Abateyanishiwa ku Kucita Ukufwaya kwa kwa Yehova

MWI SONDE fye lyonse mwaliba ifilonganino ifingi. Mwaliba ifilonganino fya mapepo, ifya fikansa fya calo, ne filonganino ifyafwa abantu mu mikalile, kabili ifi ifilonganino fyonse fyalipusanapusana ifyo fyapangwa, ifyo fibomba, ifyo fifwaya ifintu ukuba, ne fyo fitungululwa. Lelo kwaliba icilonganino icaibela icine cine. Icebo ca kwa Lesa cilanga fye apabuuta tuutu ukuti, ici cilonganino ca Nte sha kwa Yehova.

² Caliwama mwaliba mu cilonganino ca kwa Yehova. Mulacita ukufwaya kwakwe pantu mwalishiba bwino ifyo Lesa afwaya. (Amalu. 143:10; Rom. 12:2) Mulabombela pamo na ba bwananyina abatemwana ababa mwi sonde lyonse. (2 Kor. 6:4; 1 Pet. 2:17; 5:9) Nga filya Icebo ca kwa Lesa calanda, ukuba umubomfi wa kwa Lesa lipaalo ilikalamba nga nshi. (Amapi. 10:22; Marko 10:30) Nga muli aba cishinka ilyo mulecita ukufwaya kwa kwa Yehova, mukaba no bumi bwine bwine ku ntanshi.—1 Tim. 6:18, 19; 1 Yoh. 2:17.

³ Kabumba wesu Yehova alikwata icilonganino icaibela mwi sonde lyonse ico atungulula. Apo e utungulula, e Mutwe wa fintu fyonse mu cilonganino cakwe. Twalimucetekela icine cine. E Kapingula wesu, e utupeela amafunde, kabili e Mfumu yesu. (Esa. 33:22) Apo te Lesa wa cimfulunganya, alipekanya bwino ifintu pa kuti ‘tulebombela pamo nankwe’ mu kucita ubufwayo bwakwe.—2 Kor. 6:1, 2.

⁴ llyo impela ya cino calo ilepalama, tufwile ukulakonka Kristu Yesu, Imfumu yasontwa iitutungulula. (Esa. 55:4; Ukus. 6:2; 11:15) Yesu asobele ukuti abasambi bakwe baali no kubomba imilimo iyacila pa yo abombele ilyo ali pano isonde. (Yoh. 14:12) Ifyo Yesu alandile fya cine, uyu mulimo wali no kubombwa ukufika ukutali pantu mu kupita kwa nshita, abasambi bakwe baali no kufula. Baali no kubila imbila nsuma iya Bufumu ukufika na ku mpela ya pano isonde.—Mat. 24:14; 28:19, 20; Imil. 1:8.

⁵ Ifi twalandapo fya cine pantu imbila nsuma iya Bufumu ilebilwa mwi sonde lyonse. Lelo nga filya Yesu alandile, umulimo wa kubila imbila nsuma ukapwa ilyo inshita Yehova asala ikafika. Ukulingana no kusesema ukwaba mu Cebo ca kwa Lesa Baibolo, cilemoneka fye apabuuta tuutu ukuti ubushiku bwa kwa Yehova ubukalamba kabili ubwa kutiinya nabupalama.—Yoele 2:31; Sefa. 1:14-18; 2:2, 3; 1 Pet. 4:7.

⁶ Apo twalishiba ifyo Yehova afwaya muli ino nshita ya ku mpela, tufwile ukubombesha pa kuti tulecita ifyo afwaya. E ico tufwile ukwishiba bwino bwino ifyo icilonganino ca kwa Lesa cibomba, kabili tufwile ukulabombela pamo na co muli fyonse. Icilonganino citungululwa ukulingana na mashinte ya mafunde ya mu Baibolo, amafunde, ifipope, na masambililo ayaba mu Cebo ca kwa Lesa icapuutwamo.—Amalu. 19:7-9.

⁷ Abantu ba kwa Yehova nga balekonka ifyo Baibolo ilanda, balekala umutende kabili balabombela pamo. (Amalu. 133:1; Esa. 60:17; Rom. 14:19) Cinshi calenga ukuti twikatane na ba bwananyina bonse? Kutemwa. Twalitemwana na ba bwananyina bonse. (Yoh. 13:34, 35; Kol. 3:14) Apo twalikatana, tulabombela pamo ne cilonganino ca kwa Yehova ica ku muulu.

ICILONGANINO CA KWA YEHOVA ICA KU MUULU

⁸ Kasesema Esaya, Esekiele na Daniele, balimwene icilonganino ca kwa Yehova ica ku muulu mu fimonwa. (Esa., icipa. 6; Esek., icipa. 1; Dan. 7:9, 10) Umutumwa Yohane na o alimwene icimonwa ca cilonganino ca ku muulu, kabili alilenga ukuti na ifwe twishibepo fimo pa cilonganino ca ku muulu pantu alilembele ifyo amwene mwi buuku lya Ukusokolola. Amwene Yehova pa cipuna ca bukata pamo na bamalaika abalebilisha ukuti: “Wa mushilo, wa mushilo, wa mushilo Yehova Lesa, Uwa Maka Yonse, uwaliko kabili uwabako kabili uukesabako.” (Ukus. 4:8) Yohane na kabili amwene “umwana wa mpaanga . . . naiminina pa kati ka cipuna ca bufumu.” Umwana wa Mpaanga uwa kwa Lesa, ni Yesu Kristu.—Ukus. 5:6, 13, 14; Yoh. 1:29.

⁹ Ifi Yehova mu cimonwa aikala pa cipuna ca Bufumu, cilangilila fye ukuti e Mutwe wa cilonganino ca ku muulu. Baibolo pali 1 Imilandu 29:11, 12 ilanda pali Yehova ne cifulo cakwe icikalamba ukuti: “Fyenu, mwe Yehova, ubukulu na maka no kuyemba no kupulama no bucindami; pantu fyonse ifya mu muulu ne fya pe sonde fyenu. Ubufumu bwenu, mwe Yehova, mwe bakulisha ukucila bonse. Ifyuma no bucindami fyabako pa mulandu wenu, kabili ni mwe muteka fyonse; kabili mu kuboko kwenu mwaba amaka no kukosa, kabili ukuboko kwenu kuti kwakusha no kupeela amaka kuli bonse.”

¹⁰ Yesu Kristu uubombela pamo na Yehova, alikwata icifulo icikalamba ku muulu kabili balimupeela na maka ayengi. Lesa “alengele ukuti fyonse fibe pe samba lya makasa ya kwa Kristu, kabili amulengele ukuba umutwe wa fintu fyonse ku cilonganino.” (Efes. 1:22) Umutumwa Paulo alandile pali Yesu ati: “Lesa na o alimusansabike kabili mu cikuuku amupeele ishina ilyacila amashina yonse, pa kuti mwi shina lya kwa Yesu ikufi lyonse lifukame ilya ba mu muulu ne lya ba pano isonde ne lya ba pa nshi ya calo, no lulimi lonse lusose apabuuta ukuti Yesu Kristu e Shikulu pa kuti Lesa Shifwe acindikwe.” (Fil. 2:9-11) Kanshi kuti twacetekela sana ubutungulushi bwa kwa Yesu Kristu ubwalungama.

¹¹ Kasesema Daniele amwene mu cimonwa Uwa Nshiku ne Nshiku naikala pa cipuna cakwe ica Bufumu na bamalaika “[1 milioni] abalemubombela, na bamalaika [100 milioni] nabeminina pa ntanshi yakwe.” (Dan. 7:10) Baibolo ilanda pali aba bamalaika ukuti “mipashi ya kubombela abantu, iyatumwa ku kubombela abakapusuka.” (Heb. 1:14) Aba bamalaika bonse baba mu mabumba ukulingana ne ‘fipuna fya bufumu, bumulopwe, amabuteko na maka.’—Kol. 1:16.

¹² Nga twatontonkanya pa fyo icilonganino ca kwa Yehova ica ku muulu caba, e lyo twingeshiba bwino icalengele Esaya apape ilyo amwene mu cimonwa “Yehova, naikala pa cipuna cakwe ica Bufumu icasumbuka” na “baserafi baiminine pa muulu wakwe.” Esaya atile: “We bulanda kuli ine! Pantu ndi fye ngo wafwa, pantu ndi muntu uwakowela imilomo, kabili njikala mu bantu abakowela imilomo; pantu amenso yandi nayamona Imfumu, Yehova wa mabumba, umwine!” Esaya alipapile nga nshi ica kuti ali-icefeshe ilyo aishibe ifyo icilonganino ca kwa Yehova cakula. Ifyo amwene fyalimufikile pa mutima ica kuti ilyo Yehova alefwaya uwa kuyabila ubupingushi bwakwe, Esaya atile: “E po ndi! Ntumeni.”—Esa. 6:1-5, 8.

¹³ Nga twaishiba bwino icilonganino ca kwa Yehova, no kulacimona ukuti calicindama, tukalacita nga filya fine Esaya acitile. Ilyo kwaba fimo ifya-aluka mu cilonganino ca kwa Yehova, tulaitemenwa ukwaluka. Tulesha na maka ukucita ifilanga ukuti twalicetekela sana icilonganino ca kwa Yehova.

ICILONGANINO CA KWA YEHOVA CILELUNDULUKA

¹⁴ Icipandwa 1 mwi buuku lya kusesema ilya kwa Esekiele, cilanda ukuti Yehova aliniina pe celeta ilikalamba ilya ku muulu. Ili iceleta limininako icilonganino ca kwa Yehova ica ku muulu. Yehova mu mampalanya e wensha ili iceleta pantu e utungulula icilonganino cakwe pa kuti afikilishe ubufwayo bwakwe.—Amalu. 103:20.

¹⁵ Cila mupeto wa ili iceleta walikwata umupeto uwaucilinganya, uwalingana na o. Ici e cilenga imipeto ‘ukuya ku mbali shine.’ (Esek. 1:17) Imipeto ilaaluka bwangu bwangu no kuya ku ntunga iili yonse. Lelo ici tacilolele mu kuti ili celeta talyakwata uulitungulula. Yehova taleka fye icilonganino cakwe ukulaitungulula. Pa kulanda pa mipeto ye celeta, Baibolo pali Esekiele 1:20 itila: “Konse uko umupashi wafwaya ukuti [imipeto] iye, e ko yaleya.” Kanshi Yehova e ulenga icilonganino cakwe ukuya uko umupashi wakwe wacitungulula. E ico, tufwile ukuyipusha atuti, ‘Bushe nyendela pamo ne cilonganino ca kwa Yehova?’

¹⁶ Ukubombela pamo ne cilonganino ca kwa Yehova tacipilibula fye ukusangwa mu kulongana no kubombako umulimo wa kubila imbila nsuma. Lelo icikalamba ico tufwile ukucita pa kulanga ukuti tulabombela pamo ne cilonganino ca kwa Lesa, kulalunduluka mu fya kwa Lesa. Tufwile ‘ukwishiba bwino bwino ifyacilapo ukucindama’ no kulaisambilisha lyonse ifya kwa Lesa. (Fil. 1:10; 4:8, 9; Yoh. 17:3) Tufwile no kulaibukisha ukuti, pa kuti ifintu file-enda bwino na pa kuti tube abaikatana, tufwile ukuba mu cilonganino icateyanishiwa bwino. Kanshi tufwile ukwishiba ukuti calicindama ukulakonka fyonse ifyo icilonganino ca kwa Lesa citusambilisha no kulabomfya bwino ifyo Yehova atupeela pa kuti tulebomba bwino umulimo wakwe. Nga tule-endela pamo ne celeta lya ku muulu ilya kwa Yehova, kuti tulecita ifintu ukulingana ne mbila nsuma iyo tubila.

¹⁷ Apo icilonganino ca kwa Yehova cilatwafwa, tulatwalilila ukucita ukufwaya kwa kwa Lesa. Muleibukisha ukuti uwensha ili iceleta lya ku muulu ni Yehova. E ico nga tule-endela pamo ne celeta lya ku muulu, ninshi tulelanga ukuti twalicindika Yehova kabili twalicetekela “Icilibwe” cesu. (Amalu. 18:31) Baibolo yatulaya ukuti: “Yehova akapeela abantu bakwe amaka. Yehova akapaala abantu bakwe pa kuti babe no mutende.” (Amalu. 29:11) Apo twaba mu cilonganino ca kwa Yehova, na ifwe Lesa alatukosha kabili twaliba no mutende uo Lesa apeela abantu bakwe abateyanishiwa. E ico, tatutwishika no kutwishika ukuti Yehova akatupaala nga twatwalilila ukucita ukufwaya kwakwe pali ino nshita e lyo na ku ciyayaya.