Bushe Muleibukisha?
Bushe mwali-ipakishe ukubelenga bamagazini ba Ulupungu lwa kwa Kalinda aba nomba line? Moneni nga kuti mwa-asuka aya mepusho:
• Bwafya nshi ubukalamba ubo Abena Kristu bamo bakwata ilyo baupana, kabili cinshi bafwile ukukosapo ukucita?
Abena Kristu bamo kuti basanga ukuti mu fintu ifingi tabapalana na bena mwabo. Apo balishiba ukuti icupo te kuti cipwile pa milandu ishalondololwa mu Baibolo, bafwile ukubombesha pa kuti basunge icupo cabo.—4/15, ibula 17.
• Mafya nshi Umwina Kristu uulesungilwa mu ng’anda basungilamo abakote engakwata?
Nalimo te kuti eshibe ukwabela icilonganino icibombela mu ncende umwaba ing’anda asungilwamo. Abantu aleikala na bo abasungwa pali iyi ng’anda kuti limbi bapepa ukwapusanapusana kabili limbi kuti bafwaya ukuti alepepela pamo na bo. Balupwa lwakwe Abena Kristu e lyo na ba mu cilonganino abamo bafwile ukwishiba amafya akwete kabili bafwile no kulamukoselesha e lyo no kulamusakamana.—4/15, amabula 25-27.
• Fintu nshi fine ifingaafwa umulume no mukashi ukupwisha amafya?
Ukusala inshita ya kulanshanya pa bwafya. (Luk. Mil. 3:1, 7) Ukulanda fyonse ifili ku mutima mu nshila ya mucinshi. (Efes. 4:25) Ukukutika ifilesosa umwina mwenu no kucindika ifyo aleyumfwa. (Mat. 7:12) Ukusuminishanya inshila ya kupwishishamo ubwafya, no kubombela pamo ukupwisha ubwafya. (Luk. Mil. 4:9, 10)—5/1, amabula 10-12.
• Ilyo Yesu atucincishe ukulapepa ati tulekeleleni imisha, misha nshi alelandapo?
Nga twalinganya Mateo 6:12 na Luka 11:4 tulesanga ukuti Yesu talelanda pa misha ya ndalama. Ico alelandapo ni membu. Tufwile ukuitemenwa ukwelela bambi nga filya fine Lesa atwelela.—5/15, ibula 9.
• Bushe aba mwi Bumba Litungulula babombela mu makomiti nshi?
Muli Komiti ya Bakampanya; Muli Komiti Isakamana Ababomba pa Bethel; Muli Komiti ya Kusabankanya; Muli Komiti ya Mulimo; Muli Komiti ya Kusambilisha; Muli Komiti ya Kulemba.—5/15, ibula 29.
• Kuti twaishiba shani ukuti Ilyeshi lya kwa Noa lyali fye isonde lyonse?
Yesu alishininkishe ukuti Ilyeshi e ko lyali no kuti lyali fye isonde lyonse. Ukusoka ukwaba mu Baibolo kwafuma pali filya ifyacitike pa Lyeshi ilyali fye isonde lyonse.—6/1, ibula 8.
• Bushe filya fyalondololwa pa Abena Roma 1:24-32, baYuda baleficita nelyo Bena Fyalo?
Ifyalondololwa pali ili lembo kuti fyakuma bonse babili abaYuda na bena Fyalo, lelo abo umutumwa Paulo alelandapo bena Israele balya abashalekonka Amafunde pa myaka iingi. Balishibe ifipope fyalungama ifya kwa Lesa, lelo tabalefikonka.—6/15, ibula 29.
• Ni kwi kwaba Tel Arad, kabili mulandu nshi ici cifulo cacindamina?
Ulu lupili lunono ulwa mu calo ca Israel apali umusumba wa kale uwa Aradi lwabela ku masamba ya Bemba Wafwa. Pali ulu lupili, abashula ifya kale balishulapo ifye bumba apo aba kale balembele. Pali ifi fine bashula pamo paba amashina ayasangwa na mu Baibolo, kabili palasangwa ne shina lya kwa Lesa. Ici cilenga twaishiba ukuti na bantu fye aba pali ilya nshita na bo balebomfya ishina lya kwa Lesa mu fyo balelemba.—7/1, amabula 23-24.
• Mulandu nshi ukucita ifyo twingakwanisha kulundilako insansa?
Nga tulelwisha ukucita ifintu ifyo tushingakwanisha ukucita te mulandu ne fyo twalwisha, ninshi tuleicusha fye. Lelo tatufwile na kabili ukukanabombesha no kulasosa ati apa pene fye e papelele amaka yandi e mulandu wine ndebombela fye panono mu mulimo wa kushimikila.—7/15, ibula 29.
• Cinshi cingalenga ukuti abafyashi balefilwa ukulanda na bana babo imisepela?
Fimo ifingalenga ni fi, kuti limbi umusepela wa nsoni sana, nelyo limbi alafwaya ubuntungwa bwa kulaicitila ifyo alefwaya, nelyo limbi kuti tafwaya bambi ukwishiba ifyo alecita. Abafyashi kuti balaumfwana na bana babo ukupitila mu kulanda na bo ilyo baleisha nelyo ilyo balecita ifintu fimbi. Ilyo balelanshanya na bo muli uyu musango kuti cawama abafyashi ukulailuka ifyo abana balelanda ne fyo baleyumfwa.—8/1, amabula 10-11.