Ukuicefya no Bufuuke

7. Mulandu nshi tulingile ukubela abaicefya kabili abafuuka ilyo tulebombela Lesa?

⁷ Belengeni Abena Roma 12:3, 16.

Paulo na kabili atile: “Ifyo muletontonkanya pali mwe bene e fyo muletontonkanya na pali bambi.” Muli kalata imbi iyo umutumwa Paulo alembele, atufunda ukuti ‘twilakansana nelyo ukuibililika, lelo tuleicefya no kumona bambi ukuti balitucila.’ (Fil. 2:3) Pa kuti tulemona bamunyinefwe na bankashi ukuti balitucila muli fimo, tulingile ukuba abaicefya no kubombesha. Ukuicefya kukatucingilila pa kuti ‘twilaimona ukuti tuli ba mano.’ Nangu ca kutila imilimo bamo bapeelwa mu cilonganino ilalenga bacindikwa, ifwe bonse kuti twasanga insansa nga ca kutila ‘natuiceefya,’ kabili tulebombako imilimo iimoneka iishacindama kabili ilingi line iyo bambi bashingamona.—1 Pet. 5:5.