1, 2. (a) Mafya nshi Davidi akwete? (b) Malumbo nshi ayo twalalandapo?

IMFUMU DAVIDI yatekele Israele pa myaka iingi. Pali iyi nshita iyi mfumu yalikotele e lyo kabili yali no bwafya ubukalamba. Umwana wakwe Abishalomu aishilemupondokela no kuibika pa bufumu, kabili Davidi alifulumwike mu Yerusalemu. Ne mpanda mano yakwe nayo yalimupondokele. Ilyo afulumwike ninshi ali na bamo abali aba cishinka kuli ena, aendele na makasa ayabulako indyato no kuninika Ulupili lwa Miolife uku ninshi alelila. Kabili ilyo Davidi aleya, Shimei uwafumine mu lupwa lwa kwa Shauli alemusukushila amabwe no kukuba ulukungu e lyo no kumusaalula.—2 Sam. 15:30, 31; 16:5-14.

² Bushe ifi fyacitike, fyali no kulenga Davidi ukufwa mu bulanda kabili uwaseebana? Awe, pantu alicetekele muli Yehova. Icilanga ifi, mashiwi yaba mu Amalumbo 3 ayo Davidi alembele ilyo alebutuka Abishalomu.

Ilyo ‘Abengi Batwimina’

3. Nga fintu Amalumbo 3:1, 2 yalanda, bwafya nshi Davidi akwete?

³ Inkombe yalishile no kweba Davidi ati: “Imitima ya bena Israele itemenwe Abishalomu.” (2 Sam. 15:13) Ilyo aletontonkanya pa calengele ukuti abantu abengi bakonke Abishalomu muli bucipondoka bwakwe, Davidi aipwishe ukuti: “Mwe Yehova, cinshi ico abalwani bandi bafulila? Cinshi ico abengi balenjimina? Abengi balesosa pa mweo wandi abati: ‘Takuli ipusukilo kuli ena ukufuma kuli Lesa.’” (Amalu. 3:1, 2) Abena Israele abengi balemona kwati Yehova takapusushe Davidi kuli Abishalomu na banankwe.

4, 5. (a) Cinshi Davidi acetekele sana? (b) Bushe amashiwi ya kuti “uwa kunjinuna umutwe” yalola mwi?

⁴ Lelo Davidi tasakamene pantu alicetekele sana Lesa. Aimbile ukuti: “Mwe Yehova, muli nkwela ukunshinguluka, ni mwe bukata bwandi kabili uwa kunjinuna umutwe.” (Amalu. 3:3) Davidi alicetekele ukuti Yehova akamucingilila nga filya fine inkwela icingilila umushilika. Nangu ca kuti imfumu iikote yalebutuka, naifimba ku mutwe kabili naikontamina pa nshi nsoni nsoni, Uwapulamo ali no kufumyapo ubucushi bwa iko no kuicindamika na kabili. Yehova ali no kumwafwa ukwiminina no kwinuna umutwe na kabili. Ilyo Davidi alilile kuli Lesa, alicetekele ukuti akamwasuka. Bushe na imwe e fyo mwacetekela Yehova?

⁵ Ilyo Davidi alandile amashiwi ya kuti “uwa kunjinuna umutwe,” alelanda pali Yehova ukuti e wingamwafwa. Baibolo ya Today’s English Version itila: “Nomba imwe, mwe SHIKULU, ni mwe mwaba inkwela yandi iya kuncingilila ku masanso lyonse; mulalenga nacimfya no kumpeela amaka na kabili.” Icitabo cimo cilanda pa mashiwi ya kuti “uwa kunjinuna umutwe,” ukuti: ‘Ilyo Lesa ainuna “umutwe” wa muntu, alamulenga ukuba ne subilo no kukanasakamikwa.’ Apo Davidi balimufumishe pa bufumu, ali no bulanda. Lelo, ‘ukumwinuna umutwe’ kwali no kumulenga ukuba uwashipa na kabili, ukuleka ukusakamana, e lyo no kumulenga ukucetekela sana Lesa.

‘Yehova Akasuka!’

6. Mulandu nshi Davidi alandile ukuti Yehova alyaswike ipepo lyakwe ukufuma ku lupili lwa mushilo?

⁶ Apo Davidi alicetekele Yehova kabili talesakamikwa, alandile no kuti: “Kwi shiwi lyandi nkakuuta kuli Yehova, na o akanjasuka mu lupili lwakwe ulwa mushilo.” (Amalu. 3:4) Abantu basendele icipao ca cipangano icaleimininako ukubapo kwa kwa Lesa, no kucitwala ku Lupili lwa Sione ukulingana ne fyo Davidi alandile. (Belengeni 2 Samwele 15:23-25.) E mulandu wine Davidi alandile ukuti Yehova alyaswike ipepo lyakwe ukufuma ku lupili lwa mushilo.

7. Mulandu nshi Davidi ashakwatile umwenso?

⁷ Apo Davidi alicetekele ukuti Lesa akasuka ipepo lyakwe, taleumfwa mwenso. Lelo aimbile ukuti: “Lelo ine, nkalambalala pa nshi pa kuti ndaale utulo; nkashibuka, pantu Yehova akangafwa.” (Amalu. 3:5) Nangu fye bushiku, ilyo cinganguka sana ukumusansa mu kupumikisha, Davidi taleba no mwenso pa kuya mu kulaala. Alicetekele ukuti tabamwipaye, pantu ifyo apitilemo kale fyalengele atetekele sana ukuti Lesa alamwafwa. Kanshi kuti cawama tulekonka “inshila sha kwa Yehova” no kukanafumamo.—Belengeni 2 Samwele 22:21, 22.

8. Bushe Amalumbo 27:1-4 yalanga shani ukuti Davidi alicetekele Lesa?

⁸ Kwaliba ilumbo na limbi ililanga ukuti Davidi alicetekele sana Lesa kabili talesakamikwa. Muli ili ilumbo mwaliba amashiwi ayatila: “Yehova e lubuuto lwandi kabili e pusukilo lyandi. Nani ningatiina? Yehova e ucingilila umweo wandi. Nani ningatutuma? . . . Nangu abashilika bapanga inkambi pali ine, umutima wandi tawakatiine. . . . Kuli Yehova nalombako fye cimo—ico cine e co ndefwaya, ukuti ndeikala mu ng’anda ya kwa Yehova inshiku shonse isha mweo wandi, pa kutila ndemona ubusuma bwa kwa Yehova no kulatamba itempele lyakwe.” (Amalu. 27:1-4) Nga ca kuti na imwe e fyo mumfwa kabili tapali ne filemucilikila, lyonse mukalapepa Yehova capamo na bakapepa banenu.—Heb. 10:23-25.

9, 10. Te mulandu ne fyo amashiwi yaba pa Amalumbo 3:6, 7, yalanda, mulandu nshi mwingasosela ukuti Davidi talefwaya ukulandula?

⁹ Nangu ca kuti Davidi balimupondokele kuli Abishalomu na ku bantu bambi abengi, aimbile ukuti: “Nshakatiine iminshipendwa ya bantu abaitantamika ukunshinguluka. Imeni, mwe Yehova! Mpususheni, mwe Lesa wandi! Pantu mukooma abalwani bandi bonse mu nsekete. Ameno ya babifi mukayakuulaula.”—Amalu. 3:6, 7.

¹⁰ Davidi talefwaya ukulandula. Uwali no ‘kuuma abalwani bakwe mu nsekete’ ni Lesa. Imfumu Davidi yali-ilembele iine Amafunde kabili yalishibe ukuti muli aya Mafunde Yehova atile: “Nine mfwile ukulandula no kukanda.” (Amala. 17:14, 15, 18; 32:35) Na kabili Lesa e ‘ukakuulaula ameno ya babifi.’ Ukukuulaula ameno ya babifi, kulenga bekwata amaka ya kucita ifyabipa kuli ifwe. Yehova alishiba ababifi pantu ‘alamona mu mutima.’ (1 Sam. 16:7) Tulatasha sana ukuti Lesa alatupeela icitetekelo na maka ya kulwisha Satana, imbifi ikalamba, uukapooswa mu cilindi nomba line fye no kuba nge nkalamo iilelila lelo iishakwata ameno kabili iyalinga ukonaulwa!—1 Pet. 5:8, 9; Ukus. 20:1, 2, 7-10.

“Ukupususha Kufuma Kuli Yehova”

11. Mulandu nshi tufwile ukulapepelako Abena Kristu banensu?

¹¹ Davidi alefwaisha ukumupususha kabili alishibe ukuti ni Yehova fye e wingamupususha. Na lyo line, kemba wa malumbo talandile fye pe pusukilo lyakwe eka lelo alilandile na pe pusukilo lya bantu ba kwa Lesa bonse ilyo atile: “Ukupususha kufuma kuli Yehova. Ipaalo lyenu lili pa bantu benu.” (Amalu. 3:8) Nangu ca kuti Davidi alikwete amafya ayakalamba, lelo aletontonkanyapo pa bantu ba kwa Yehova bonse kabili alicetekele ukuti Lesa akabapaala. Bushe na ifwe tatufwile ukulatontonkanyapo pa Bena Kristu banensu? Tufwile ukulabapepelako lyonse, ukulomba ukuti Yehova alebapeela umupashi wa mushilo pa kuti baleshipa no kuba ne citetekelo ilyo baleshimikila imbila nsuma.—Efes. 6:17-20.

12, 13. Cinshi cacitikile Abishalomu, kabili Davidi aumfwile shani ilyo ico cacitike?

¹² Pa kulekelesha Abishalomu aliseebene. Ili lisambililo ilikalamba kuli bonse abacusha abanabo, maka maka abacusha abasubwa aba kwa Lesa, nga Davidi. (Belengeni Amapinda 3:31-35.) Kwaishileba ubulwi, kabili abashilika ba kwa Abishalomu balibacimfishe. Ilyo Abishalomu alefulumuka pa mfalashi, umushishi wakwe apo wali uutali wakobele ku musambo wa cimuti icikalamba. Atampile ukupeelela kuli ulya muti mpaka Yoabu aisapusha utumafumo tutatu mu mutima wakwe no kumwipaya.—2 Sam. 18:6-17.

¹³ Bushe Davidi alitemenwe ilyo aumfwile icacitikile umwana wakwe? Awe. Lelo aleyombawila fye, no kulila ati: “Mwana wandi Abishalomu, mwana wandi, mwana wandi Abishalomu! Iye kanshi nga nine nafwa ukucila iwe, Abishalomu mwana wandi, we mwana wandi!” (2 Sam. 18:24-33) Amashiwi Yoabu alandile e yalengele Davidi akose no kukanacilamo ukuba no bulanda. Icacitikile Abishalomu, uwalefwaisha ukulwisha wishi uwasubwa uwa kwa Yehova pa kuti apoke ubufumu calibipile nga nshi. Ici calengele ukuti ailetelele.—2 Sam. 19:1-8; Amapi. 12:21; 24:21, 22.