Amepusho Ukufuma ku Babelenga
Muli kalata umutumwa Paulo alembele AbaHebere, alilandile pa “kubikapo iminwe.” Bushe alelanda pa kusonta baeluda nelyo alelanda fye pali fimbi?—Heb. 6:2.
Te kuti tulande mu kulungatika ico Paulo alelandapo, lelo afwile alelanda pali filya balebika iminwe pa muntu pa kumupeela ifya bupe fya mupashi.
Kwena Baibolo yalilanda ukuti kale balebika iminwe pa muntu pa kumupeela imilimo ya kubomba mu mulimo wa kwa Yehova. Mose ‘alibikile iminwe yakwe pali’ Yoshua ilyo amusalile ukuti aletungulula abena Israele. (Amala. 34:9) Na mu cilonganino ca Bena Kristu, pa kusala abaume bamo abafikilepo ukusambilisha, balebika iminwe pali bena. (Imil. 6:6; 1 Tim. 4:14) Paulo acinkwileko Timote ukuti tali na kwangufyanya ukubika iminwe pa muntu.—1 Tim. 5:22.
Na lyo line, Paulo akonkomeshe Abena Kristu abaHebere ukuti apo balishile “amasambililo ya kutendekelako,” balingile ‘ukubombesha ukulola ku bukalamba.’ Lyena alandile pa masambilisho ya “kulapila ku milimo ya fye, na ya pa citetekelo kuli Lesa, ukusambilisha ifya lubatisho, no kubikapo iminwe.” (Heb. 6:1, 2) Bushe ukufwaya ukusontwa ukuba eluda e kwingalenga fye Abena Kristu ukubombesha ukulola ku bukalamba? Awe nakalya. Abo basonta ukuba baeluda Bena Kristu abakalamba ku fya kwa Lesa kabili nga basontwa bafwile ukucindika umulimo wa bukangalila.—1 Tim. 3:1.
Lelo kwaliko na cimbi ico balebikila iminwe pa bantu. Mu nshita ya batumwa, Yehova alikeene abena Israele no kutendeka ukupaala icilonganino ca Bena Kristu abasubwa. (Mat. 21:43; Imil. 15:14; Gal. 6:16) Ifya bupe umupashi wabapeele ifya kucita ifipesha amano, pamo ngo kulanda indimi shimbi, e fyalelanga ukuti Yehova nomba alepaala icilonganino ca Bena Kristu. (1 Kor. 12:4-11) Ilyo Koneli na ba mu ng’anda yakwe baishileba Abena Kristu, balipokelele umupashi wa mushilo, kabili ‘ukulanda indimi shimbi’ e kwalangile fyo.—Imil. 10:44-46.
Limo limo, abantu balepokelela ifya bupe fya kucita ifipesha amano nga ca kuti abatumwa babika iminwe pali bena. Lintu Filipi aleshimikila imbila nsuma mu Samaria, abengi balibatishiwe. Ibumba litungulula lyalitumine umutumwa Petro no mutumwa Yohane ku Samaria. Mulandu nshi babatumine kulya? Baibolo itila: “Awe [Petro na Yohane] babikile iminwe yabo [pa bantu ababatishiwe], na bo batendeke ukupokelela umupashi wa mushilo.” Ababatishiwe bafwile balipokelele ifya bupe fya mupashi, e kutila amaka ya kucita ifipesha amano. Umulandu twasosela ifi wa kuti Simone, uwalecita ifinjelengwe kale, alimwene uko umupashi walengele ababatishiwe ukulacita ifipesha amano kabili afwaile ukupeela abatumwa indalama pa kuti bamupeeleko amaka ya kubika iminwe yakwe pali bambi pa kuti balepokelela umupashi wa mushilo uwali no kulenga balecita ifipesha amano. (Imil. 8:5-20) Lintu papitile inshita, abantu 12 abaleikala mu Efese balibatishiwe. Baibolo itila: “Ilyo Paulo ababikilepo iminwe, umupashi wa mushilo waishile pali bena, kabili batendeke ukulandila mu ndimi no kusesema.”—Imil. 19:1-7; linganyeniko 2 Tim. 1:6.
Kanshi pa AbaHebere 6:2, Paulo afwile alelanda pa kubika iminwe pa basumine pa kuti bapokelele ifya bupe fya mupashi.