Mulandu Nshi Lesa Apangile Icalo?

Ilyo Yehova Lesaa apangile icalo, cali ni paradaise umo abantu, abaume na banakashi, bali no kulaikala mu nsansa umuyayaya. Ili sambilisho lya cine talyumfwana ne cisambilisho cishili ca mu Baibolo ico abantu abengi basuminamo ica kuti Lesa apangile icalo ukuba ica kweseshapo abantu pa kuti amone nga nabalinga ukuyaikala ku muulu uko bakaba aba nsansa.—Belengeni akabokoshi kaleti “Bushe pa Kuba ne Nsansa Kano Twafuma Pano Calo?” pe bula 6.

Lesa apangile umwaume no mwanakashi mu cipasho cakwe, e kutila abapangile ukuti balepashanya imibele yakwe iisuma. (Ukutendeka 1:26, 27) Abapangile abapwililika. Balikwete fyonse ifyo balekabila pa kuti baleba ne nsansa umuyayaya. Ici casanshishemo ukukumana pe sonde no kulimapo, ukulenga icalo conse ukuba paradaise nga filya ibala lya Edeni lyali.—Ukutendeka 1:28-31; 2:8, 9.

Lesa talaba umulandu apangile cino calo no mulandu abikilemo abantunse. Muli kasesema Esaya, Yehova atweba ukuti e Kapanga we sonde “uushalipangiile apa fye, lelo uwalipangile ukuti lileikalwamo.” (Esaya 45:18) Nomba line fye, ali no kuwamya isonde pa kuti likabe nga filya fine alefwaya ukuti libe pa kubala. Ilyo abantu bonse bakeshiba ukuti imitekele yakwe yalilungama, akabomfya amaka yakwe ayafulisha pa kufikilisha ukufwaya kwakwe no kufumyapo ububifi bonse. (Esaya 55:10, 11) Mwi pepo lya We Shifwe, Yesu Kristu alandilemo amashiwi aya kulomba Lesa ukuti acite ukufwaya kwakwe. Yesu atusambilishe ukupepa ukuti: “Ukufwaya kwenu kucitwe pano isonde nga mu muulu.” (Mateo 6:9, 10) Bushe ici cisanshamo finshi?

Ifyo Lesa Afwaya Isonde Ukuba

Cimo ico Lesa afwaya ca kuti ‘abafuuka bakekale mu calo.’ (Amalumbo 37:9-11, 29; Amapinda 2:21, 22) Yesu Kristu “akapususha umulanda uulekuuta mutuule, no wacula.” Akabalubula “ku ba mutitikisha na ku ba bunkalwe.” (Amalumbo 72:12-14) Takwakabe inkondo; nangu ni mfwa, ukuloosha, ukukalipwa, nelyo ukucula. (Amalumbo 46:9; Ukusokolola 21:1-4) Iminshipendwa ya bantu abafwa pali iyi nshita Lesa asuminisha ububifi bakababuushisha pano calo, kabili bakabapeela ishuko lya kuipakisha aya mapaalo e lyo na yambi.—Yohane 5:28, 29.

Na kuba, Yehova akafumyapo ifyabipa fyonse ifyo Satana aleta pa calo. Akafumyapo fyonse ica kuti “ukucula kwa kale [ukulenga abantu ukuba no bulanda no kukalipwa] kukalabwa.” (Esaya 65:16-19) Ifi fikacitika pantu Lesa tabepa, fyonse ifyo alaya filacitika. Ubumi tabwakabe ubwa “fye kabili ukuuma fye umwela.” (Lukala Milandu 2:17) Lelo, abantu bakaba ne nsansa.