Citeni Icisuma no Kwafwa Bambi

¹ Dorka “aiswilemo imilimo isuma ne fya nkumbu.” (Imil. 9:36, 39) Bukapekape bwakwe bwalengele ukuti atemwikwe ku bantu abamwishibe na kuli Yehova Lesa. Pa AbaHebere 13:16 patila: “Mwilaba ukucita icisuma no kupeelana ifintu, pantu amalambo aya musango yu e yateemuna Lesa.” Pali nomba, kuti twacita shani ifintu fisuma no kwafwa bambi?

² Inshila imo iyo twinganonseshamo bambi ni pa kubapeelako ‘ifyuma’ fyesu. (Amapi. 3:9) Imisangulo tupeela ku mulimo wa mwi sonde lyonse ilalenga ukuti Amayanda ya Bufumu, ifikuulwa umwa kulonganina ukulongana kukalamba, na maofesi ya misambo mwi sonde lyonse yakuulwe. Bukapekape bwesu bwalilenga abantu abengi ukunonkelamo mu masambililo ya bulesa no kubishanya kwa ku mupashi ukwa kukuulilila.

³ Sansamusheni Bambi: Ilyo kwabako utuyofi, Inte sha kwa Yehova balaiteyanya ‘ukubomba icisuma’ ku basumina banabo e lyo na ku bashasumina. (Gal. 6:10) Pa numa ilyo fakitare ya kupangilamo imiti yakalipisha yapuulike mu France, abaupana babili abaleikala lwa mupepi na fakitare batile: “Bamunyinefwe balitwafwile mu kwangufyanya. Batwafwile ukuwamya amayanda yesu na ya bambi. Abena mupalamano besu balipapile ukumona uko abantu abengi baishile ku kutwafwa.” Nkashi umbi nao atile: “Baeluda balitwafwile. Balitukoseleshe. Na kuba, ici e co twalekabila, ukucila napa kwafwa kwa ku mubili.”

⁴ Nangu cingatila kwaliba inshila ishingi isho twingacitilamo icisuma ku bena mupalamano, inshila yacilishapo ubusuma twingabafwilamo ku basambilisha icine icauma umutengo, icisanshamo “isubilo lya bumi bwa muyayaya” ubo Yehova umwine alaya. (Tito 1:1, 2) Ubukombe bwaba mu Baibolo bulapeela icisansamushi ca cine cine kuli abo abaloosha pa filecitika mu calo na pa lubembu lwabo. (Mat. 5:4) Shi natucite icisuma no kwafwa bambi ilyo tuli na maka ya kucite fyo.—Amapi. 3:27.