⁷ Tontonkanyeni pali ici cilangililo. Nga mwalikwata umunenu uo mwatemwisha kabili alicenjela sana—nalimo mu mangalo, mu fya kulembalemba, nangu mu kwimba inyimbo—bushe teti mulemulandapo kuli balupwa lwenu na ku banenu bambi? Ukwabula no kutwishika e fyo mwingalacita. No kusambilila pali fyonse ifyo Yehova acita kuti kwatulenga ukucita cimo cine. Ku ca kumwenako, Amalumbo 19:1, 2 yatila imyulu yaisulamo intanda ‘ilenge cebo ukufukauka.’ (NW) Nga twatontonkanya sana pa fintu fya kupapusha ifyo Yehova alenga, tulafilwa ukuleka ukulanda pali Lesa wesu ku bantu bambi.

10. Mulandu nshi umutima utupatikishisha ukulumbanya Lesa wesu?

¹⁰ Kuli umulandu na umbi uwa kulumbanishisha Yehova. Ibukisheni cilya cilangililo ica munenu uo mwatemwa sana. Nga mwaumfwa bambi balelanda ubufi pali wena, balebifya ishina lyakwe ilisuma, bushe teti mufwaishe ukumupokololako? Ifi fine e ficitika kuli Yehova, balamubepesha ubufi muli cino calo. (Yohane 8:44; Ukusokolola 12:9) Kanshi abamutemwa, umutima ulabapatikisha ukulanda icine pali wena, ukufumyapo ubufi bamubepesha. Bushe na imwe kuti mwatemwa ukulanga ukuti mwalitemwa Yehova kabili mulamutasha no kuti mufwaya wena ukuba Kateka wenu ukucila umulwani wakwe Satana? Kuti mwalangilila ukuti e fyo mufwaya nga mulelumbanya Yehova.