Kabili tontonkanyeni na pa mwanakashi beta Keiko. Pa kwafwiwa na Baibolo, alekele imibele yonse iyabipa pamo ngo kupepo tulubi, bucisenene, no kusobela ifya ku ntanshi. Nalyo line, Keiko asumina ukuti: “Icikalamba icalencilikila ni fwaka. Nalyeseshe pa miku iingi ukuleka ukupeepa lelo nalefilwa.”

Nga Keiko, uwakunkwime kuli fwaka, bushe cinshi cacitike kuli wene? Nkashi yesu uwalesambilila Baibolo na o amwebele ukubelenga ifipande fyalekanalekana muli Loneni! ifilanda pa kukunkuma kuli fwaka. Keiko akambatike na mashiwi yaba pali 2 Abena Korinti 7:1 muli motoka wakwe nge ca kumucinkulako cila bushiku ukuba uwasanguluka lyonse kuli Yehova. Nalyo line, alifililwe ukuleka. Keiko e bukisha ati: “Nalifulilwe icibi pa fyo nalecita. E co natendeke ukuipusha ico nalefwaisha—bushe nalefwaya ukubombela Yehova nelyo Satana?” Ilyo apingwilepo ukuti ni Yehova alefwaya ukubombela, apepele no mukoosha ukulomba ubwafwilisho. Aibukisha ati: “Icampapwishe ca kuti, nalilekele ukupepa ukwabula no kucula sana. Ntila fye, cinshi ico nshacitile ifi bwangu?”