Cimo cine na ku lukombo. Yesu atile: “Ulu lukombo [lulepilibule] cipingo cipya ica pa mulopa wandi, uuleitililwa pa mulandu wenu.”—Luka 22:20.

Mu fyalembele Mateo, Yesu alandile pa lukombo ati: “Lwene lulepilibulo ‘mulopa wandi uwa cipingo,’ uulesuumina pa mulandu wa bengi ku kulekelelwa imembu.” (Mateo 26:28) Yesu abomfeshe umwangashi mu lukombo nge ca kwimininako, nelyo icimpashanya, ca mulopa wakwe. Umulopa wakwe uwasuumiwa waali no kuba e citendekelo ca “cipingo cipya” ica basambi basubwa no mupashi, abaali no kuteka pamo nankwe nge shamfumu kabili bashimapepo mu muulu.—Yeremia 31:31-33; Yohane 14:2, 3; 2 Abena Korinti 5:5; Ukusokolola 1:5, 6; 5:9, 10; 20:4, 6.

Umwangashi wali mu lukombo kabili wabombele nge ca kucinkulako ca kuti umulopa wasuumiwa uwa kwa Yesu e waali no kuba cishinte ca “kulekelelwa imembu,” ne ci caali no kulenga abalelya no kunwako ukwitwa ku bumi bwa ku muulu nge mpyani shinankwe isha kwa Kristu. Cili icalinga kanshi ukuti, abo baitwa ku muulu—aba kupenda fye—e bengalyako fye beka umukate no kunwako umwangashi pa Cibukisho.—Luka 12:32; Abena Efese 1:13, 14; AbaHebere 9:22; 1 Petro 1:3, 4.

Lelo, ni shani pa lwa bakonshi ba kwa Yesu abashaba mu cipingo cipya? Aba ni “mpaanga shimbi” isha kwa Shikulu, abafuluka ukwisaipakisha ubumi bwa ciyayaya mu paradise wa pe sonde, te kuteeka na Kristu mu muulu iyo. (Yohane 10:16; Luka 23:43; Ukusokolola 21:3, 4) Nge “bumba likalamba” ilya Bena Kristu ba busumino “[abalebombela Lesa] umulimo washila akasuba no bushiku,” balatemwa ishuko bakwata lya kuba aba kutambako pa Mulalilo wa kwa Shikulu. Ifyebo ne ncitilo shabo kuti twatila fitila: “Ipusukilo lyesu lyafuma kuli Lesa wesu, uwaikala pa cipuna ca bufumu, na ku Mwana wa mpaanga.”—Ukusokolola 7:9, 10, 14, 15.

[Akabokoshi ne Fikope pe bula 6]

“UYU MUBILI WANDI” NELYO “UYU ULEIMININAKO UMUBILI WANDI” NI CILI KWI ICILUNGEME?

Ilyo Yesu atile, “nine mwinshi” no kuti, “nine mwangashi wine wine,” takwali uwatontonkenye ukuti e waali iciibi ca cine cine nelyo umwangashi wa cine cine. (Yohane 10:7; 15:1) E cimo cine na lintu Baibolo wa Cibemba uwa mu 1956 ayambula Yesu ngo ulelanda ati: “Ulukombo ulu e cipingo cipya,” tatutontonkanya ukuti lulya lukombo lwine lwali e cipingo cipya. E cimo na pa, ilyo atile umukate ‘wali’ mubili wakwe, te ca kutwishika no kutwishika ukuti umukate walepilibula, nelyo waiminineko, umubili wakwe. E co Baibolo yapilibulwa na Charles B. Williams ilandila ati: “Uyu uleimininako umubili wandi.”—Luka 22:19, 20.