“NSHAKAKALIPE UMUYAYAYA”

20. (a) Mibele nshi Yeremia alandilepo iyo Lesa alanga ku bantu? (b) Bushe ‘ukulanguluka’ kuti kwalenga shani Yehova ukwelela umuntu? (Moneni akabokoshi akaleti “Bushe Yehova ‘Alanguluka’ Shani?”)

²⁰ Abantu abengi batila mwi buuku lya kwa Yeremia ne lya Inyimbo sha Bulanda mwaba fye ilyashi ililanda pa fyabipa. Abatontonkanya ifi tababika amano ku mashiwi yalembwa muli aya mabuuku ayo Yehova alepapaata abantu bakwe ukuti babwelele kuli ena pa kuti abelele. Lesa acincishe abaYuda ukuti: “Shi bweleni cila muntu aleke imibele yakwe iibi, no kuwamya imibele yenu ne micitile yenu.” Inshita imbi, Yeremia abakoseleshe ati: “Wamyeni imibele yenu ne micitile yenu, no kumfwila ishiwi lya kwa Yehova Lesa wenu, kabili Yehova akomfwa ubulanda pa bucushi ubo atile aleleta pali imwe.” (Yer. 18:11; 26:13) Muno nshiku, Yehova alikonkanyapo ukwelela bonse abomfwa ububi pa fyabipa ifyo bacitile no kufileka.

21. Cinshi Yehova afwaya pa kwelela umuntu?

²¹ Lelo, Yehova tapelela fye pa kulanda ukuti alelela. Alabombelapo ukulingana ne fyo ifintu fili. Yehova abomfeshe Yeremia ukupapaata abantu ati: “Bwela, we Israele, we cipondoka . . . Nshakamuloleshe bukali bukali . . . Nshakakalipe umuyayaya.” (Yer. 3:12) Lesa tatwalilila ukuba no bukali nelyo icipyu ku bantu bakwe abo aelela. Lelo, nangu ca kuti umuntu nalufyanya, Yehova afwaya ukuwamya bucibusa bwakwe no uyo muntu. Te mulandu no bwingi bwa membu isho aacita, nga alapila ukulapila kwa cine cine no kulomba ubwelelo kuli Lesa, Yehova ‘akamubwesha’ kuli ena no kumupaala. (Yer. 15:19) Aya mashiwi yafwile ukukoselesha bonse pali lelo abafuma kuli Lesa wa cine ukubwelela kuli ena. Bushe tamulesumina ukuti ifi Yehova elela cilatulenga ukupalama kuli ena?—Belengeni Inyimbo sha Bulanda 5:21.

22, 23. Ilyo mulepashanya Yehova mukwelela bambi, cinshi cifwile ukuba ubuyo bwenu?

²² Nga ca kuti ifyo umo acita e lyo na mashiwi amweba fyamukalipa, bushe mukapashanya Yehova? Lesa alandile pa baYuda ba ku kale ukuti aali no ‘kusangulula’ bonse abo aelelele. (Belengeni Yeremia 33:8.) Na lelo line kuti asangulula umuntu nelyo ukumuwamya, e kutila ukukanaibukisha icilubo cakwe nga alapila, no kulenga atampa cipya cipya ukumubombela. Nomba, Lesa nga aelela umuntu tacipilibula ukuti asangululwa na ku kukanapwililika uko twapyana ica kuti no kubembuka te kuti abembuke. Na lyo line, kuli ico twingasambililako mu fyo Lesa alandile pa kusangulula abantu. Tufwile ukuibikilishako ukulabako ifilubo, nelyo ifintu ifyo umuntu umbi atulufyanya, ifyo twingalandila mu mampalanya ukuti nga twalabako ifyo fintu ninshi twasangulula uyo muntu mu mutima wesu. Kuti twacita shani ifyo?

²³ Tutile bamupa icipe ca mutengo nga nshi nelyo icipe ce bumba ica kubikamo amaluba. Nga ca kuti calamba nelyo cakowela, bushe kuti mwacipoosa fye apo pene? Awe. Kuti mwabombesha ukuciwamya, ukufumyako ifiko fyonse na fyonse ifilengele ukuti cikowele. Ico mulefwaya ca kuti cilemoneka bwino. E fyo na imwe mufwile ukubombesha ukufumya ubukali nelyo ububi mumfwa pali munyinenwe nelyo nkashi uwa mulufyenye. Lekeni ukutontonkanya pa mashiwi yabipa nelyo pa fyabipa ifyo bambi bacitile kuli imwe. Nga mwalabako, mulasangulula umuntu mwaelela, mwaleka ukumumona filya mwalemumona. Apo nomba mu mutima wenu namufumyamo amatontonkanyo yabipa pali uyu muntu, kuti camwangukila ukuipakisha bucibusa bwapalamisha ubo mwalemona kwati bwaloba.

24, 25. Fisuma nshi mukasanga nga mwaishiba Yehova filya Imfumu Yoshia yamwishibe?

²⁴ Twalandapo fye fimo fimo ifyo Yehova acita e lyo ne mibele fye imo imo iyakwe ifyo tusambilila ilyo tulemwishiba bwino. Twamona ukuti ifisuma ifyo tusanga mu kwishiba bwino Yehova e fitucincisha ukulamupepa ukulingana ne fyo afwaya. Nga twaishiba bwino Yehova nga filya Imfumu Yoshia yamwishibe, tukaba ne nsansa nga nshi, na kuba insansa mibele na imbi iyo Lesa akwata.

²⁵ Nga twaishiba bwino Yehova tukalaumfwana bwino na banensu. Ilyo twabombesha ukuba ne cikuuku, ukuba no mulinganya, no kulaelela bambi nga filya Yehova elela, bucibusa bwesu na ba mu cilonganino bukakoselako kabili bukawama nga nshi. Na kabili, tukafikapo nga nshi ukusambilisha ilyo tulebwelela ku bo twashimikileko kabili tukalatungulula amasambililo ya Baibolo ayalunduluka. Abalesambilila icine cikabangukila ukutupashanya ilyo bamona muli ifwe imibele isuma iya Bwina Kristu. Kanshi, tukaipangasha bwino bwino ukubalanga ifya kupepa Yehova ukulingana ne fyo afwaya, ukukonka “inshila isuma.”—Yer. 6:16.