Ifyo Mwingaba Cibusa Musuma Nga Kwaba Ifingalenga Bucibusa Bwenu Ukupwa
Ba Gianni na ba Maurizio baliba ifibusa pa myaka nalimo 50. Na lyo line kwali inshita imo ilyo kwacitike ifyalengele baleka ukuba ifibusa. Ba Maurizio balandile ati, “Nalipangile ifilubo ifyalengele twaleka ukuba ifibusa.” Ba Gianni na bo batile: “Ba Maurizio e balensambilisha Baibolo. E balengele nkose mu fya kwa Lesa. E ico calingafishe ukusumina ukuti nabacita ifyabipa. Nalyumfwile ububi pantu nalishibe ukuti tatwatwalilile ukuba ifibusa. Naumfwile kwati nabansha.”
UKUKWATA ifibusa ifisuma kwalicindama, kabili tulingile ukubombesha pa kuti twingatwalilila ukuba ifibusa. Finshi fingatwafwa ukutwalilila ukuba ifibusa nangu kwacitika ifingalenga bucibusa ukupwa? Kuti twasambilila ifingi ku bantu abalembwa mu Baibolo abali ifibusa sana lelo abakwete amafya ayali no kulenga bucibusa bwabo ukupwa.
NGA CIBUSA WENU ALUFYANYA
Davidi uwali kacema kabili uwaishileba imfumu alikwete ifibusa ifisuma. Yonatani e o abantu abengi baishiba ukuti ali cibusa wa kwa Davidi. (1 Sam. 18:1) Lelo Davidi alikwete ifibusa na fimbi, pamo nga kasesema Natani. Baibolo tayalanda ilyo batendeke ukuba ifibusa. Lelo inshita imo Davidi alyebeleko Natani ifyo alefwaya ukucita nga filya fine na imwe mwingebako cibusa wenu. Davidi alefwaya ukukuulila Yehova ing’anda. Imfumu Davidi yalefwaya ukwishiba ifyo cibusa wakwe Natani uo Yehova apeele umupashi aletontonkanya.—2 Sam. 7:2, 3.
Na lyo line kwali ifyacitike ifyali no kulenga bucibusa bwabo ukupwa. Imfumu Davidi yalicitile ubucende na Bati-sheba, kabili yalipaishe Uria umulume wa kwa Bati-sheba. (2 Sam. 11:2-21) Pa myaka iingi Davidi ali uwa cishinka kuli Yehova kabili ali no mulinganya. Lelo alicitile ulubembu ulukalamba! Cinshi calengele ukuti imfumu iisuma ilufyanye? Bushe tayamwene ukuti ifyo yacitile fyalibipile icine cine? Bushe yalemona ukutila kuti yafisa Lesa ulubembu?
Finshi Natani ali no kucita? Bushe ali no kweba umuntu umbi ukuyaeba imfumu pa lubembu yacitile? Bambi balishibe ifyo Davidi acitile pa kuti epaishe Uria. Nomba mulandu nshi Natani ailile ku kweba imfumu ulubembu yacitile apo ukucita ifi kwali no kulenga bucibusa bwabo ukupwa? Ukuya mukweba imfumu pa lubembu kwali no kulenga aibika mu kaposa mweo. Na kuba, Davidi ninshi alipaisha kale Uria uwali uwa kaele.
Lelo Natani alelandilako Lesa. Uyu kasesema alishibe ukuti nga talandilepo pa lubembu Davidi acitile, nga balilekele ukuba ifibusa sana kabili kampingu yakwe nga yalemucusha. Cibusa wakwe Davidi alicitile ifyo Yehova apata. Imfumu Davidi yalekabila cibusa wa cine cine uwali no kuyafwa ukuba cibusa wa kwa Yehova na kabili. Natani ali cibusa wa cine cine. Pa kulanda pa fyo Davidi acitile, abomfeshe icilangililo icali no kufika Davidi pa mutima pantu alipo kacema. Natani alyebele Davidi ifyo Lesa amwebele, lelo alandile mu nshila iisuma pa kuti Davidi eshibe ifyo ulubembu acitile lwabipile, alapile e lyo asumine no ku musalapula.—2 Sam. 12:1-14.
Kuti mwacita shani nga cibusa wenu acita icilubo icikalamba nelyo ulubembu ulukalamba? Nalimo kuti mwatontonkanya ukuti nga mwayamwebapo kuti bucibusa bwenu bwapwa. Nelyo kuti mwamona kwati nga mwayaeba baeluda ulubembu cibusa wenu acitile, ninshi mwamwalukila. Nomba finshi mulingile ukucita?
Ba Gianni abo tulandilepo kale, batile: “Nalimwene ukuti ba Maurizio balyalwike. Tabalelanda ifyali ku mutima nga fintu cali kale. E ico napingwilepo ukuyalanda nabo, nangu ca kuti tacayangwike ukucita ifi. Naletontonkanya nati: ‘Finshi ningabeba pantu balishiba ifyo balingile ukucita! Nalimo kuti bafulwa nga nalanda nabo!’ Lelo ilyo naibukishe ifyo twasambililepo nabo, nalishipile kabili nalilandile babo. Na ine wine ilyo nalekabila ukwafwa ba Maurizio balingafwile. Nshalefwaya bucibusa bwesu ukupwa, lelo nalefwaya ukubafwa pantu nalibatemenwe.”
Ba Maurizio batile: “Ba Gianni tabampitile mu mbali kabili ifyo balandile fyali cine. Nalishibe ukuti te ba Gianni nelyo Yehova abalengele ukuti ncule ku fyafumine mu fyo nasalilepo ukucita. E ico baeluda balimfundile kabili mu kupita kwa nshita nali cibusa wa kwa Yehova na kabili.”
CIBUSA WENU NGA ALI NO BWAFYA
Davidi alikwete ifibusa na fimbi ifishamushiile ilyo ali na mafya. Umo pali ifi ifibusa ali ni Hushai, uo Baibolo ita ati “umunankwe Davidi.” (2 Sam. 16:16; 1 Imila. 27:33) Hushai nalimo ali ni cilolo uwali icibusa ca mfumu Davidi kabili limo limo e walebomba imilimo iyo imfumu ishalefwaya bambi beshibe.
Ilyo Abishalomu umwana wa kwa Davidi apokele ubufumu, abena Israele abengi baishileba ku lubali lwa kwa Abishalomu, lelo Hushai ena te fyo acitile. Ilyo Davidi alebutuka, Hushai alimukonkele. Davidi alyumfwile sana ububi pantu umwana wakwe alimwalukiile kumo fye na bantu abo acetekele. Lelo Hushai alitwalilile uwa cishinka, aliipeeleshe no kubika ubumi bwakwe mu kapoosa mweo pa kuti abombe umulimo uwali no kupwisha bucipondoka. Icalengele Hushai acite ifi te pa mulandu wa kuti wali mulimo wakwe, lelo ni co ali ni cibusa wa cishinka uwa kwa Davidi.—2 Sam. 15:13-17, 32-37; 16:15–17:16.
Tulatemwa sana ukumona ifyo bamunyinefwe na bankashi baikatana pa mulandu wa kuti fibusa fya cine cine te pa mulandu fye wa kuti e fyo bafwile ukucita nelyo pa mulandu wa mulimo babomba mu cilonganino. Ifi bacita ciba kwati baleti, “Nine cibusa obe pantu walicindama kuli ine te pa mulandu fye wa kuti mfwile fye ukuba cibusa obe.”
Ifi fine e fyo cali kuli munyinefwe Federico. Ilyo akwete ubwafya, cibusa wakwe Antonio alimwafwile. Ba Federico batile: “Tapakokwele ukutula apo ba Antonio bakukiile mu cilonganino cesu, twaishileba ifibusa. Bonse twali ababomfi batumikila kabili twaleumfwa bwino ukubombela pamo. Tapakokwele, ba Antonio balibasontele ukuba baeluda. Tabali fye cibusa candi lelo nalebapashanya mu fyo batemenwe ifya kwa Lesa.” Lyena ba Federico balilufyenye. Bwangu bwangu balile kuli baeluda ukuti babafwe, lelo balibapokele bupainiya no butumikila. Bushe ba Antonio bacitile shani?
Ilyo ba Federico bali no bwafya abanabo ba Antonio balekutika ilyo balelanda kabili balebakoselesha
Ba Federico batile: “Nalimwene ukuti ba Antonio baleumfwa ububi nga filya na ine naleumfwa. Balenkonselesha sana. Balefwaya sana ukuti nkabe cibusa wa kwa Lesa na kabili, e lyo tabandekeleshe. Balenkoselesha ukuti nikanenuka lelo nkakose mu fya kwa Lesa na kabili.” Ba Antonio batile: “Nalesangwa sana na ba Federico. Nalefwaya balenjeba fyonse ifyali ku mutima, ne fyalebakalifya.” Mu kupita kwa nshita ba Federico balikosele mu fya kwa Lesa, kabili balibasontele na kabili ukuba bapainiya no kuba umubomfi atumikila. Ba Antonio batile: “Nangu ca kuti pali ino nshita tatwaba mu cilonganino cimo cine, bucibusa bwesu balikosa sana.”
BUSHE MUKAMONA KWATI CIBUSA WENU NA MWALUKILA?
Kuti mwaumfwa shani nga cibusa wenu sana amwalukila pa nshita mulefwaya sana ukuti amwafwe? Kuti camukalipa sana. Nomba bushe kuti mwamwelela? Bushe kuti mwatwalilila ukuba ifibusa sana?
Tontonkanyeni pa fyacitikile Yesu pa bushiku bwa kulekeleshako pano isonde. Aleba lyonse na batumwa bakwe aba cishinka kabili balitemwanene. Yesu alebeta ati abanankwe. (Yoh. 15:15) Finshi fyacitike ilyo bamwikete? Abatumwa bonse balibutwike. Nangu ca kuti Petro alilandile ukuti takashe Shikulu wakwe, pali bulya bushiku alikeene Yesu ukuti tamwishibe!—Mat. 26:31-33, 56, 69-75.
Yesu alishibe ukuti ali no kuba fye eka muli bulya bwesho bwa kulekeleshako. Na lyo line taumfwile ububi. Ifyo alanshenye na basambi bakwe ilyo abuushiwe fyalangile ukuti taumfwile ububi, takalipe kabili talelanguluka. Yesu tatendeke ukupenda ifilubo ifyo abasambi bakwe bacitile, ukubikako fye ne fyo bacitile pa bushiku bamwikete.
Lelo Yesu alikoseleshe Petro na batumwa bambi. Alilangile ukuti alibacetekele ilyo abapeele umulimo uwacindama nga nshi uwa kusambilisha abantu. Yesu alitwalilile ukumona abatumwa ukuti bali fibusa fyakwe. Abatumwa tabalabile ifyo Yesu abatemenwe. Balibombeshe ukukanacita ifyali no kulenga Shikulu wabo aumfwa ububi. Na kuba balibombe bwino umulimo abapeele.—Imil. 1:8; Kol. 1:23.
Nkashi uwe shina lya Elvira talaba ilyo bapusene na cibusa wakwe Giuliana. Ba Elvira batile: “Ilyo anjebele ukuti nafulwa pa fyo nacitile, nalyumfwile sana ububi. Ca cine ifyo nacitile tafyaweme. Lelo icampapwishe ca kuti alimbikileko amano kabili alisakamene pa fyali no kucitika pa mulandu wa fyo nacitile. Nshakaleke ukutasha pa fyo ambikileko amano ukucila ukubika amano ku fyo namulufyenye. Nalitashishe Yehova pa kumpeela umunandi uushibika fye amano ku fyo aleumfwa lelo uubika sana amano ku fingangwamina.”
Finshi cibusa musuma alingile ukucita nga umunankwe ali mu bwafya? Alingile ukulanda nankwe mu cikuuku kabili limo talingile ukumupita mu mbali. Cibusa wa musango uyu aba kwati ni Natani na Hushai, abali ne cishinka na lintu ifintu fyayafishe, kabili aba nga Yesu uwaitemenwe ukwelela. Bushe na imwe e fyo mwaba?