Abena Lidia na bena mupalamano babo balishibikwe sana pali ilya nshita pantu balishibe sana ukupanga insalu isha malangi ayalekanalekana ukufuma fye mu nshiku sha kwa Homer, mu myaka ya ba 900 nelyo 800 B.C.E. Amenshi ya mu Tuatira yaishibikwe ukuti “e yo balepangilako amalangi ayabalabata kabili ayashalefuma ku nsalu.”
Insalu shakashikila shali no mutengo sana, abakankaala e baleshishita fye. Nangu ca kutila kwali ifingi ifyo balefumyako ilangi lya kupangila insalu shakashikila, pa kupanga insalu ishisuma kabili ishali sana no mutengo pena balebomfya ilangi ilyalefuma ku fyapala isabi ifyalesangwa muli bemba wa Mediterranean. Kuli cimo balefumyako itoni limo ilye langi, kabili ku fili 8,000 e ko balefumya ilangi lyalefina gramu imo. E mulandu wine kanshi insalu balebikako ili langi shabelele no mutengo nga nshi.