ISAMBILILO 26

Cinshi Ifyabipa Ficitikila, Kabili Cinshi Abantu Baculila?

Ifimoneka Ulwapulintwa

Ifyabipa nga fyacitika, mu cifyalilwa fye tulayipusha ukuti, “Cinshi fyacitikila?” Nomba icawamako ca kuti Baibo yalyasuka ici cipusho.

1. Finshi Satana acitile pa kuti ifyabipa fitendeke ukucitika pano calo?

Satana Kaseebanya alipondokele Lesa. Satana alefwaya ukuba kateka, e ico alitunkile Adamu na Efa ukuti nabo bapondokele Lesa. Pa kuti acite ifi alibepele Efa. (Ukutendeka 3:1-5) Alilengele Efa alatontonkanya ukuti Yehova alimufishile ifisuma. Mu mashiwi yambi aleti abantunse kuti baba ne nsansa sana nga tabaleumfwila Lesa. Umuku wa kubalilapo Satana abepele ni lilya aebele Efa ukuti taali no kufwa. E mulandu wine Baibo ilandila ukuti Satana “wa bufi kabili e wishi wa bufi.”—Yohane 8:44.

2. Cinshi Adamu na Efa basalilepo ukucita?

Yehova alipeele Adamu na Efa fyonse ifyo balekabila. Abebele ukutila kuti balya ku fimuti fyonse ifyali mwi bala lya Edeni, ukufumyako fye icimuti cimo. (Ukutendeka 2:15-17) Lelo basalilepo ukulya kuli cilya icimuti abakeenye. Efa ‘alisabileko ifisabo no kulya alya.’ Pa numa, Adamu na o ‘aliliile.’ (Ukutendeka 3:6) Bonse babili tabaumfwilile Lesa. Apo Adamu na Efa bali abapwililika, bali no kulacita fye ifyalungama lyonse. Nomba apo basalilepo ukukanaumfwila Lesa ku mufulo fye, balibembwike kabili balikeene ukuti Lesa alebateka. Ifi basalilepo ukucita fyalibaletelele.—Ukutendeka 3:16-19.

3. Bushe ifyo Adamu na Efa basalilepo ukucita fyatukuma shani?

Ilyo Adamu na Efa babembwike, baishileba abashapwililika. Kanshi na bana bali no kukwata nabo bali no kuba abashapwililika. Baibo ilanda pali Adamu ukuti: “Ulubembu lwaingilile mu mwaume umo pano calo ne mfwa yaingilile mu lubembu, e fyo ne mfwa yasalanganine ku bantu bonse.”—Abena Roma 5:12.

Kwaliba ifingi ifilenga tulecula. Inshita shimo icilenga tulecula kukanasala bwino ifya kucita. E lyo inshita shimbi tulacula pa mulandu wa fyabipa ifyo bambi basalapo ukucita. E lyo inshita shimbi nasho, tulacula pa mulandu wa kuti twasangwa apo ifyabipa fyacitikila.—Belengeni Lukala Milandu 9:11.

SAMBILILENI NA FIMBI

Sambilileni ico twingalandila ukuti Lesa te ulenga ifyabipa filecitika, kabili te ulenga abantu balecula. Sambilileni na pa fyo omfwa nga tulecula.

4. Uulenga tulecula

Abantu abengi baishiba ukuti Lesa e uteka icalo. Bushe ca cine e uteka? Tambeni VIDIO.

VIDIO: Nani Ateka Cino Calo? (1:24)

Belengeni Yakobo 1:13 na 1 Yohane 5:19, lyena lanshanyeni ici cipusho:

Bushe Lesa e ulenga tulecula?

5. Finshi fyacitika ukutula apo Satana atendekele ukuteka?

Tambeni VIDIO.

VIDIO: Mulandu Nshi Lesa Asuminishisha Ukucula?—Iyo Baipifya (3:07)

Belengeni Ukutendeka 3:1-6, lyena lanshanyeni aya mepusho:

Bufi nshi Satana abepele?—Moneni icikomo 4 na 5.
Finshi Satana alandile ifyalengele camoneka kwati Yehova alefisa ifisuma ku bantunse?
Ukulingana ne lembo twacibelenga, bushe Satana aloseshe mu kuti abantunse kuti baba ne nsansa Yehova nga alebateka?

Belengeni Lukala Milandu 8:9, lyena lanshanyeni ici cipusho:

Finshi fyacitika ifi Yehova ashiteka isonde?

Icikope: Ifikope ifilelanga ifyo ifintu fyaba mu calo ukutula apo Lesa abumbiile isonde ukufika ilyo likaba Paradaise. A. Isonde ninshi lili paradaise. B. Ifyacitika ukutula apo abantu batendekele ukuiteka, mwi sonde lyonse mwaliba ukupepa kwa bufi, ifyalo ukukanaumfwana, inkondo, e lyo ne fyo abantu bonaula isonde. Amabuteko yamo ayakwatisha amaka, Egypt, China, Greece, Rome, Great Britain, na United States. C. Abantu baleikala muli Paradaise pano isonde.

Adamu na Efa bali abapwililika kabili baleikala mu Paradaise. Lelo baumfwilile Satana no kupondokela Yehova
Ilyo Adamu na Efa bapondweke, balilengele abantu bonse baba abashapwililika, balacula, no kufwa
Yehova akafumyapo ulubembu, ukucula, e lyo ne mfwa. Kabili ici cikalenga abantunse bakabe abapwililika na kabili no kulaikala mu Paradaise

6. Yehova tomfwa bwino nga tulecula

Bushe Lesa omfwa shani nga tulecula? Moneni ifyo Imfumu Davidi no mutumwa Petro balembele. Belengeni Amalumbo 31:7 na 1 Petro 5:7, lyena lanshanyeni ici cipusho:

Bushe mwaumfwa shani ifi mwaishiba ukuti Yehova aleshiba nga mulecula kabili alomfwa ububi?

7. Lesa akapwisha amafya yonse ayo tukwata

Belengeni Esaya 65:17 na Ukusokolola 21:3, 4, lyena lanshanyeni ici cipusho:

Mulandu nshi ukwishibila ukuti Yehova akafumyapo ifyabipa fyonse ifilenga tulecula kutusansamushisha?

Bushe mwalishiba ici cishinka?

Ilyo Satana abepele ubufi bwa kubalilapo, aliseebenye Yehova. Alilengele abantu balatontonkanya ifyabipa pali Yehova, ilyo alandile ukuti Yehova taba no mulinganya kabili ni Kateka uushaba no kutemwa. Ilyo Yehova akafumyapo ifyabipa nomba line, akalenga cikeshibikwe ukuti e Kateka umusuma sana. Kabili ici cikalenga ishina lyakwe likacindikwe. Ukulenga ishina lya kwa Yehova lyacindikwa, e cintu icacindama sana ku muulu na pano isonde. —Mateo 6:9, 10.

ABANTU BAMO BATILA: “Icilenga tulecula kufwaya kwa kwa Lesa.”

Inga imwe muletipo shani?

IFYO MUSAMBILILE

Satana Kaseebanya, Adamu, e lyo na Efa e balenga ukuti kube ifyabipa ificitika mu calo. Yehova alomfwa ububi nga tulecula, kabili nomba line fye ali no kufumyapo fyonse ifilenga tulecula.