Fwe Bantunse Kuti Twaba aba Cishinka!

16. Cinshi citulanga ukuti abantunse kuti baba ne cishinka kuli Lesa?

¹⁶ Umutumwa Paulo alilangile ukuti abantu kuti batungilila bumulopwe bwa kwa Yehova no kuba aba cishinka, ilyo alembele ukuti: “Takuli ubwesho ubwamuponena ubushiponenako abantu bambi. Lelo Lesa wa cishinka, kabili takamuleke ukweshiwa ubwesho ubo mushingashipikisha, lelo ilyo ubo bwesho bwaisa akafwaya na pa kuti mufuminemo pa kuti mube na maka ya kubushipikisha.” (1 Kor. 10:13) Bushe amesho Paulo alandilepo yafuma kwi, kabili bushe Lesa atupeela shani apa kufuminamo?

20, 21. Bushe Lesa atufwaila shani ‘umwa kufumina’ nga twaponenwa na mesho?

²⁰ Yehova ‘alafwaya apa kuti tufumine’ mu bwesho ukupitila mu kutukosha ukucimfya ubwesho. Ku ca kumwenako abantu kuti batucusha no kutuuma pa kuti tunenuke. Nga batucusha kuti twasuka twanenuka pa kuti betwalilila ukutuma, ukutulungulusha, nangu pa kuti betwipaya. Lelo ukulingana na mashiwi Paulo alandile ayaba pali 1 Abena Korinti 10:13, twalishiba ukuti ifilenga twaba mu bwesho, fiba fye fya pa kashita akanono. Yehova te kuti aleke fyatwalilila mpaka twafilwa ukuba ne cishinka kuli ena. Lesa kuti akosha icitetekelo cesu no kutupeela amaka pa kuti twatwalilila ukuba aba cishinka.

²¹ Yehova alatukosha ukupitila mu mupashi wakwe uwa mushilo. Umupashi wakwe ulalenga no kuti twaibukisha Amalembo ayengatwafwa ukucimfya amesho. (Yoh. 14:26) E ico tatubelelekwa ukucita ifyabipa. Ku ca kumwenako, twalishiba imilandu yaima iyakuma bumulopwe bwa kwa Yehova na bucishinka bwa bantunse. Ukwishiba iyi milandu kulalenga abengi ukutwalilila ukuba aba cishinka kuli Lesa mpaka ne mfwa. Lelo te mfwa ilenga bakwate apa kufumina, ni Yehova abaafwa ukushipikisha ukwabula ukunenuka. Na ifwe bene kuti atwafwa. Na kuba alatwafwa no kupitila muli bamalaika bakwe, imipashi iibombela abantu, “iyatumwa ku kubombela abakapusuka.” (Heb. 1:14)