“Badokota” Banyongotoka Kabili Abafwaisha Ukulya
Nangu abengi teti batemwe ukumfwa ici, icintu ico baletunga ukuba dokota musuma kabili uwa busaka nacitendeka ukuseeka na kabili—no yu dokota mutiti. Ilyashi lyali mu lupapulo lwa The Journal of the American Medical Association (JAMA) lyatile badokota abengi ku United Kingdom baeseshe ukusambilila pa bantu 12 abakwete ifilonda ku molu. Abantu 6 baeseshe ukubondapa ukubomfya inshila babomfya lyonse iya kubomfya hydrogel, kabili bambi 6 babondepe ne mititi.a
Ba JAMA batile: “Abalwele bonse 6 abo baleundapa ifilonda ukubomfya imititi balipolele ilyo papitile inshiku shitatu.” Kuli balya baundepe filya bondapa lyonse, “babili epela e bapolele ilyo papitile umweshi umo uwa kundapwa; aba bambi bane balekabila ukundapwa na kabili.” Ulupapulo lwa ku Britain ululanda pa fya cipatala ulo beta The Lancet lwatile ukundapa ukubomfya imititi “kuti kwacefyako nga nshi imiku umuntu aundapwa nga kulinganya ku nshila babomfya lyonse” kabili “indalama shipooswapo nalimo ni hafu wa shipooswa nga babomfya hydrogel.”
Ilyo baleundapa ukubomfya imititi—nalimo pa cilonda icitalele—badokota babikapo imititi ishilakula sana kabili iishingafyala imititi imbi, e fyasosele ba JAMA. (Kwena, badokota babomfya fye imisango ya mititi iishingambukila insandesande ishishikwete icilonda.) Lyene balakakila icilonda ne nsalu yaanguka ne nsalu imbi iyonka amenshi ku kwikata insandensande shafwa ishili isha menshi menshi. Ilyo imititi yaikuta, ilafumishiwapo no kupooswa, kabili balabikapo iipya ukufikila icilonda capola. Lyene, ilyo umulopa watendeka ukuya ku nsandesande ishituntulu ulenga pabe umunofu uwabula ubulwele.
Uwasambilila ifya kulepula impito sha mulopa Michael Walker atile “takwaba umulwele uwakaana ukundapwa ne mititi. Badokota e batwishika imititi, te balwele iyo.” Ukulunda pali ba United Kingdom, ba United States na ba Canada na bo balondapa ukubomfya imititi mu fipatala fimo. Na kuba, dokota umo uo balembele muli The Lancet atile “kuli abalwele abengi mu United States abalefwaya ukuundapwa ukubomfya imititi lelo badokota abondapa ukubomfya iyi nshila banono.”
Ukundapa kwa kubomfya imititi kwasangilwe fye kuli cela mushuke. Ulupapulo lwa Science World lwatile: “Badokota baleundapa abashilika bamwene ukuti ifilonda fya bashilika ifyakwete imititi fyalepoola bwangu ukucila filya ifishakwete imititi. Awe tapapitile ne nshita no kundapa kwa kubomfya imititi kwalitendeke.” Kabili nomba kulebomfiwa mu fipatala ifingi mu United States na ku Bulaya.
[Futunoti]
a Iyi micitile yapusanako no kubomfya umunsundu ku kufumya umulopa mu mubili. Moneni Ulupungu lwa kwa Kalinda ulwa August 1, 1982, ibula 30.
[Icikope pe bula 30]
Imititi ili pa munwe (filya fine yaba ubukulu)
[Abatusuminishe]
Picture copyright SMTL, http://www.smtl.co.uk/
[Ifikope pe bula 30]
Ilyo bashilaundapa
Pa numa ya kundapa
[Abatusuminishe]
Fyakopelwe na R. Sherman, uwa pa University of California, Irvine