Ukubilisha

◼ February: Palameni Kuli Yehova. Nga tamukwete ici citabo, shalikeni icitabo ca Creation (icikalamba nelyo icinono) nelyo icitabo ca Akalume ka Ukusokolola. March: Ukwishiba Uko Kutungulula ku Mweo wa Muyayaya. Kukaba ukubombesha kwa kutendeka amasambililo ya Baibolo. Abantu nga balikwata kale ici citabo, shalikeni icitabo ca Angweni ku Kusesema kwa kwa Daniele! April na May: Shalikeni bamagazini ba Ulupungu lwa kwa Kalinda na Loleni! pa muku umo. Ilyo mulecita ifipempu fya kubwelelamo ku bantu abalefwaya ukwishibilapo na fimbi, abasangwa ku Cibukisho nelyo ku kulongana kumbi ukwa cilonganino lelo abashibishanya sana ne cilonganino, shalikeni icitabo ca Pepeni Lesa. Bombesheni ukutendeka isambililo lya Baibolo, maka maka nga bamo balisambililapo icitabo ca Kwishiba nelyo broshuwa ya Cintu Lesa Afwaya.

◼ Kangalila wa kutangilila nelyo umbi uo akasala alingile ukupituluka muli akaunti wa cilonganino pa March 1 nelyo mu kwangufyanya pa numa. Mukabilishe ifyo mu kapitulukamo ku cilonganino pa numa fye ya kubelenga lipoti wa ndalama uukonkelepo. Belengeni imisangulo iyatuminwe kabili ilelangililwa ukuti yalipokelelwe iyo icilonganino casangwilileko ku mulimo wa mwi sonde lyonse ne ndalama shimbi isho ukuteyanya kwapoosele.

◼ Bakasabankanya abalefwaya ukubombako bupainiya bwa kwafwilisha umweshi umo nelyo ukucilapo muli iyi myeshi itatu ikakonkapo e kutila March, April, na May, balingile ukuiteyanya ili line no kutuma bwangu form wabo uwa kwipushishapo. Ici cikaafwa baeluda ukuteyanya ifilekabilwa mu mulimo wa mwi bala no kumona bamagazini bengakabilwa ne mpapulo shimbi. Amashina yonse aya basuminishiwe ukubomba bupainiya bwa kwafwilisha yalingile ukubilishiwa ku cilonganino cila mweshi.

◼ Kalemba na kangalila wa mulimo balingile ukupituluka mu mibombele ya bapainiya ba nshita yonse bonse. Nga ca kuti bamo tabalekumanisha ama-awala yafwaikwa, baeluda balingile ukutantika ifya kubafwilisha. Pitulukeni mu makalata ya S-201 aya pa mwaka no kumonamo imitubululo.

◼ Mu nshita ya Cibukisho ica mu 2004, ilyashi lyaibela ilya ku cintubwingi likaba no mutwe uuleti “Shipeni Kabili Tetekeleni Yehova.” Moneni ukubilisha kwapalako mu Ubutumikishi Bwesu Ubwa Bufumu ubwa mu September 2003.