Bushe Muleibukisha?

Bushe mwali-ipakishe ukubelenga bamagazini ba Ulupungu lwa kwa Kalinda abafumine nomba line? Nga mwalicitile fyo, moneni nga kuti mwayasuka amepusho yakonkapo:

• Ni lilali aba mano baile ku kumona Yesu?

Baibolo imo itila: “Aba mano tabaile ku kumona Yesu ubushiku bulya bwine afyelwe mwi tanga lya ng’ombe nga filya bakacema bacitile. Bailemumona ninshi palipita ne myeshi iingi.” Bailemwena Yesu ku ng’anda ninshi alikulako panono. (Mat. 2:7-11) Nga ca kutila aba mano baile kuli Yesu ubushiku afyelwe no kutwala golde ne fya bupe fimbi ifya mutengo, bushe Maria nga apeele fye ifyuni fibili ilyo aile kwi tempele pa numa ya nshiku 40?—1/1, ibula 31.

• Finshi abengi bengacita nga balefwaya ukuba ne nsansa?

Bamo kuti baipusha ukuti: ‘Bushe kuti nayangushako imikalile yandi?’ Amy alyangwishe imikalile yakwe. Alikwete indalama ishingi lelo tali ne nsansa. Aishileiluka ukuti pa mulandu wa kutemwisha incito ya muli cino calo, ali mupepi no kulufiwa ukufuma ku citetekelo. E ico, apingwilepo ukubika Ubufumu intanshi kabili alibombeleko na bupainiya. Amy atila: “Pali ino nshita naliba ne nsansa nga nshi ukucila ifyo nali ilyo nalepoosa inshita iikalamba ku ncito nalebomba.”—1/15, ibula 19.

• Finshi fingalenga banyinefwe bamo ukuba ne nsansa?

Banyinefwe abengi balengila incito. Bamo balengila incito pantu indalama sha kubomfya pa ng’anda shilacepa. Bambi bafwaya ukuti baleikwatila indalama sha kushitamo ifisuma ifyo balefwaya. Bambi nabo balomfwa bwino ukubomba incito baishiba. Abanakashi Abena Kristu balabomba umulimo wacindama pa ng’anda uwa kusakamana abana, maka maka ilyo bacili abaice. Banyinefwe bamo balipingulapo ukuleka incito nelyo ukulabomba incito ya kukanapoosa inshita iikalamba, ne ci calilenga ukuti babe ne nsansa.—2/1, amabula 28-31.

• Ni “nkulo” nshi Yesu alelandapo ilyo alandile amashiwi yaba pali Mateo 24:34?

Ilingi line, Yesu alebomfya ishiwi lya kuti “inkulo” nga alelanda na bantu babipa nelyo alelanda pa bantu babipa abaliko pa nshita ali pa calo. Ilyo Yesu alandile aya mashiwi, talelanda ku bantu ababipa nelyo pa bantu babipa abaliko pali ilya nshita, lelo alelanda na basambi bakwe abali no kusubwa no mupashi wa mushilo mu nshita fye iinono. E bali no kwiluka bwino bwino amashiwi yaba pali Mateo 24:32, 33. Kanshi, kuti twasondwelela ukuti inkulo Yesu alelandapo basambi bakwe abasubwa, abaliko mu nshita ya batumwa na babako muno nshiku mwine.—2/15, amabula 23-4.

• Ukulingana na Abena Galatia 3:24, bushe Amafunde yaishileba shani kafundisha?

Ilingi line kafundisha aleba musha uwacetekelwa, uwalesopa umwana umunono no kumucitila fyonse ifyo bawishi ba mwana balefwaya. E fyali na Mafunde, yalecingilila abaYuda ku fintu fyali no kubonaula pamo ngo kuupana na bena fyalo. Filya fine umulimo wa kwa kafundisha walepwa, e fyo na Mafunde yali, yabombele fye inshita iinono, ukufikila lintu Kristu aishile.—3/1, amabula 18-21.

• Ukulingana na Yakobo 3:17, mibele nshi tulingile ukukwata?

Pa kuba abasanguluka, tufwile ukukaana ifyabipa apo pene fye. (Ukute. 39:7-9) Na kabili tatufwile ukuba aba lubuli, aba cipyu, nelyo ukuba ne mibele ingalenga ukuti twilaumfwana na bambi. Kuti cawama ukuyipusha ukuti: ‘Bushe abantu banjishiba ukuti ndi muntu uucita umutende nelyo uupatanya bambi? Bushe libili libili ndapusana na bambi? Bushe ndafulwa bwangu nelyo bushe ilingi line ndakalifya bambi? Bushe ndangufyanya ukwelela bambi no kukanapampamina fye pa kuti ifyo ndefwaya e fyo bambi bacite?’—3/15, amabula 24-5.

• Cinshi Yesu aundapile umwaume impofu panono panono? (Marko 8:22-26)

Baibolo tayatweba bwino bwino icalengele. Nalimo ico Yesu acitile fi, ni co alefwaya ukuti uyu mwaume mpofu atendeke ukulamona panono panono. Yesu amundepe panono panono pantu alimulangulukileko.—4/1, ibula 21.