Ishibeni Ifyo Mufwile Ukwasuka

IFIPUSHO fimo fyaba nge libwe lya menshi makaasa ilileelela pali bemba. Pa muulu kuti lyamoneka ilinono lelo mu menshi muba icilibwe cikalamba ica menshi makaasa. Icilengele ico cipusho ilingi line calikakala nga nshi ukucila icipusho cine.

Nangu ni lintu uwipwishe alefwaisha icasuko, ukwishiba ifyo mufwile ukwasuka kuti kwasanshamo ukwiluka ubwingi bwa fyebo mukasosa e lyo ne fyo mwalalanda pa lwa uyo mulandu. (Yoh. 16:12) Nga fintu Yesu alangilile abatumwa bakwe, inshita shimo umuntu kuti alefwaya ukwishiba ifyebo ifyo ashikwete nsambu ya kwishiba nelyo ifishingamunonsha.—Imil. 1:6, 7.

Amalembo yalatufunda ayati: “Ilyashi lyenu libe pe ilya kusenamina, ilyalungwamo umucele, ukuti mwishibe ifyo mufwile ukwasuko muntu no muntu.” (Kol. 4:6) E ico, ilyo tushilayasuka, tulekabila ukutontonkanya pa fyo tuli no kusosa e lyo ne misosele yesu.

Ilukeni Umo Uleipusha Alemwena Ifintu

AbaSaduke baeseshe ukulenga Yesu ukusosa icintu ico bengamupelelapo umulandu ukupitila mu kumwipusha icipusho pa lwa kubuushiwa kwa mwanakashi uwaupilwe imiku iingi. Lelo, Yesu alishibe ukuti tabasumine mu kubuuka ku bafwa. E co pa kwasuka, ayaswike icipusho baipwishe mu nshila yabalungike na mu fyo balemone fintu pantu e calengele bepushe co cipusho. Yesu alipelulushenye na bo mu kulamuka no kulanda pa calembwa mu Malembo icaishibikwa bwino ukupitila mu kulondolola icintu cimo ico bashatalile abatontonkanyapo icali bushininkisho bwabula ukutwishika ubwa kuti Lesa cine cine akabuusha abafwa. Icasuko cakwe calipapwishe abalemulwisha ica kuti balitiinine ukumwipusha na fimbi.—Luka 20:27-40.

Pa kuti mwishibe ifyo mufwile ukwasuka, na imwe mufwile ukwiluka umo abaleipusha balemwene fintu ne fibasakamike. Ku ca kumwenako, untu musambilila nankwe ku sukulu atemwa untu mubomba nankwe kuti aipusha umulandu mushisefeshako Krisimasi. Mulandu nshi aipushisha? Bushe alefwaya fye ukwishiba umulandu mushisefeshako, nelyo alefwaya fye ukwishiba nga ca kuti mulasuminishiwa ukusangalalako inshita shimo? Pa kufwaya ukwishiba umo alosha, kuti mwaipusha icalenga epushe ico cipusho. Lyene mwasukeni ukulingana na muntu aloseshe. Kuti mwashukila ne yi nshita ukumulondolwela ifyo ukukonka ukutungulula kwa mu Baibolo kutucingilila ku fintu fimo ifyakuma Krisimasi ifyaletela bamo amafya no kubatwika ifisendo.

Tutile bamwita ukuyalanda pa lwa Nte sha kwa Yehova ku basambi ba pa sukulu. Pa numa ya kulanda, kuti bamwipusha amepusho. Nga ca kuti amepusho yaleumfwika ayafumaluka kabili aya kulungatika, ifyasuko fyayanguka ifya kulungatika e fingawama sana. Nga ca kuti mu mepusho muli ne mpatila yaseeka mu bwikashi, kuti cawama ukutala mwalondolola icalenga abantu ukulatontonkanye fyo pali iyo milandu e lyo no mulandu Inte sha kwa Yehova balekela Baibolo ukulabatungulula. Ilingi line, cisuma ukumona ayo mepusho ukuti e yasakamike abantu, te kuyamona ngo kusonsomba—te mulandu nga yacipushiwa mu nshila ya kusonsomba. Kanshi icasuko cenu ciba lishuko lya kulenga ibumba ukwishibilapo na fimbi, ukubeba ifyebo fyalungama, no kubalondolwela Amalembo apashimpwa ifisumino fyesu.

Kuti mwacita shani nga ca kuti umukalamba wa ncito talefwaya kumupeela cuti wa kuyasangwa kwi bungano? Intanshi, moneni ifintu mu nshila alefimwenamo. Bushe ukumweba ati mukaipeelesha ukwisabomba amaawala ayengi inshita imbi kuti kwalenga amupeele cuti? Bushe nga mwamulondolwela ukuti ukufunda kuba ku mabungano kulatwafwa ukuba ababomfi ba bufumacumi, abacetekelwa, kuti amupeela cuti? Nga mwamulanga ukuti namwangwa ku fyo alefwaya, napamo na o kuti atontonkanyapo bwino pa fyo eshibe ukuti naficindama kuli imwe. Lelo ni shani nga alefwaya mucite icintu cimo ica kufutika? Ukukaana fye mu kulungatika no kubikapo Ilembo kuti kwalenga eshibe apo mwaiminina. Lelo bushe teti ciwame ukupelulushanya nankwe intanshi ukuti umuntu uwingabepa ubufi nga mwamweba ukubepa kuti aisamubepa na imwe inshita imbi, nelyo uo mwatuma ukumwibilako kuti aisamwibila na imwe inshita imbi.

Lubali lumbi, napamo uli musambi wa pa sukulu kabili taulefwaya ukucitako fimo ku sukulu pantu fyapusana ne fyo amalembo yasosa. Ibukisha ukuti kafundisha napamo tasumina mu fyo wasuminamo, kabili ni ncito yakwe ukusalapula aba mu kalasi. Ubwafya ukwete ni ubu, (1) ukwangwa ku fimusakamike, (2) ukumulondolwela mu mucinshi umulandu ushacitileko ifyo fintu, na (3) ukukanatela pa fyo wishibe ukuti e fili no kusekesha Yehova. Pa kuti ifi fyumfwike bwino bwino, napamo ulekabila ukulondolola ifingi ukucila ukulanda fye pa fyo wasuminamo. (Amapi. 15:28) Nga uli mwaice, ukwabula ukutwishika bawiso atemwa banoko bakakwafwa ukupekanya ifya kusosa.

Inshita shimo, napamo kuti cakabilwa ukuti musuushe imilandu bamupeele ku balashi. Napamo kapokola, umulashi wa buteko, atemwa kapingula wa mu cilye kuti afwaya ukuti mwasuke amepusho pa lwa kumfwila amafunde yamo yamo, umulandu imwe nga Abena Kristu mushiipoosela mu milandu ya calo, nelyo ifyo mumona ukuipoosa muli fimo ifilangisha ukuti umuntu alitemwishe calo cakwe. Bushe mulingile ukwasuka shani? Baibolo ifunda ati, asukeni “no bufuuke na katiina.” (1 Pet. 3:15) Kuti mwaipusha mwe bene ico iyi milandu ibasakamikile, kabili mu mucinshi suminisheni ukuti cine cine kuti yabasakamika. Cinshi ica kukonkeshapo? Umutumwa Paulo alandile pa nsambu ifunde lya ciRoma lyamupeele, na imwe kuti mwalanda pa nsambu ifunde lipeela pa co mulecita. (Imil. 22:25-29) Napamo ukulanda pa fyo Abena Kristu ba kubangilila balecita pali yo milandu ne fyo Inte sha kwa Yehova mwi sonde lyonse shicita kuti kwayafwa umulashi ukumfwikisha bwino. Nelyo kuti mwalondolola ifyo ukwishiba amaka ya kuteka aya kwa Lesa kulenga abantu ukulaumfwila sana amafunde ya bantunse ayalinga. (Rom. 13:1-14) Pa numa ya kulande fyo, nga mwalundapo umulandu wa mu Malembo uo mukonka, napamo kuti bakutika.

Ifyo Uleipusha Amona Amalembo

Ilyo muletontonkanya ifya kwasuka, kuti mwafwaya no kutontonkanya pa fyo uleipusha amona Amalembo ya Mushilo. E fyo Yesu acitile pa kwasuka abaSaduke ilyo baipwishe pa lwa kubuuka ku bafwa. Pa kwishiba ukuti basumine fye mu fyalembele Mose, Yesu apelulushenye na bo pa fyalembelwe mu mabuuku ya kwa Mose, no kutendeka na mashiwi ya kuti: “Awe na Mose alangile . . . ukuti abafwa balabuushiwa.” (Luka 20:36, 37) Na imwe kuti mwasanga ukuti kuti cawama ukwambula mu fiputulwa fya mu Baibolo ifyo komfwa wenu asuminamo kabili ifyo abelesha.

Ni shani nga ca kuti komfwa wenu tacetekela Baibolo? Moneni ico umutumwa Paulo acitile ilyo alelanda pa Areopagi, nga fintu calembwa pa Imilimo 17:22-31. Alandile pa cine ca mu Malembo ukwabula ukwambula mu kulungatika ukufuma mu Baibolo. Nga cakabilwa, na imwe e fyo mwingacita. Mu ncende shimo, ilyo mushilatwala uyo muntu mu kulungatika kuli Baibolo, kano mwalanshanya nankwe imiku iingi. Ilyo mwamutwala kuli Baibolo, kuti cawama intanshi ukumulondolwela fye umulandu cawamina ukumona ifyabamo, ukucila fye ukumweba mu kulungatika ati yaba Cebo ca kwa Lesa. Lelo ubuyo bwenu bulingile ukuba ubwa kushimika ubunte bwaumfwika pa lwa bufwayo bwa kwa Lesa, na mu kupita kwa nshita, ukuleka komfwa wenu aimwene cintu Baibolo isosa. Baibolo ilanashanasha ukucila icili conse ico ifwe twingasosa.—Heb. 4:12.

“Libe Pe Ilya Kusenamina”

Fintu caba bwino ukuti ababomfi ba kwa Yehova, uwa kusenamina, na bo baebwa ukuleka ilyashi lyabo ukuba “pe ilya kusenamina, ilyalungwamo umucele”! (Kol. 4:6; Ukufu. 34:6) Ici calola mu kuti tufwile ukulanda ne cikuuku, nangu pamoneka kwati icikuuku tacilingile. Imilandile yesu ilingile ukuba iisuma, te yakamuka nelyo iyapama.

Abantu abengi balatitikishiwa nga nshi, kabili cila bushiku balapontelwa. Ilyo twatandalila abantu ba musango yo, kuti limbi batusasukila. Kuti twacita shani? Baibolo itila: “Ukwasuka ukwafuuka kubweshe cipyu.” Ukwasuka kwa musango yo kuti kwanasha no ulefwaya ukusuusha. (Amapi. 15:1; 25:15) Nga twaba ne cikuuku no kulanda mwi shiwi lya cikuuku ku bantu abakalipilwa fye cila bushiku, kuti batemwa nga nshi ica kuti napamo kuti baumfwa na ku mbila nsuma tubatwalile.

Tatufwaya ukukansana na bashacindika icine. Lelo tufwaya ukupelulushanya ifya mu Malembo na bantu abengasumina ukupelulushanya na bo. Nangu tukasange ifyayafya shani, tulebukisha ukuti tufwile ukwasuka ne cikuuku no kushininkisha ukuti ifilayo fyawamisha ifya kwa Lesa fikacitika nangu cibe shani.—1 Tes. 1:5.

Imilandu ya pa Lwenu ne Ilesanshamo Kampingu

Nga ca kuti umusambi wa Baibolo atemwa uwasumina munenu aipusha ico engacita pa mulandu umo, kuti mwayasuka shani? Napamo pa lwenu namwishiba ico mwingacita. Lelo umuntu no muntu afwile ukushingamwa ne fyo apingula umwine mu bumi. (Gal. 6:5) Umutumwa Paulo alondolwele ukuti akoseleshe abo aleshimikilako ukuba ne “cumfwila ku citetekelo.” (Rom. 16:26) Ico cisuma ukupashanya. Umuntu upingula pa kuti fye atemune umusambilisha Baibolo nelyo ukutemuna umuntu umbi ninshi alebombela abantu, taleikalila mu citetekelo. (Gal. 1:10) E co icasuko cayanguka, ica kulungatika te kuti cafwe sana uleipusha.

Kanshi kuti mwayasuka shani mu nshila ileumfwana no butungulushi bwa mu Baibolo? Kuti mwamweba ifishinte fya mu Baibolo fimo ne fya kumwenako ifya mu Baibolo. Inshita shimo, kuti mwamusambilisha ifya kusapika pa kuti aisangile umwine ifyo fishinte ne fya kumwenako. Kuti mwalanshanya na pali fyo fishinte no bucindami bwa fya kumwenako lelo ukwabula ukufyampanya ku co epwishe. Mwipusheni nga alemona ifyo fishinte ne fya kumwenako nge fingamwafwa ukupingulapo mano mano. Mukoselesheni ukufitontonkanyapo pa kuti amone inshila ingatemuna Yehova. Ifyo ninshi mulemwafwa ‘ukukansho kulingulula kwakwe pa kupaatululo busuma ukubulekanya no bubi.’—Heb. 5:14.

Ukwasuka pa Kulongana kwa Cilonganino

Ukulongana kwa cilonganino ca Bwina Kristu ilingi kulatupeela amashuko ya kulumbula kwa kutetekela kwesu. Inshila imo tucitilamo fyo yaba kupitila mu kwasukapo. Bushe tulingile ukwasuka shani? Imyasukile ilingile ukumfwika ukuti tulefwaisha ukucindika Yehova, nelyo ukusose fisuma pali wene. E fyo kemba wa malumbo Davidi acitile ilyo ali “mu nkuta.” (Amalu. 26:12) Tulingile no kwasuka mu nshila ya kukoselesha abasumina banensu, ukubacincimushisha “ku kutemwa kabili ku kubombe milimo isuma,” nga fintu Paulo acincishe. (Heb. 10:23-25) Ukupekanishisha kabela ifya kuyasambilila kukatwafwa ukwasuka muli yo nshila.

Ilyo bamusonta ukuti mwasukepo, icasuko cenu cifwile ukuba icayanguka, icaumfwika, kabili icipi. Mwilanda fyonse ifili mu paragrafu; landeni fye pa cishinka cimo. Nga mwayasuka fye ulubali lumo ulwa casuko, cili no kupeelako bambi ishuko lya kwasukapo. Cisuma sana ukulanda pa malembo yaloshiweko aya muli fyo fyebo. Ilyo mulelanda pa malembo, esheni ukulanda pa lubali lwe lembo ulwampene ne cishinka cilelandwapo. Sambilileni ifya kwasuka mu mashiwi yenu ukucila ukubelenga fye ifili mu paragrafu. Mwifuupulwa nga ca kuti tamwaswike mu kulungatika. Ico mu nshita mu nshita cilacitikila bonse abasukapo.

Caumfwika kanshi ukuti ukwishiba ifyo tufwile ukwasuka te kwishiba fye icasuko iyo. Cikabila ukwiluka. Lelo nga ca kuti icasuko cafuma ku mutima kabili cafika bambi pa mitima, awe kuti mwaumfwa na bwino!—Amapi. 15:23.