Watchtower LAIBRARE YA PA INTANETI

Ukulanda Mu Cifyalilwa

Nonkelenimo mu Masambililo ya Isukulu lya Butumikishi Ilya Bulesa
- Isambililo 14
  
  Ukulanda Mu Cifyalilwa
  
  Cinshi mufwile ukucita?
  
  Ukuba fye filya fine mulanda lyonse. Ukulanda kwati muleshimika fye ilyashi, ukuba umufumacumi, te kulanda ifyo mushilanda mu cifyalilwa.
  
  Mulandu Nshi Kwacindamina?
  
  Nga muli no mwenso, nelyo abauminina, atemwa namufinininwa pa mulandu wa kutontonkanya ifyo abantu balemumona, bambi bakapumbulwa tabakomfwe ifyo mulesosa.
  
  UKULANDA mu cifyalilwa kuti kwalenga bambi ukumucetekela. Bushe kuti mwacetekela umuntu ulelanda naikupa icifimbo pa menso? Bushe kuti calenga mwamucetekela sana nga ca kuti ico cifimbo caliyemba ukumucila? Te sana. E ico ukucila ukuifungushanya pa kulanda, landeni fye mu cifyalilwa.
  
  Ukulanda mu cifyalilwa te kutila ninshi kuilekelesha. Ukubomfya amashiwi yashalinga, ukukanashimbula bwino, no kulongofyanya tafyawama. Insoselo sha mu musebo na sho shifwile ukusengaukwa. Lyonse tufwaya ukuba no mucinshi walinga, mu milandile na mu mibele. Uulanda mu cifyalilwa talanda no mucinshi wacishamo kabili tapoosesha amano ku kutemuna bambi.
  
  Mu Butumikishi bwa mwi Bala. Ilyo mwafika pa ng’anda nelyo ilyo mulebinga umo mu cintubwingi pa kuti mumushimikile ubunte, bushe mulatiina? Fwe bengi tulatiina, lelo bamo umwenso ulatwalilila ukucila bambi. Ico kuti calenga ishiwi ukukanaumfwika ilya cifyalilwa nelyo ukututuma, napamo umwenso kuti wamonekela mu kuseshanya amaboko nelyo ukuseshasesha umutwe.
  
  Fingi fingalenga kasabankanya ukukwata ubu bwafya. Napamo aletontonkanya ifyo bambi balemumona nelyo alelanguluka nga ca kuti alalanda fye bwino. Fyonse fi te fyeni, lelo ubwafya bwisako nga mwapooseshako amano kuli fi fintu. Nga mulatiina ilyo mushilaya mu butumikishi, cinshi cingamwafwa? Ukupekanya sana ne pepo lya mukoosha kuli Yehova. (Imil. 4:29) Tontonkanyeni pa nkumbu shakulisha isha kwa Yehova pa kwita abantu ukuti bakaipakishe ubumi bwapwililika no mweo wa muyayaya mu Paradise. Tontonkanyeni pa bantu mulefwaya ukwafwa ne fyo balekabila ukumfwa imbila nsuma.
  
  Ibukisheni no kuti abantu kuti baisalila, e co kuti basumina ubukombe bwenu nelyo ukubukaana. E fyo cali na lintu Yesu aleshimikila mu Israele wa ku kale. Umulimo wenu wa kushimikila fye. (Mat. 24:14) Nangula abantu tabamulekele ukuti mulande, ukufikapo fye kwenu kuba kushimikila. Ninshi namutunguluka pantu namuleka Yehova ukumubomfya ukucita ukufwaya kwakwe. Ni shani pa lwa nshita mwasuminishiwa ukulanda, finshi mukasosa? Nga mwayangwa sana ifyo bambi balekabila, imilandile yenu ikaba iisuma kabili iya cifyalilwa.
  
  Ilyo muleshimikila, imicitile yenu ne milandile nga fyaba fye mulya mwine mucitila cila bushiku, cikalenga abo mulelandako ukwangukilwa. Napamo kuti basumina ne fishinka fya mu Malembo ifyo mulefwaya ukubebako. Ukucila ukulanda fye kwati lyashi lya mu cilonganino, lanshanyeni na bo. Beni aba bucibusa. Langeni ukuti mulefwaisha ukulanda na bo, kabili batasheni nga balandapo. Kwena, nga ca kuti muli ulo lulimi atemwa ulutambi bafwaya ukuti mulecita fimo pa kucindika abantu mushaishiba, mulingile ukucite fyo fine. Lelo lyonse kuti mwaba abaiteyanya ne cinso ca nsansa.

Ukulanda Mu Cifyalilwa

Nonkelenimo mu Masambililo ya Isukulu lya Butumikishi Ilya Bulesa
- IFYA KULANDA MU CIFYALILWA
  
  Landeni ifyo mulanda lyonse. Mwipoosa amano kuli mwe bene, lelo kuli Yehova na fintu abantu balekabila ukusambilila pali wene.

Ukulanda Mu Cifyalilwa

Nonkelenimo mu Masambililo ya Isukulu lya Butumikishi Ilya Bulesa
- (2) Pa nshita shitatu ishapusanapusana ilyo mushilaya mu butumikishi bwa mwi bala, belengeni amaparagrafu ya kubalilapo yabili muli lino isambililo pamo ne fyebo fili pa kamutwe kaleti “Mu Butumikishi bwa mwi Bala,” pe bula 128. Esheni na maka ukubomfya uku kufunda.