Amano ya ‘Kumwena Libela Ifikacitika’

“LUKO ulushaba na mano no mucetekanya. Ababa na mano, kuti baumfwikisha ici no kumwena libela ifikabacitikila.”—Amalango 32:28, 29, Beck.

Aya mashiwi yalandilwe na Mose ku bena Israele ilintu bafikile pa mupaka wa Calo Calaiwe. Mose alesobela inshita lintu bali no kufutuka Yehova no kukanayangwako ku fyali no kufumamo mu ncitilo shabo. Imyaka iingi iyakonkelepo, abena Israele, kumo ne mfumu shabo ishingi basuulile ukusoka kwa kwa Lesa.

Ku ca kumwenako, Solomone alishibe ikambisho lya kwa Lesa ilya kukanaupa abapepa imilungu imbi kano fye Yehova. (Amalango 7:1-4) Nangu cibe fyo, aishileupa “abanakashi bambi bambi abengi.” Cinshi cafuminemo? Baibolo ilondololo kuti: “E lyo ku nshita Solomone ali mukote, ninshi abakashi bakwe bayalwilile umutima wakwe ku kukonke milungu imbi, no mutima wakwe tawali wa cishinka kuli Yehova Lesa wakwe, ngo mutima wa kwa Dabidi wishi.” (1 Ishamfumu 11:1, 4) Nangu cingati ali uwa mano, Solomone alibulishe amano ya ‘kumwena libela ifyali no kucitika’ nga atoba ikambisho lya kwa Lesa.

Ni shani pa lwa ifwe? Kuti twasengauko kukalipwa ukwingi nga twatontonkanishisha libela mu fyo tupingulapo ukucita mu bumi. Ku ca kumwenako, Abena Kristu bakonkomeshiwa ‘ukuisangulula ku kukantana konse kwa mubili no mutima.’ (2 Abena Korinti 7:1) Ici ca mano, lelo abengi tabakwata amano ya kumwena libela ifingacitika nga basuula uku kufunda kwa kwa Paulo. Ku ca kumwenako, abacaice abengi balaikowesha ukupitila mu kupeepa fwaka, batontonkanyo kuti ukupeepa kulenga balemoneka abasalapuka no kumoneka abakalamba. Fintu cibabipila lintu, ku bukalamba, abengi aba bene balwala amalwele ya ku mutima, kansa wa kuli bapwapwa, nelyo emphysema!

Calicindama ukutontonkanya sana pa fingafuma mu fyo tupingulapo ukucita na mu ncitilo shesu. Paulo alishibe bwino lintu alembele ati: “Ico umuntu abyala, e co akalobolola. Uubyala ku mubili wakwe wine, ku mubili akalobololako ukubola; lelo uubyala ku Mupashi, ku Mupashi wine akalobololako umweo wa muyayaya.”—Abena Galatia 6:7, 8.