Ulwendo Ulutali Baendele Talwali lwa Fye

LIPOTI yafumine ku Democratic Republic of Congo yalandile pa banakashi babili, abafyalwa inda imo, abaendele ulwendo lushailepela ukuya ku ncende yatebelelwa ne nkondo iitwa ati Lisala. Baile ku kusangwa ku Kulongana kwa Citungu ukwaleti “Peeleni Lesa Ubukata.” Pali kulya kulongana, bale-enekela ukuipakisha amafundisho ya ku mupashi no kuba pamo na Bena Kristu banabo. Kabili balefwaisha no kumonana na beminishi be ofesi lya Nte sha kwa Yehova ilyabela ku Kinshasa. Pa mulandu wa nkondo ya bana calo iyaba mu Congo, aba bankashi tabamonenepo no uli onse uwa kwi ofesi lya Nte pa myaka iingi, e ico batontonkenye ukuti nga ca kuti balisangilwe kuli kulya kulongana, kuti bamonanapo na bamo.

Pa kufuma kwi tauni lya ku mwabo ilya Basankusu ukuya ku Lisala, aba bankashi babili baninine akabwato no kwenda bakilomita 300 ukupita pa mimana ibili iyapulinkanya impanga. Baendele imilungu itatu. Aba bankashi babomba umulimo wa kushimikila icebo nshita yonse, umo aabomba pa myaka itatu e lyo umbi na o aabomba pa myaka 19. Kanshi ilyo bali pa lwendo, balebila ne mbila nsuma ya Bufumu. Mu lwendo lwabo, babombele amaawala 110 ukushimikila abo balekumanya mu nshila, kabili bapeele abantu amatrakiti 200 e lyo na bamagazini 30.

Ilyo balepita pa mumana, balekumanya imfubu ne ng’wena ifyaseeka sana kuli ilya ncende. Tabale-enda pa mumana inshita ya bushiku nga nakufiita, pantu te kuti beshibe nga pali ubwafya! Bapitile na pa ncende ishingi isho abashilika bapikitilapo ifipe na bantu.

Ulwendo aba bankashi baendele lwali lutali nga nshi kabili ulwa kunasha, lelo nangu cibe fyo, bali ne nsansa. Bonse babili balitashishe kabili bali ne nsansa ukusangwa ku kulongana kwali ku Lisala. Imitima yabo yalicincimwike pa cine ico baumfwile kabili balikoseleshiwe ku ba bwananyina 7,000 abasangilweko. Ilyo bapwishishe ukulongana, baendele ulwendo na lumbi ukubwelelamo ku mwabo. Bapitile mu fintu fimo fine nga pa kubala. Awe bailesanga indupwa shabo shili fye bwino kabili isha mutende.