Mwinenuka mu Kucite Cawama
UMUTUMWA Petro akonkomeshe ukuti: “Mube ne myendele isuma mu bena fyalo.” (1 Petro 2:12) Ishiwi lya ciGriki ilyapilibulwa ukuti ‘iisuma’ lilosha ku cintu “icayemba, icawama, icacindama, icisuma sana.” Muno nshiku, cimoneka kwati teti cicitike abantu ukuba ne mibele isuma nelyo iyacindama. Lelo, abantu ba kwa Yehova mu cinkumbawile balitunguluka ilyo bakonka ukukonkomesha kwa kwa Petro. Na kuba, mu calo fye conse, baishibikwa pa mulandu wa myendele yabo isuma.
Ici cilamoneka sana nga twatontonkanya pa mafya tukwata muli shino “nshita shaibela ishayafya.” (2 Timote 3:1) Cila bushiku tuleeshiwa, kabili ukukaanya imikalile yesu iya Bwina Kristu kwaba fye konse. Kabinge, nelyo cingati amesho yambi yaba fye aya pa nshita iinono, yambi yatwalilila fye, no kulabipilako fye. Na lyo line, umutumwa Paulo akonkomeshe ukuti: “E ico twinenuka mu kucite cawama, pantu mu nshita yalinga tukalobolola nga tatutompweke.” (Abena Galatia 6:9) Lelo bushe kuti cacitika ukucite cawama no kutwalilila fye ifyo fine ilyo tulelolenkana na mesho yabipisha kabili aya mutatakuya?
Ifingatwafwa Ukucite Cawama
Ukuba ‘uwawama, umusuma sana kabili uwacindama’ kusanshamo umuntu wa mu kati, e kutila imibele ya mutima. Kanshi, ukuba ne mibele isuma ilyo tulelolenkana na mafya, takuishilako fye, lelo kwisako ilyo tulekonka amafunde yaba mu Baibolo cila bushiku no kuyabomfya mu mikalile yesu yonse. Finshi fimo ifingatwafwa? Moneni ifishinka fyakonkapo.
Beni no mutima wa kwa Kristu. Ukuicefya kulakabilwa pa kushipikisha ulufyengo. Umuntu uuituumika te lingi ashipikisha ulufyengo. Lelo, Yesu “aliiceefeshe kabili aishileba uwa cumfwila ukufika na ku mfwa.” (Abena Filipi 2:5, 8) Nga twamupashanya, ‘tatwakanake no kutompoka’ mu mulimo wesu uwashila. (AbaHebere 12:2, 3) Mu kuicefya, muleumfwila abalemutungulula mu cilonganino pa kubomba pamo na bo mu kuitemenwa. (AbaHebere 13:17) Mulemona bambi ukuti “balimucila,” kabili muleyangwa ifya banenu te kwangwa fye ifyenu.—Abena Filipi 2:3, 4.
Muleibukisha ukuti Yehova alimutemwa. Tufwile ukushininkisha ukuti Yehova “e ko aba no kuti aba kalambula wa bamufwaisha.” (AbaHebere 11:6) Alatusakamana mu cine cine kabili afwaya tukakwate umweo wa muyayaya. (1 Timote 2:4; 1 Petro 5:7) Ukulaibukisha ukuti tapali icili conse icingapwisha ukutemwa Lesa atutemwa kukatwafwa ukukanaleka ukucita icawama ilyo tuleeshiwa.—Abena Roma 8:38, 39.
Cetekeleni Yehova umupwilapo. Ukucetekela Yehova kwalicindama, maka maka lintu amesho yalemoneka ukuba aya mutatakuya nelyo ayengaleta imfwa. Tufwile ukucetekela Yehova umupwilapo ukuti takatuleke ‘ukweshiwa ukucila pa fyo twingashipikisha,’ lelo lyonse “akacita apa kufuminamo.” (1 Abena Korinti 10:13) Nga twacetekela Yehova, tukaba abashipa na lintu twalolenkana ne mfwa.—2 Abena Korinti 1:8, 9.
Beni no mute wa kupepa. Ipepo lya kufuma pa mutima lyalicindama. (Abena Roma 12:12) Inshila imo iyo tupalaminamo kuli Yehova kupitila mwi pepo lya kufuma pa nshi ya mutima. (Yakobo 4:8) Ukulingana ne fyatucitikila, twalisambilila ukuti “te mulandu ne co twalomba . . . , alatuumfwa.” (1 Yohane 5:14) Yehova nga asuminisha ica kwesha ukutwalilila ukwesha bumpomfu bwesu, tulomba amaka ya kutwafwa ukushipikisha. (Luka 22:41-43) Ipepo lilenga twaishiba ukuti tatwaba fweka, ukuti ilyo tuli na Yehova mupepi, lyonse fye tukacimfya.—Abena Roma 8:31, 37.
Imilimo Isuma—‘Ilenga Ukulumbanya no Mucinshi’
Lyonse fye, Abena Kristu bonse ‘balalengwa ubulanda ku fya kwesha fyalekanalekana.’ Na lyo line, tatufwile ‘kunenuka mu kucite cawama.’ Ilyo mwaba na mafya, mukakoshiwa nga mwaishiba ukuti icitetekelo cenu mu kupelako cikaba “ica kulenga ukulumbanya no bukata no mucinshi.” (1 Petro 1:6, 7) Shukileni ukupayanya konse ukwa ku mupashi uko Yehova apeela ukwa kukosha icitetekelo cenu. Ilyo mwakabila ukwafwiwa, kabiyeni ku bacemi, bakasambilisha kabili bampanda mano ababa mu cilonganino ca Bena Kristu. (Imilimo 20:28) Lyonse mulesangwa ku kulongana konse ukwa pa cilonganino, ‘ukutucincisha ku kutemwa kabili ku kubombe milimo isuma.’ (AbaHebere 10:24) Ukubelenga Baibolo cila bushiku ne sambililo lya pa lwenu, no kubomba lyonse mu mulimo wa Bwina Kristu fikamwafwa ukuba abalola lwa ku mupashi no kuba abakosa.—Amalumbo 1:1-3; Mateo 24:14.
Ilyo mulemona ifyo Yehova amutemwa na fintu amusakamana, e lyo mukacililako ukufwaisha ukuba “abapimpilile milimo isuma.” (Tito 2:14) Ibukisheni ukuti, “uwashipikisha ukufika na ku mpela, wene e ukapusuka.” (Mateo 24:13) E ico kanshi, pampamineni pa ‘kukananenuka mu kucite cawama’!
[Amashiwi pe bula 29]
Tufwile ukucetekela Yehova umupwilapo ukuti takatuleke ukweshiwa ‘ukucila pa fyo twingashipikisha,’ lelo ukuti lyonse “akacita na pa kufuminamo”
[Ifikope pe bula 30]
Ukuba abapamfiwa mu milimo ya ku mupashi kukatwafwa ukuipekanishisha amesho