² Umutumwa Petro alembele ukuti: “Ubushiku bwa kwa Yehova bukesa ngo mupuupu, ilyo imyulu ikapita waa, lelo ifintu ilyo fikakaba se fikasunguluka, ne sonde ne milimo iyabamo fikasokoloka.” (2 Pet. 3:10) Bushe “imyulu” ne “sonde” ifyalumbulwa muli ili lembo ni finshi? Bushe “ifintu” ifikasunguluka na fyo ni finshi? Kabili ni mwi Petro aloseshe ilyo atile “isonde ne milimo iyabamo fikasokoloka”? Ukwishiba ifyasuko kuli ifi fipusho, kwalatwafwa ukuipekanya ilyo tulelolela ifintu fya kutiinya ifili no kucitika nomba line.

Imyulu ne Sonde Ifili no Kupita

3. “Myulu” nshi yalumbulwa pali 2 Petro 3:10, kabili ikapita shani?

³ Baibolo nga yatila “imyulu,” ilingi line ninshi ilelanda pali bakateka, ababa apasansama ukucila abantu bateka. (Esa. 14:13, 14; Ukus. 21:1, 2) Kanshi ‘imyulu iikapita,’ mabuteko ya bantu ayateka cino calo cabipa. Ukupita “waa” nangu ukupita “ne cibulumo cikalamba,” nga fintu Baibolo imbi isosa, kuti capilibula ukuti iyi myulu ikonaulwa mu kwangufyanya.

4. Bushe “isonde” cinshi, kabili likonaulwa shani?

⁴ “Isonde,” bantu ba muli cino calo abataluka kuli Lesa. Abantu ba musango yu e ko bali na mu nshiku sha kwa Noa kabili Yehova apeele icipope ca kuti bonaulwe ku Lyeshi. Baibolo itila: “Lelo kwi shiwi limo line imyulu ne sonde ifya nomba fyasungilwa umulilo kabili fyasungilwa ubushiku bwa bupingushi kabili ubwa konaula abantu abashipepa.” (2 Pet. 3:7) Ilyeshi lyaonawile abantu abashalepepa bonse pa muku umo fye, lelo mu “bucushi bukalamba” ubuleisa, ubonaushi bukacitika mu fiputulwa. (Ukus. 7:14) Mu ciputulwa ca kubalilapo ica bucushi bukalamba, Lesa akalenga bakateka ba muli cino calo ukonaula “Babiloni Mukalamba,” ne ci cikalanga ifyo Lesa apata uyu cilende wa fya mipelele. (Ukus. 17:5, 16; 18:8) Lyena mu nkondo ya Armagedone, iikaba iciputulwa ca kulekeleshako ica bucushi bukalamba, Yehova umwine akafumyapo icalo ca kwa Satana conse fye.—Ukus. 16:14, 16; 19:19-21.

“Ifintu . . . Fikasunguluka”

5. Pa fintu ifikasunguluka paba finshi?

⁵ Bushe “ifintu” “ifikasunguluka” ni finshi? “Ifintu” ifyo Petro alandilepo, ni fyonse ifilenga aba muli cino icalo ukuba ne mibele, imicitile e lyo na mapange yashili ya bukapepa. Pali ifi “ifintu” paba no “mupashi uwa ici calo,” “ubomba mu bana bacintomfwa.” (1 Kor. 2:12; belengeni Abena Efese 2:1-3.) Uyu mupashi, waba fye konse konse mu calo ca kwa Satana. Ulenga abantu ukulatontonkanya, ukuba na mapange, ukulanda, no kucita ifintu mu nshila iilanga ukutontonkanya kwa kwa Satana, “kateka wa bufumu bwa mu lwelele,” uwa cilumba kabili uwatalama.

6. Bushe umupashi wa ici calo umonekela muli finshi?

⁶ E ico abakwata umupashi wa calo balaleka Satana asonga ukutontonkanya kwabo ne mitima yabo ica kuti balatontonkanya nga ena no kukwata imibele akwatako. Limo baleshiba e lyo limo tabeshiba no kuti balesongwa na Satana. Ne ci cilenga balacita fye ifyo balefwaya ukwabula no kutontonkanya pa kufwaya kwa kwa Lesa. Icilumba no kuitemwa e fibatungulula muli fyonse ifyo bacita. Balalanga umupashi wa bucipondoka ku baletungulula, e lyo kabili balakonkelela sana “ulunkumbwa lwa mubili no lunkumbwa lwa menso.”—Belengeni 1 Yohane 2:15-17.a

7. Mulandu nshi tufwile ‘ukusungila umutima’ wesu?

⁷ Kanshi nacicindama sana ukuba na mano ilyo tulesala aba kwangala nabo, ifya kubelenga, ifya kutamba, na lintu tulebomfya Intaneti, pa kuti ‘tulesunga umutima’ wesu. (Amapi. 4:23) Umutumwa Paulo alembele ukuti: “Cenjeleni: epali umuntu amuteka ubusha ku mano ya buntunse no bucenjeshi ukulingana ne ntambi sha bantu, ukulingana ne fintu fya fye ifya muli ici calo kabili te kulingana na Kristu.” (Kol. 2:8) Tufwile ukwangufyanya ukumfwila ico cipope ilyo ubushiku bwa kwa Yehova bulepalama, pantu ‘ukukaba’ kwa buko kukasungulula “ifintu” fya mu calo ca kwa Satana, cikamoneke no kuti fintu ifingapya ku mulilo. Ici citwibukishako amashiwi yaba pali Malaki 4:1 ayatila: “Ubushiku buleisa ubulepya nge lungu lya mulilo, kabili bonse aba mataki na bonse abacita ifyabipa bakaba nge mpimbili. Kabili ubushiku ubuleisa bukabonaula.”

“Isonde ne Milimo Iyabamo Fikasokoloka”

8. Bushe icalo ne milimo iyabamo “fikasokoloka” shani?

⁸ Ni mwi Petro aloseshe ilyo alembele ukuti “isonde ne milimo iyabamo fikasokoloka”? Aloseshe mu kuti mu bucushi bukalamba, Yehova akasokolola imilimo ya mu calo ca kwa Satana, no kulanga ukuti calelwisha ena no Bufumu bwakwe, kanshi cifwile ukonaulwa. Ilembo lya kwa Esaya 26:21 lyalisobele icikacitika aliti: “Yehova aleisa ukufuma ku cifulo cakwe ku kulubulwisha abekashi ba mu calo pa membu shabo isho bacita kuli ena, kabili icalo cikasokolola umulopa wasuumiwa pali cena kabili tacakafise abaipaiwa ba ciko.”

9. (a) Finshi tufwile ukutalukako, kabili mulandu nshi? (b) Mibele nshi tufwile ukukwata, kabili mulandu nshi?

⁹ Mu bushiku bwa kwa Yehova, bonse abakonkelela icalo ca kwa Satana no mupashi wa ciko uwabipa, imibele yabo ikeshibikwa bwino bwino, pantu bakalaipayana no kwipayana. Na kuba, nalimo ifya kutambatamba ifya lukaakala ifiseekele pali lelo, filelenga fye abengi babeleshe ifyo bakesacita ku ntanshi ilyo “ukuboko [kwa muntu no muntu] kukemina ukuboko kwa munankwe.” (Seka. 14:13) Kanshi nacicindama ukuti tuletaluka ku cili conse, pamo nga amafilimu, ifitabo, ifyangalo fya pa vidio, na fimbipo, ifingalenga twakwata imibele iyo Lesa apata, pamo nga icilumba no kutemwa ulukaakala! (2 Sam. 22:28; Amalu. 11:5) Kanshi natube ne fisabo fya mupashi wa kwa Lesa, pantu fyena fikalenga twikapya ku mulilo wa mampalanya.—Gal. 5:22, 23.

Ipekanyeni Ilyo Mulelolela Ubushiku Ubukalamba Ubwa kwa Yehova

12. Mulandu nshi ubushiku bwa kwa Yehova bukatulumushisha aba ku calo?

¹² Paulo na Petro basobele ukuti ubushiku bwa kwa Yehova buli no kwisa “ngo mupuupu,” lilya abantu bashilebwenekela. (Belengeni 1 Abena Tesalonika 5:1, 2.) Nangu fye Bena Kristu, abalolela ubo bushiku, bakapapa ifyo bukesa mu kupumikisha. (Mat. 24:44)