Amepusho Ukufuma ku Babelenga

Mulandu nshi Paulo alembele ulwa mukashi uwa Bwina Kristu ukuti: “Akapokololwa mu kufyala abana”?—1 Timote 2:15.

Bushe ilyashi Paulo alelandapo lilanga ukuti amashiwi alandile muli ici cikomo yalola mwi? Pa kutungululwa no mupashi wa mushilo, Paulo alefunda abanakashi ba Bwina Kristu pa mulimo bakwata mu cilonganino. Alembele ati: “Ndefwaya abanakashi ukufwala bafwale ukuyene, pamo no bufuuke na mano ayatuntulu, beipulamikila imishishi iyalukwa, na golde nangu ni bamargariti nelyo ica kufwala ca mutengo sana, lelo mu nshila iyayana abanakashi abatila tutiina Lesa, ukupitila mu milimo isuma.” (1 Timote 2:9, 10) Paulo alekoselesha bankashi ba Bwina Kristu ukuba abatekanya, ukulasala bwino ifya kufwala, no kuti babe ‘abapulama’ ku kubombe milimo isuma.

Lyene, Paulo alondolwele ifyo bumutwe bwatantikwa mu cilonganino ilyo atile: “Nshilesuminisha umwanakashi ukusambilisha, nelyo ukutungulula umwaume, lelo ukuba tondolo.” (1 Timote 2:12; 1 Abena Korinti 11:3) Alondolola ne calengele ukuti ifintu fitantikwe muli uyo musango ilyo atile, Adamu tabepelwe kuli Satana, lelo Efa ena “e wabeepelwe umupwilapo no kuwila muli bumpulamafunde.” Bushe umwanakashi Umwina Kristu kuti aicingilila shani ku kukanacita ifyacitile Efa? Paulo ayasuka ati: “Lelo, akapokololwa mu kufyala abana, kulila fye batwalilila mu citetekelo no kutemwa no kushila pamo na mano ayatuntulu.” (1 Timote 2:14, 15) Bushe aya mashiwi Paulo alandile yalola mwi?

Bakapilibula bamo bapilibula ici cikomo mu musango uulenga caumfwika kwati aya mashiwi yalola mu kuti, umwanakashi pa kuti akapusuke, kano akwata abana. Ku ca kumwenako, Baibele wa Mushilo uwa mu 1956 atila: “Abanakashi bakapusushiwa mu kufyala abana.” Lelo kwena ifi, te fyo aya mashiwi ya kwa Paulo yapilibula. Amalembo ayengi yalangilila ukuti pa kuti umuntu apusuke, alekabila ukwishiba Yehova, ukusumina muli Yesu, no kuba ne citetekelo, kabili afwile ukulanga icitetekelo cakwe pa kubomba imilimo. (Yohane 17:3; Imilimo 16:30, 31; Abena Roma 10:10; Yakobo 2:26) Kabinge, Paulo talelosha mu kuti abanakashi ba Bwina Kristu bena tabakulaba no bwafya pa kupaapa iyo. Pantu abanakashi balapusuka pa kupaapa, babe Bena Kristu nelyo iyo. Kabili ku ca bulanda, bambi na bo balafwa pa kupaapa, babe Bena Kristu nelyo iyo.—Ukutendeka 35:16-18.

Icingatwafwa ukumfwikisha umo Paulo aloseshe ilyo alefunda balya banakashi, mashiwi yakonkapo muli kalata imo ine. Asoka bamukamfwilwa bamo abakashana ‘abashaba ne fya kucita, abaseuluka fye mu mayanda; awe tababulwa fye ifya kucita, lelo baba aba mulomo kabili abaipoosa mu fishibakumine, abalande ifyo bashifwile kulanda.’ Bushe Paulo alefwaya ukuti aba banakashi balecita cinshi? Atwalilila ukuti: “E ico ndefwaya bamukamfwilwa abakashana ukuupwa no kufyala abana, ukusakamana amayanda yabo, ukukanapeela kakaanya apa kutupontelela.”—1 Timote 5:13, 14.

Paulo alondolola umulimo wacindama uo umwanakashi alingile ukubomba pa ng’anda. Nga ca kuti umwanakashi ‘alefyala abana no kulasakamana ing’anda yakwe,’ kabili atwalilila “mu citetekelo no kutemwa no kushila pamo na mano ayatuntulu” te kuti alecita ifintu ifishikuulilila iyo. Ubwina Kristu bwakwe bukasungililwa nelyo ‘bukapokololwa.’ (1 Timote 2:15) E ico abanakashi abengi kuti basengauka ifiteyo fya kwa Satana, nga ca kuti baumfwila uku kufunda.

Aya mashiwi Paulo alembeele Timote yalafwa bonse, abaume na banakashi ukubomba imilimo iisuma. Icebo ca kwa Lesa cikoselesha Abena Kristu bonse fye ukuti: “Cenjeleni ukuti ukwenda kwenu takuli ngo kwa bawelewele iyo kano nga ba mano.”—Abena Efese 5:15.