa tapima inshita akamubombela. Apampamina pa kubombela Yehova umuyayaya! (Mika 4:5) Tailishanya pa kuipusula aipusula pa kubombela Lesa. (AbaHebere 13:15, 16) Ukutemwa atemwa Lesa kumulenga ukubika ifya kwa Lesa intanshi mu bumi bwakwe.—Mateo 6:33.

Ileelo, bakapepa ba cine ukucila pa mamilioni 6 ‘balaipeela’ mu mulimo wa kwa Yehova. (Amalumbo 110:3) Bushe epo mwaba pali aba? Nga tamwabapo, lyena etetuleni pa fyo Lesa apeela: ukwishiba icine casanguluka; (Yohane 17:3) ukulubulwa ku fisambilisho fya mu mipepele ya bufi; (Yohane 8:32) isubilo lya kwikala umuyayaya. (Ukusokolola 21:3, 4) Inte sha kwa Yehova kuti bamwafwa ukusambilila ifyo mwingapokelela ifi fyonse ukufuma kuli Lesa—ukwabula ukulipila.

[Amashiwi pe bula 22]

Icikalamba icicincisha Abena Kristu ba cine ileelo, kufwaya ukusekesha Yehova—te kuinonsha abene

[Icikope pe bula 21]

Ubupe bwa kwa Lesa ubwa cilubula bucincisha Abena Kristu ukwebako bambi imbila nsuma ukwabula ukubalipilisha