Mulandu nshi tufwile ukubela abaicefya no kuitemenwa ukwaluka ilyo tuleshimikila ku bantu abapusanapusana? Ni nshila nshi tubomfya sana pa kushimikila imbila nsuma? Kuti twalanga shani ukuti ukucita ukufwaya kwa kwa Lesa kwalicindama sana ukucila ukuisekesha? Ilyashi lya kucincimusha ililanda pa lwendo lwa kwa Paulo ulwalenga butatu ulwa bumishonari kabili ulwa kulekeleshako, kuti lyatwafwa ukwasuka aya mepusho yacindama.

1, 2. (a) Bwafya nshi ubo Paulo na banankwe balimo mu Efese? (b) Finshi twalasambilila muli cino cipandwa?

MU MISEBO ya mu Efese mwiswile icongo icikalamba, abantu balepunda, bamo balelila kabili kuli ne congo ca bantu abengi abalebutuka. Ibumba lya bantu abakalipe lyalongana kabili bacite cimfulunganya icikalamba! Aba bwananyina babili abo umutumwa Paulo ali na bo pali ulu lwendo babekata no kubatintanya. Ili bumba lya bantu abakalipe nga nshi lyaya lilekulilako fye kabili bwangu bwangu bonse abali mu musebo uukalamba umwabela amatuuka babutukila mu cikuulwa cikalamba ica kutambilamo ifyangalo. Muli ici cikuulwa kuti mwaingila abantu 25,000. Abengi tabeshibe ne calenga icimfulunganya, lelo baletunganya ukuti itempele lyabo lili no kusuulwa ukubikako fye na lesa wabo umwanakashi Artemi uo batemwa. E ico batendeka ukubilikisha abati: “Artemi wa bena Efese, mukalamba icine cine!”—Imil. 19:34.

² Na uno wine muku, pa kufwaya ukulesha imbila nsuma ya Bufumu bwa kwa Lesa ukusalangana, Satana alenga ibumba lya bantu abakalipe ukwimina abasambi. Kwena, Satana tabomfya fye impokota pa kulesha umulimo wa kushimikila. Muli cino cipandwa, twalalanda pa micenjelo iyo Satana abomfeshe ukufwaya ukucincintila umulimo wa kushimikila no kwikatana kwa Bena Kristu ba kubalilapo. Ne cacindama ico twalasambilila ca kuti amapange yakwe yonse yalifililwe ukubomba, pantu “icebo ca kwa Yehova caleya cilelunduluka no kukoselako fye.” (Imil. 19:20)