“Umuti wa Kusuba pa Menso”

YESU e waebele Abena Kristu ba mu mwanda wa myaka uwa kubalilapo mu cilonganino ca Laodikea, mu Asia Minor, ukubomfya uyu muti.

Yesu atile: “Ushite . . . umuti wa kusuba pa menso, ukuti umone.” Te bulwele bwa menso ya cine, lelo bakabile ukundapwa ku bupofu bwa ku mupashi. Abena Kristu mu Laodikea bakonkelele ukwangwa ifyuma ukwa bali muli ulya musumba uusambashi umo baleikala kabili tabapoosele mano ku fyo balekabila icine cine lwa ku mupashi.

Ukulanda pa calengele ubu bulwele bwa kafifi, Yesu atile: “Utila, Ndi wa fyuma, ukucindama nincindama, kabili nshilekabila kantu nangu kamo; kabili tawishibe ukuti uli wa nkumbabulili, kabili umulanda, kabili umubusu, kabili impofu, kabili uwa bwamba.” Nangu line tabaishibe ulwa ici, aba mu cilonganino balekabila “umuti wa kusuba pa menso” uo bali no kukwata nga baumfwila ukusambilisha no kufunda kwa kwa Yesu Kristu. Yesu atile: “ushite kuli ine.”—Ukusokolola 3:17, 18.

Nga fintu cali ku bena Laodikea, Abena Kristu ba cine lelo bafwile ukuibaka ku kukanasongwa na bantu batemwa ifyuma no musamwe aba mu bwikashi bekala, napamo ukwabula ukwishiba. Umuti ukabilwa pa kusungilila bumupashi bwakosa usangwa mu mashiwi ya kwa Yesu aya kuti: “Ushite kuli [Yesu] . . . umuti wa kusuba pa menso, ukuti umone.”

Icacindama ukwishiba ca kuti “umuti wa kusuba pa menso” ufwile ukushitwa. Walikwata umutengo. Tukabila inshita pa kubelenga no kwetetula pa Cebo ca kwa Lesa. Kemba wa malumbo atweba ati, ici Cebo ‘calisanguluka, cibuutusha pa menso.’—Amalumbo 19:8.