mu [kwishiba kwakwe, NW] e mo umubomfi wandi uwalungama akalungamikila abengi, apo wene atwikwa na mampuulu yabo.” (Esaya 53:10, 11)

32. Ni mu “kwishiba” nshi Yesu ‘alungamikila abengi,’ kabili ni bani balungamikwa?

³² Ipaalo na limbi ilyafuma mu mfwa ya kwa Yesu lya kuti ‘alalungamika abengi,’ na pali lelo line. Esaya atila acite co, “mu kwishiba kwakwe.” Cilemoneka kwati, uku kwishiba ni kulya Yesu anonkele ilyo aishileba umuntu no kucula mu lufyengo pa mulandu wa cumfwila cakwe kuli Lesa. (AbaHebere 4:15) Apo aculile ukufika na ku mfwa, Yesu ali no kupeela ilambo lyalekabilwa ku kwafwa bambi ukuba abalungama. Ni bani balungamikwa muli uyu musango? Aba kubalilapo, bakonshi bakwe abasubwa. Pa mulandu wa kutetekela mwi lambo lya kwa Yesu, Yehova abalenga ukuba abalungama pa kuti abacite ukuba abana no kubalenga ukuba bakateka banankwe aba kwa Yesu. (Abena Roma 5:19; 8:16, 17) E lyo, “ibumba likalamba” ilya “mpaanga shimbi” na bo batetekela mu mulopa wasumiwe uwa kwa Yesu kabili balaba abalungama ku kuleka babe bacibusa ba kwa Lesa kabili abakapusuka pa Armagedone.—Ukusokolola 7:9; 16:14, 16; Yohane 10:16; Yakobo 2:23, 25.