Amapaalo ya Bufumu Kuti Yaba Yenu

UMUTUMWA wa Bwina Kristu Paulo alelanda bwino indimi shimo ishikalamba ishali mu kasuba kakwe. Amasomo akwete kuti yalingana na ya ku yuniversiti pali lelo. Alimwenenemo nga nshi mu busuma ne nsambu isha mwina Roma. (Imilimo 21:37-40; 22:3, 28) Ifyo asambilile nga fyalimulengele ukuba umukankaala kabili uwalumbuka. Lelo, atile: “Ifintu ifyali ifya bunonshi kuli ine, fyene nafitungo kuti kulufya pa mulandu wa kwa Kristu . . . kabili ntunga fyonse ubusali, ukuti inonke Kristu.” (Abena Filipi 3:7, 8) Mulandu nshi Paulo asosele aya mashiwi?

Paulo, uwaishibikwe kale nga Sauli umwina Tarsi kabili kalamata wa “bamo aba Nshila” asangwike uwasumina pa numa ya kumona icimonwa ca kwa Yesu wabuushiwa kabili uwacindamikwa. (Imilimo 9:1-19) Icacitikile Paulo mu nshila ya kuya ku Damaseke calimushinine sana ukuti Yesu ali e Mesia walaiwe, nelyo Kristu, kateka wa Bufumu bwalaiwe ubuleisa. Cayalwile sana imikalile ya kwa Paulo, nga fintu amashiwi yakwe mu paragrafu wa kubalilapo yalangilile. Mu mashiwi yambi tuleti, Paulo alilapiile pantu ali uwafumaluka kabili uwa mutima wa bufumacumi.—Abena Galatia 1:13-16.

Muli Baibolo, ishiwi lya kuti “ukulapila” ilipilibulwa ilingi line ukufuma kwi shiwi lya ciGriki ilipilibula “pa numa ya kwishiba” lyalipusana na “ukwishibila kabela.” E ico, ukulapila kusanshamo ukwalula imitontonkanishishe, imibele, nelyo ubuyo bwa umo, ukukaana inshila sha kale ukuti tashinonsha. (Imilimo 3:19; Ukusokolola 2:5) Paulo talekele cilya cacitike mu nshila ya kuya ku Damaseke ukutwalilila ukumucita kwati muntu uukuntukilwe fye nelyo uwawilwa no mupashi. Camulengele ukukutuluka ukuti imikalile yakwe iya ku kale ilyo ashilaishiba Kristu, yali ya fye. Ailwike no kuti, pa kunonkelamo mu bwishibilo bwakwe ubupya pa lwa kwa Kristu, afwile ukuwamye mibele yakwe.—Abena Roma 2:4; Abena Efese 4:24.

Ukwaluka Kwaletele Amapaalo

Kale, ifyo Paulo aishibe pa lwa kwa Lesa afisambilile sana sana ilyo ali mu cakaniko ca baFarise. Ifisumino fyabo fyasanshishemo amano ya pano nse ne fishilano ifingi. Pa mulandu wa kupata imipepele imbi, ukupimpa no kubombesha kwa kwa Paulo fyalilubene. Alelwisha Lesa nangu ca kutila alemona kwati alemubombela.—Abena Filipi 3:5, 6.

Pa numa ya kunonka ukwishiba kwine kwine pa lwa kwa Kristu no mulimo wakwe mu bufwayo bwa kwa Lesa, Paulo amwene ukuti alekabila ukusalapo bwino pa fintu fibili: Bushe atwalilile ukuba umuFarise no kutwalilila ukuipakisha icifulo no mucinshi, nelyo bushe ayalwile imikalile yakwe no kutendeka ukucita fyonse ifyalekabilwa pa kuti abishiwe kuli Lesa? Ku ca buseko, Paulo alisalile bwino, pantu atile: “Pantu nshili na nsoni ku mbila nsuma; pantu e maka ya kwa Lesa aya kupusushisha onse uutetekela, pa kubala ku muYuda, na ku mwina Hela pamo.” (Abena Roma 1:16) Paulo aishileba kabila wa mbila nsuma pa lwa kwa Kristu no Bufumu.

Imyaka iingi pa numa, Paulo aebele Abena Kristu banankwe ati: “Mwe ba bwananyina, ine ne mwine nshilingo kuti nimpoke ci cintu, lelo ncite cintu cimo, pa kulaba ifya ku numa, no kusupile fya ku ntanshi, nkonkelela ukulola ku buyo, ku mwaala wa bwite bwa mu muulu bwa kwa Lesa muli Kristu Yesu.” (Abena Filipi 3:13, 14) Paulo alimwenenemo mu mbila nsuma pantu aliitemenwe ukusha ifyalemutalusha kuli Lesa kabili asupile amabuyo yaleumfwana no bufwayo bwa kwa Lesa.

Cinshi Mwingacita?

Napamo ni nomba line fye mumfwile pa lwa mbila nsuma iya Bufumu. Bushe isubilo lya kwikala ku ciyayaya muli paradise lyalimuletela insansa? Mu cifyalilwa fye kuti lyamuletela insansa, pantu bonse twafyalwa no kufwaisha kwa kwikala no kuipakisha ubumi mu mutende no mutelelwe. Baibolo itila Lesa abike “nshita ya muyayaya”mu mitima yesu. (Lukala Milandu 3:11) Kanshi ca cifyalilwa fye kuli ifwe ukwenekela inshita lintu abantu bakekala ku ciyayaya mu mutende na mu nsansa. Kabili ici e caba Imbila nsuma iya Bufumu.

Lelo, pa kuti isubilo lyenu likafikilishiwe, mulekabila ukusokota no kwishiba icaba imbila nsuma. Umutumwa Paulo akonkomeshe ati: “Mulinge icabo kufwaya kwa kwa Lesa, icisuma kabili ica kutemuna kabili icapwililila.” (Abena Roma 12:2) E ico, ukupala Paulo, pa numa ya kunonka ukwishiba no kushilimuka, mufwile ukusalapo.

Na kabili, napamo paliba ifyo mwasuminamo pa lwa nshita ya ku ntanshi. Ibukisheni ukuti na Sauli alisumineko fimo pa lwa kwa Lesa ilyo ashilaba umutumwa Paulo. Lelo, ukucila ukwenekela Lesa ukumusokolwela fimo mu cipesha amano, cinshi mushingabeebeetela bwino ifishinka pali uyu mulandu? Ipusheni mwe bene amuti: ‘Bushe cine cine nalishiba ukufwaya kwa kwa Lesa ku bantu na kwi sonde? Fishinka nshi ningalanda ku kulangilila ukuti ifyo nasuminamo fya cine? Bushe nga twabebeta ifi fishinka kuti fyaumfwana na cintu Baibolo Icebo ca kwa Lesa isosa?’ Tapali ico mukaipusula nga mwabeebeeta ifisumino fya mipepele yenu muli iyi nshila. Na kuba, mufwile ukucite fyo pantu Baibolo itukoselesha ukuti: “Lingululeni fyonse, ikatisheni icawama.” (1 Abena Tesalonika 5:21) Na kuba, bushe te kusuminishiwa na Lesa tukabila?—Yohane 17:3; 1 Timote 2: 3, 4.

Bashimapepo kuti batulaya inshita ya ku ntanshi iya ciyayaya. Lelo, ubulayo nga tabufumine mu fisambilisho fya Baibolo, tabwakatwafwe ukunonka amapaalo ya Bufumu bwa kwa Lesa. Mu lyashi lyakwe ilyaishibikwa sana ilya pa Lupili, Yesu asokele ati: “Te onse uutila kuli ine, Shikulu, Shikulu, akengila mu bufumu bwa mu muulu iyo; kano uucite cifwaya Tata wa mu muulu.”—Mateo 7:21.

Moneni ifyo Yesu akomaila pa kucite cifwaya Wishi ukuti e cingalenga umo ukupokelela amapaalo ya Bufumu bwa kwa Lesa. E kuti, te lyonse icimoneka kwati ca bulesa cisuminishiwa na Lesa. Na kuba Yesu atwalilile ukusosa ati: “Abengi muli bulya bushiku bakatila kuli ine, Mwe Shikulu, mwe Shikulu, bushe tatwasesemene mwi shina lyenu? bushe tatwafumishe ifiwa mwi shina lyenu? bushe tatwacitile ifya maka ifingi mwi shina lyenu? Kabili e lyo nkasosa kuli bene, nkatila, Nshamwishiba nakalya; fumeni apa, mwe bacita amampuulu.” (Mateo 7:22, 23) Cailanga fye ukutila, icacindama kushininkisha ukuti twaumfwikisha bwino icaba imbila nsuma iya Bufumu e lyo no kucita ifileumfwana na yene.—Mateo 7:24, 25.

Ubwafwilisho e ko Bwaba

Inte sha kwa Yehova shalibilisha imbila nsuma pa lwa Bufumu bwa kwa Lesa pa myaka ukucila 100. Ukupitila mu mpapulo na mu kulanshanya fye na bantu, baleafwa abantu mwi sonde lyonse ukwishiba bwino bwino Ubufumu bwa kwa Lesa, amapaalo bukaleta, ne co umo alingile ukucita pa kunonka ayo mapaalo.

Tulemukoselesha ukwankula ku bukombe ubo Inte sha kwa Yehova shilebila. Nga mwapokelela no kucita ifileumfwana ne mbila nsuma, kuti mwapokelela amapaalo yakalamba te pali nomba fye lelo na ku ntanshi ilyo Ubufumu bwa kwa Lesa bukateka isonde lyonse.—1 Timote 4:8.

Bombesheni nomba, pantu amapaalo ya Bufumu bwa kwa Lesa nayapalama!

[Ifikope pe bula 7]

Ukupitila mu mpapulo na mu kulanshanya fye na bantu, Inte sha kwa Yehova shilebila imbila nsuma iya Bufumu bwa kwa Lesa