“BIKA UMUTIMA OBE PALI CONSE ICO NDEKULENGO KUMONA”

(Esekiele 40:1–48:35)

Ni mu mwaka walenga 14 ukutula apo umusumba wa Yerusalemu waonawililwe. (Esekiele 40:1) Kwashele imyaka 56 iya kuba muli bunkole. (Yeremia 29:10) Esekiele nomba ali mupepi no kukumanya imyaka 50. Mu cimonwa, bamulanga ifilecitika mu calo ca Israele. Bamweba ati: “We mwana wa muntu, mona mu menso yobe, umfwa na mu matwi yobe, bika no mutima obe pali conse ico ndekulengo kumona.” (Esekiele 40:2-4) Esekiele afwile alyumfwile bwino sana ilyo bamulangile itempele lipya mu cimonwa!

Itempele lya lulumbi ilyo Esekiele amwene mu cimonwa lyakwete impongolo 6, imiputule ya kuliilamo 30, Umwashila, Umwashilisha, iciipailo ca cimuti, e lyo ne ciipailo ca malambo. Amenshi ‘ayalefuma’ mwi tempele yaisaba umumana wa mukuku. (Esekiele 47:1) Na kabili, Esekiele amwene icimonwa umo cila mukowa baupeele impanga—balebakanya impanga ukufuma ku kabanga ukulola ku masamba kabili pa kati ka mpanga ya kwa Yuda na Benyamini e pali impanga ya mukankaala, e kutila intungulushi. “Umwashila mwa kwa Yehova” no “musumba” uwaleitwa ati Yehova-e-mo-ali, na fyo fyali pali iyi yine mpanga ya ntungulushi.—Esekiele 48:9, 10, 15, 35.

Amasuko ku Mepusho ya mu Baibolo:

40:3–47:12—Bushe itempele Esekiele amwene mu cimonwa limininako cinshi? Ili tempele Esekiele amwene mu cimonwa ilyali ne miputule iikalamba sana talyabalile alikuulwa nakalya. Lyaleimininako itempele lya kwa Lesa ilya mampalanya, e kutila ifyo Lesa apekanya ukupepa kwasanguluka ukwaba nge tempele muno nshiku. (Esekiele 40:2; Mika 4:1; AbaHebere 8:2; 9:23, 24) Fimo ifyalecitika pali ili tempele lya mu cimonwa filefikilishiwa muno “nshiku sha kulekelesha,” ilyo Lesa asangulula bashimapepo. (2 Timote 3:1; Esekiele 44:10-16; Malaki 3:1-3) Na lyo line, ifyalecitika pali ili itempele fyonse fili no kufikilishiwa mu Paradaise. Itempele lya mu cimonwa lyalengele abaYuda bankole ukuba sana ne subilo lya kuti ukupepa kwa cine kukabweshiwa no kuti indupwa shonse isha baYuda shikaikwatila impanga mu calo.

40:3–43:17—Cinshi ukupima itempele kwalepilibula? Ukupima itempele kwalelangilila ukuti nangu cikabe shani ukufwaya kwa kwa Yehova ukwakuma ukupepa kwa cine kukacitika.

43:2-4, 7, 9—Bushe “ifitumbi fya shamfumu” ifyo bali no kufumya mwi tempele fyali ni finshi? Ifitumbi fifwile fyali filubi. Bakateka ba mu Yerusalemu e lyo na bekashi ba mu musumba balikoweshe itempele ku filubi, na kuba balefimona nge mfumu shabo.

43:13-20—Bushe iciipailo ico Esekiele amwene mu cimonwa cimininako cinshi? Iciipailo ca mampalanya, kufwaya kwa kwa Lesa ukwakuma ilambo lya cilubula ilya kwa Yesu Kristu. Pa mulandu we lambo lya kwa Yesu, Lesa amona abasubwa ukuti balilungama kabili abe “bumba likalamba” na bo balisanguluka kuli ena. (Ukusokolola 7:9-14; Abena Roma 5:1, 2) Napamo e mulandu wine “icishiba icaengwa” cishabelelemo mwi tempele Esekiele amwene mu cimonwa. Ici cishiba icali mwi tempele ilyo Solomone akuulile e mwaleba amenshi ayo bashimapepo balesamba.—1 Ishamfumu 7:23-26.

44:10-16—Bushe ibumba lya bashimapepo ni bani? Ibumba lya bashimapepo limininako Abena Kristu basubwa muno nshiku. Mu 1918, Yehova alibalopolwele ilyo aikele mwi tempele lya mampalanya ngo wa ‘kulopolola kabili uwa kusangulula.’ (Malaki 3:1-5) Abali abasanguluka na balapiile balitwalilile ukubomba umulimo wabo uwaibela. Lyena, balekabila ukwesha na maka ukuisunga “ababula akalema ku fya pano calo” pa kuti aba mwi “bumba likalamba” balebapashanya. Aba mwi bumba likalamba e baba nga abena Israele abashali mu mikowa ya bushimapepo.—Yakobo 1:27; Ukusokolola 7:9, 10.

45:1; 47:13–48:29—Bushe “icalo” no kwakanya impanga fyaleimininako cinshi? Icalo cifulo ca mampalanya umo abantu ba kwa Lesa babombela. Cikulu fye nga kapepa wa kwa Yehova aletungilila ukupepa kwa cine, ninshi ali mu calo cabweshiwa, te mulandu na kuntu engaba. Ukufikilishiwa kwa kulekelesha ukwa kwakanya impanga kukabako mu calo cipya ilyo umuntu onse uwa cishinka akakwata icifulo cakwe.—Esaya 65:17, 21.

45:7, 16—Bushe filya abantu balesangula kuli bashimapepo na ku mukankaala fyalola mwi? Mwi tempele lya mampalanya, umusangulo ulosha ku kubomba umulimo wa kwa Lesa, e kutila ukulaafwana no kwikatana.

47:1-5—Bushe amenshi ya mu mumana ayo Esekiele amwene mu cimonwa yapilibula cinshi? Amenshi yemininako ukupekanya kwa kwa Yehova ukwingalenga umo ukuba no mweo, pamo nge lambo lya cilubula ilya kwa Kristu Yesu e lyo no kwishiba Lesa pa kusambilila ifyaba muli Baibolo. (Yeremia 2:13; Yohane 4:7-26; Abena Efese 5:25-27) Umumana wa mampalanya ulaya uleshika pa kuti abapya abengi bese mu kupepa kwa cine. (Esaya 60:22) Mu myaka Ikana Limo, muli uyu mumana mukaba amenshi ya mweo ayasuma sana. Na kabili, na fimbi ifyo tukeshiba ifikaba mu “fimfungwa” ifikakupukulwa fikaba nga aya menshi ya mampalanya.—Ukusokolola 20:12; 22:1, 2.

47:12—Bushe imiti iitwale fisabo imininako finshi? Imiti ya mampalanya imininako ukupekanya kwa kwa Lesa ukwa kulenga abantu ukufika ku kupwililika.

48:15-19, 30-35—Bushe umusumba wa mu cimonwa ca kwa Esekiele wimininako cinshi? Umusumba waleitwa ati “Yehova-e-mo-ali” wali mu calo ca “cinsaunte” nelyo icalo ca fye, icilelanga ukuti uyu musumba ufwile waleimininako fimo ifyaba pano calo. Cimoneka ukuti uyu musumba wimininako ubutungulushi bwa pano calo ubukalenga abalungama abakaba mwi “sonde lipya” ukumwenamo. (2 Petro 3:13) Ifi uyu musumba wakwata impongolo konse konse cilangililo ca kuti ukwingilamo takwayafya. Abangalila abantu ba kwa Lesa tabalingile ukuba abaifinya.

Ifyo Twingasambililako:

40:14, 16, 22, 26. Utuncindu uto balengele pa fibumba fya pa minshi ye tempele twali cilangililo ca kuti abantu fye abalungama e balesuminishiwa ukwingilamo. (Amalumbo 92:12) Ici ciletusambilisha ukutila pa kuti ukupepa kwesu kupokelelwe kuli Yehova tufwile ukuba abalungama.

44:23. Tufwile ukutasha nga nshi pa milimo iyo ibumba lya muno nshiku ilya bashimapepo lilebomba! “Umusha wa cishinka kabili uwashilimuka” e ubomba umulimo wa kutupeela ifyo tukabila lwa ku mupashi ifya pa nshita yalinga ifitwafwa ukwishiba ifyakowela ne fyasanguluka mu menso ya kwa Yehova.—Mateo 24:45.

47:9, 11. Ukwishiba ifyaba mu cebo ca kwa Lesa, ukwaba e cintu icacindama icaba nga menshi ya mu cimonwa, kwalilenga abantu abengi ukundapwa muno nshiku. Bonse abanwako aya menshi balaba no bumi. (Yohane 17:3) Lelo, abakaana ukunwa amenshi ya bumi bena ‘bakapeelwa ku kubamo umucele,’ e kutila bakonaulwa umuyayaya. Kanshi calicindama ‘ukuibikilishako ukulungika bwino icebo ca cine’!—2 Timote 2:15.

[Icikope pe bula 9]

Itempele lya lulumbi ilyo Esekiele amwene mu cimonwa