Bushe Yehova Aba Shani?

Nga mwatontonkanya pali Yehova Lesa, bushe mwelenganya ukuti aba shani? Bushe mumona ukuti muntu umusuma nga nshi lelo uwaba ukutali sana, nga filya intanda ishimoneka bwino shaba ukutali sana? Nelyo bushe mwelenganya ukuti alikwata sana amaka lelo te muntu wa cine cine, nga filya inkuba yaba? Bushe Yehova aba shani? Baibo ilatweba imibele imo iyo Yehova akwata, kabili ilatweba no kuti alimubikako amano.

1. Cinshi calenga ukuti twilamona Lesa?

“Lesa Mupashi.” (Yohane 4:24) Yehova takwata umubili nga uyu twakwata. Ena Mupashi kabili ekala ku muulu uko tushingamona.

2. Mibele nshi imo iyo Yehova akwata?

Nangu ca kuti Yehova tamoneka, e ko aba, wa cine cine kabili alikwata imibele iisuma nga nshi iilenga abamwishiba bamutemwa. Baibo itila: “Yehova atemwa umulinganya, Kabili takalekeleshe ababa ne cishinka kuli ena.” (Amalumbo 37:28) Na kabili Yehova “aliba no kutemwa nga nshi kabili wa luse sana,” maka maka ku balecula. (Yakobo 5:11) “Yehova alaba mupepi na baba no bulanda; alapususha abasakamikwa.” (Amalumbo 34:18) Bushe mwalishiba ukuti ifyo tucita kuti fyalenga Yehova alesekelela nelyo aba no bulanda? Umuntu nga asalapo ukucita ifyabipa Yehova alomfwa ububi kabili alaba no bulanda. (Amalumbo 78:40, 41) Lelo umuntu nga alecita ifyalungama alalenga Yehova ukusekelela.—Belengeni Amapinda 27:11.

3. Bushe Yehova alanga shani ukuti alitutemwa?

Imibele ya kwa Yehova iyapulamo kutemwa. Na kuba “Lesa kutemwa.” (1 Yohane 4:8) Ifyaba mu Baibo te filanga fye ukuti Yehova alitutemwa, lelo ne fyo abumba. (Belengeni Imilimo 14:17.) Ku ca kumwenako, tontonkanyeni pa fyo atubumba. Atubumba mu nshila ya kuti tulemona amalangi ayasuma, tulekutika ku nyimbo ishisuma, kabili tulesonda ifya kulya ifisuma. Kanshi afwaya tuleipakisha ubumi.

SAMBILILENI NA FIMBI

4. Umupashi wa mushilo maka ayo Lesa abomfya pa kucita ifintu

Nga filya fine tubomfya amaboko pa kubomba imilimo, Yehova na o abomfya umupashi wakwe uwa mushilo. Baibo ilanda ukuti umupashi wa mushilo te muntu, lelo maka ayo Lesa abomfya pa kucita ifintu. Belengeni Luka 11:13 na Imilimo 2:17, lyena lanshanyeni aya mepusho:

• Lesa ‘akapongolwela’ umupashi wakwe uwa mushilo pa bamulomba. E co bushe muletontonkanya ukuti umupashi wa mushilo muntu, nelyo maka ayo Lesa abomfya pa kucita ifintu? Cinshi mwalandila ifyo?

Yehova alabomfya umupashi wakwe uwa mushilo pa kucita ifintu ifya kupapusha. Belengeni Amalumbo 33:6; na 2 Petro 1:20, 21, lyena lanshanyeni ici cipusho:

• Ni nshila nshi shimo isho Yehova abomfeshemo umupashi wakwe uwa mushilo?

5. Yehova alikwata imibele iisuma nga nshi

Mose ali ni kapepa wa cishinka uwa kwa Lesa, lelo alefwaya ukwishiba bwino Kabumba wakwe. E ico Mose aebele Lesa ati: “Shi nengeni njishibe ifyo mucita pa kuti imwishibe.” (Ukufuma 33:13) Lyena Yehova aebele Mose imibele imo iyo akwata. Belengeni Ukufuma 34:4-6, lyena lanshanyeni aya mepusho:

• Mibele nshi Yehova akwata iyo aebele Mose?

• Mibele nshi iya kwa Yehova iyo mwatemwapo sana?

6. Yehova alasakamana abantu

Abantu ba kwa Lesa abaHebere bali abasha mu Egupti. Bushe Yehova aleumfwa shani ilyo abantu bakwe balecula? Lisheni ILYASHI LYA MU BAIBO ILYO BABELENGA no kukonkamo, nelyo belengeni Ukufuma 3:1-10. Lyena lanshanyeni amepusho yakonkapo.

ILYASHI LYA MU BAIBO ILYO BABELENGA: Yehova Alibasakamene ilyo Balecula (2:45)

• Bushe ili lyashi lyalenga mwaishiba ukuti Yehova omfwa shani abantunse nga balecula?—Moneni ifikomo 7 na 8.

• Bushe mulemona ukuti Yehova alafwaisha ukwafwa abantu, kabili bushe alikwata amaka ya kubafwa? Cinshi mwa-asukila ifyo?

7. Kuti twasambilila imibele ya kwa Yehova ku fintu abumba

Ifyo Yehova abumba filatulanga imibele akwata. Tambeni VIDIO. Lyena belengeni Abena Roma 1:20, no kulanshanya icipusho cakonkapo.

VIDIO: Ifyo Yehova Abumba Filanga Ukuti Aliba no Kutemwa—Umubili wa Muntu (1:57)

• Mibele nshi iya kwa Yehova iyo mumona mu fyo abumba?

IFYO MUSAMBILILE

Yehova Mupashi uushimoneka, kabili alikwata imibele iisuma iingi, maka maka ukutemwa.

Ukupitulukamo

• Cinshi calenga twilamona Yehova?

• Bushe umupashi wa mushilo ni cinshi?

• Mibele nshi imo imo iyo Yehova akwata?

ISHIBILENIPO NA FIMBI

Sambilileni na fimbi pa mibele 4 iyacindama iyo Yehova akwata.

“Bushe Lesa aba Shani?” (Ulupungu lwa kwa Kalinda Na. 1 2019)

Moneni ifilanga ukuti Yehova taba mpanga yonse.

“Bushe Lesa Aba Fye Mpanga Yonse?” (Icipande ca pa jw.org)

Moneni ico Baibo ipashanishisha umupashi wa mushilo ku maboko ya kwa Lesa.

“Bushe Umupashi wa Mushilo Cinshi?” (Icipande ca pa jw.org)

Umwaume umo uushimona calimukosele ukusumina ukuti Lesa alamusakamana. Moneni ifyalengele alule ifyo aletontonkanya.

“Pali ino Nshita Nalishiba Ukutila Kuti Nayafwilishako Bambi” (Ulupungu lwa kwa Kalinda, October 1, 2015)