Cinshi Tukotela no Kufwa?
LESA tatupangile ukuti tulefwa. Abafyashi besu aba kubalilapo Adamu na Efa bali abapwililika kabili nga bacili aba mweo na pali ino ine nshita. Amashiwi Yehova aebele Adamu aya kuti talingile ukulya icisabo ca muti umo uwali mwi bala lya Edeni, e yalanga ukuti nga tabalile ku cisabo nga tabafwile.
Lesa aebele Adamu ukuti, “mu bushiku ukalyako [ku muti] ukufwa ukafwa.” (Ukutendeka 2:17) Nga ca kuti Adamu ali no kukota no kufwa, Lesa nga tamwebele aya mashiwi. Adamu alishibe ukuti nga taliile icisabo ca uyu muti nga tafwile.
LESA TALEFWAYA UKUTI ABANTU BALEFWA
Filya Adamu na Efa baliile icisabo ca muti babakeenye wali mufulo, pantu mwi bala lya Edeni mwali imiti iingi iyaletwala ifisabo ifyo bali no kulalya. (Ukutendeka 2:9) Nga ca kuti Adamu na Efa tabaliile icisabo ca muti ulya, nga balilangile ukuti balyumfwilile Lesa uwabapeele ubumi. Na kabili nga balangile ukutila balefwaya Lesa alebatungulula.
UMULANDU ADAMU NA EFA BAFWILILE
Pa kuti twishibe bwino icalengele Adamu na Efa bafwe, tulingile ukutontonkanya sana pa fyo Satana alanshenye nabo ifyakuma ifwe bonse. Satana Kaseebanya abomfeshe insoka pa kubepa Adamu na Efa. Baibolo ilanda ukuti: “Insoka e yali iyacenjela sana. Kabili insoka yaipwishe umwanakashi aiti: ‘Bushe ca cine Lesa amwebele ukuti mwilalyako ku muti onse uwa mwi bala?’”—Ukutendeka 3:1.
Efa ayaswike ati: “Ku fisabo fya miti yonse iya mwi bala kuti twalyako. Lelo ifisabo fya ku muti uwaba pa kati ke bala, Lesa atila, ‘Mwilalyako iyo, kabili mwilakumyako epali mwafwa.’” Lyena Satana amwebele ati: “Ukufwa tamwakafwe. Pantu Lesa alishiba ukuti mu bushiku mukalyako e mo amenso yenu yakashibulwa kabili mukaba nga Lesa, mukeshiba ubusuma no bubi.” Kanshi Satana aleti Yehova wa bufi no kuti alefisa ifisuma kuli Adamu na Efa.—Ukutendeka 3:2-5.
Efa alisumine ifyo Satana amwebele. Lyena alilolekeshe umuti kabili aliukumbilwe. E ico alisabileko icisabo no kulya. Baibolo ilanda ukuti: “Pa numa, apeeleko umulume wakwe ilyo aali nankwe, na o e fyo aliile.”—Ukutendeka 3:6.
Lesa aebele Adamu ukuti: “Mu bushiku ukalyako ukufwa ukafwa.”—UKUTENDEKA 2:17
Lesa afwile alyumfwile sana ububi pa fyo abana abo atemenwe bafililwe ukumumfwila ku mufulo fye. Finshi acitile? Yehova aebele Adamu ati: ‘ukabwelela ku mushili, pantu e ko wafumine. Pantu uli lukungu, kabili ku lukungu e ko ukabwelela.’ (Ukutendeka 3:17-19) E ico, “inshiku shonse isho Adamu aikele shali imyaka 930.” (Ukutendeka 5:5) Ilyo Adamu afwile, taile ku muulu nelyo ku cifulo cimbi ukwaba imipashi. Taliko ilyo Yehova talamubumba ukufuma ku lukungu. Kanshi ilyo afwile, tali no mweo, ali fye kwati lukungu ulo Lesa abomfeshe pa kumupanga. Alilekele ukubako. Ala calibipile!
ICALENGA TWIBA ABAPWILILIKA
Apo Adamu na Efa tabaumfwilile Lesa, baishileba abashapwililika kabili tabali no kulaikala umuyayaya. Ifyo bacitile fyalikumine na bana bali no kukwata. Apo Adamu na Efa tabali abapwililika, abantu bonse bafyalwa abashapwililika. Baibolo pa Abena Roma 5:12 itila: “Ulubembu lwaingilile mu muntu umo [Adamu] pano calo ne mfwa yaingilile mu lubembu, e fyo ne mfwa yasalanganine ku bantu bonse pantu bonse balibembwike.”
Baibolo ilinganya ulubembu ne mfwa ku “ca kukupa icikupa abantu bonse, ne nsalu yapikulwa iyakupa inko shonse.” (Esaya 25:7) Imfwa yalikupa abantu bonse nga filya umwela wingepaya abantu bonse nga ca kuti muli sumu. E ico “bonse bafwila muli Adamu.” (1 Abena Korinti 15:22) Kanshi kuti twayipusha nge fyo umutumwa Paulo ayipwishe ukuti: “Nani akampokolola kuli uno mubili uulentwala ku mfwa?” Bushe kwaliba uwingatupokolola ku mfwa?—Abena Roma 7:24.