Bushe Inshita Ilamucepela?

NGA ca kutila mucongele mu kabokoshi ka bubili nelyo aka butatu pali ifi fipusho fili ku mbali, ninshi napamo inshita ilamucepela. Kabili te imwe mweka icepela. Mupepi fye na bantu bonse mu calo balikwata ifya kucita ifingi nga nshi, kabili ifi nalimo te fintu ifyacindama sana kuli bena. Lelo fiba fye fintu ifilefwaikwa ukubombelwapo apo pene, pamo nga ukulungisha motoka, ukucita ifyo abakalamba ba ncito balefwaya, nelyo ukubombela pa fyo bashacilaenekela. Ilyo mulebombela pa fya musango uyu, kuti mwalamona kwati inshita ilemucepela. Kuti mulemona fye no kuti tamwatala amukwatapo inshita iya kuipakisha ubumi.

Kwena, limbi kuti mwatila kantale mombe iyi ncito pantu te ya lyonse. Nga napwa ukubombelapo e lyo nkabika amano ku fyo nacindamika ifindetela insansa pamo no lupwa lwandi e lyo na bantu bambi. Nomba ni lilali ilyo line? Bushe mulemona ukuti ni lelo mwingakwata iyo nshita? Bushe ni uno mulungu? Nangu ni uyu mweshi uleisa?

Ukulanda fye icishinka, ifya kucita muno calo tafyakatale aficepa. Lelo kuti mwacitapo cimo pa kuti mulekwata inshita. Kuti mwacita shani pa kuti mulekwata nshita?

[Akabokoshi pe bula 25]

Miku inga mukwata inshita ya kucita ifyacindamisha?

◯ Cila bushiku

◯ Pa mpela ya mulungu

◯ Nshikwata

Bushe cila bushiku

◯ Mulacita fyonse ifyo mwacipekanya?

◯ Mubombela fye pa fintu ifyo mushacipanga?

◯ Mucita fye fyonse ifyaisa, cikulu fye nafisa?

Bushe cila bushiku

◯ Mulashininkisha ukuti namucita fyonse ifyo mwapangile?

◯ Mulapatikishiwa ukubombesha pa kuti fye mucite ifyo bambi balefwaya?

◯ Incito ilafulisha ica kuti muleti mwapwisha fye iyi mwatampa imbi?

Ilyo ubushiku bwapwa, bushe

◯ Namupwisha ukucita ifyacindama?

◯ Namupwisha ukucita ifya cilafwaikwa, nangu cingati tamufibombele bwino bwino?

◯ Tamwacikwata inshita ya kucita ifyacindisha?

Bushe ilingi mumfwa shani ilyo ubushiku bwapwa?

◯ Ndomfwa uwa nsansa pa fyo nacibomba

◯ Ndomfwa ukunaka kabili ndafuupulwa

◯ Ng’umfwa kwati tapali ifyo ncitile

Bomfyeni Bwino Inshita Yenu

“Icintu conse calikwata inshita ya ciko.”—Lukala Milandu 3:1.

PA KUTI mulekwata inshita ya kucita ifyacindama, mufwile ukwishiba ifyo fine ifyacindama. Ici cikamwangukila nga namwishiba bwino bwino ifyo mwacindika, ifyo mufwaya ukucita, e lyo ne milimo imbi iitungilila ifi.

Ica ntanshi, kanshi mulingile ukwishiba bwino ifyo mwacindika. Lembeni fyonse ifyo muletontonkanya ukuti e fyacindama, ifintu pamo nga ulupwa, ifibusa, incito, amasambililo, ifyo mufwaya ukucita, ukuipempenkanya, indalama, insansa, icupo, ukuba ne cikuuku, ubumi busuma, na bukapepa. Nomba, ipusheni amuti, ‘Ni cisa pali ifi fyonse icacindama sana kuli ine?’

Pa numa ya kucita ifi, tantikeni nomba fyonse ifyo mufwaya ukucita mu bumi bwenu. Bupusano nshi buli pa fyacindama ne fyo mufwaya ukucita? Pa mulandu wa ili lyashi tulelandapo, kuti twasosa ukuti ifyo twacindika tafipwa, lelo ifyo tufwaya ukucita fyena filasuka fyapwa.

Finshi mwingafwaya ukucita? Bushe mufwaya ukukwata inshita iikalamba iya kuba pamo no lupwa lwenu? Bushe mufwaya incito iingalamushilako inshita? Bushe mufwaya ukuwamyako ifyo mucita ilyo mwainuka ku ncito? Bushe mulefwaya ukutendeka ukucita fimbi? Bushe mulefwaya ukulundako imibele isuma ku yo mwakwata? Bushe mulefwaya ukuba pa cuti? Bushe mulefwaya ukutendeka ukubelenga icitabo cimo? Bushe mulefwaya ukulemba ibuuku?

Lyena, pali ifi mufwaya ukucita salenipo ifyacindama sana kuli imwe. Shininkisheni ukuti fileumfwana na filya mwacindika. Ku ca kumwenako, nga ca kutila mwatila ine ico ndefwaya kunonka sana, mukaipikanishisha fye imikalile.

Nomba pa fyo mufwaya ukucita ifyo mwacisala, tontonkanyeni pa milimo imo imo iingalenga mwafishapo fyonse ifyo musalile. Ku ca kumwenako, nga ca kuti pa fyo mufwaya ukucita pali no kufwaya ukondako, ukutukusha umubili e mulimo wingamwafwa ukufikilisha ifyo mulefwaya.

Bushe Ukulemba Ifi Fyonse Kuti Kwamwafwa Shani?

Nga ca kuti ifyo mufwaya ukucita fyaumfwana ne fintu ifyo mwacindika kabili mulecita ne milimo iyafwilisha ukufishapo ifyo mufwaya ukucita, imikalile yenu ikalondoloka. Mukasanga ukuti mulekwata inshita ya kucita ifyo mwacindamika sana. Kwena, ico tacilolele mu kuti tamufwile ukubikako amano ku fyo bambi balekabila ne fyo balefwaya. (Abena Filipi 2:4) Lelo cilolele mu kuti mukakwata amaka ya kwishiba ifishacindama no kukanafikonkelela.

Kwena inshita shimo kukalaisa imilimo mushile-enekela. Iyi imilimo napamo te kuti ibe iyacindama sana lelo ilakabilwa. Imilimo ya musango uyu napamo eingafula, ica kuti mwashala fye ne nshita iinono nangu inshita yonse yapwila fye kuli iyi yine milimo mwafilwa no kucita ifyacindama. Kabili kuti kwacitika ifyo mushile-enekela. E lyo ifintu nga fya-aluka mu mikalile yenu kuti fyafulunganya fyonse ifyo mwatantika. Lelo nga mwakonka uku kupanda amano pa kutila mulesanga inshita ya kucitamo ifyacindama, mukasanga ukuti mulebomfya bwino inshita ya kucita ifyo mufwaya kabili imikalile yenu ikawama.

[Akabokoshi ne Cikope pe bula 28]

BUSHE UTUMAKOMPYUTA TWA MU MINWE TULONAULA INSHITA?

Bamo tatubonawila bambi nabo tulabonawila. Ku ca kumwenako, kakompyuta ka mu minwe ako beta ati PDA (Personal Digital Assistant), kalikwata kalenda, amanambala ya foni na ma adresi ya bantu, apa kulemba ifyo umuntu alefwaya ukucita, kamera, e lyo na Intaneti. Aka kakompyuta kuti kamwafwa ukukanaonaula inshita nga mulelembamo ifyo mulefwaya ukucita cila bushiku no kukasenda konse uko muleya. Nomba kuti muleonaula inshita nga ca kutila mulefwayafwaya ifyo mushilekabila pa Intaneti, ukulakangasha fye, ukwalula-alulamo fimo nelyo ukubikilamo ifishacindama, nangu nga e ko mwabika sana amano ukucila ukubika amano ku bantu nelyo ku milimo yacindama.

Tumupandeko amano: Ilyo tamulakashita, ishibilenipo ifingi. Nga kalafwafwafwa, mukalakabila inshita ikalamba iya kukalungisha. Kabili ukukosa kwa cipe ca malaiti conse kukonka ne fyo umwine alecibomfya. Kanshi nga mwalikakwata, mulekabomfya bwino pa kuti kelamonawila inshita.

[Icikope pe bula 26, 27]

Bushe kuti mwasanga inshita ya kucita ifyacindama?