17, 18. (a) Cinshi cacitike kuli Eliya mu musebo ilyo aleya ku Yesreele? (b) Cinshi cali icaibela pa fyo Eliya abutwike ukufuma ku Karmele ukufika ku Yesreele? (Moneni na futunoti.)

¹⁷ Kasesema wa kwa Yehova akonkele Ahabu pa numa muli ilya ine nshila. Uko aleya kwalilepele, e lyo kabili umuulu walifiitile ne mfula ninshi ileloka. Lelo kwali icintu caibela icacitike.

¹⁸ “Ukuboko kwa kwa Yehova kwali pali Eliya kabili ali-ipekenye, alibutwike no kutangilila Ahabu mpaka fye afika ku Yesreele.” (1 Isha. 18:46) Tatwingatwishika ukuti “ukuboko kwa kwa Yehova” kwaletungilila Eliya mu cisungusho. Ukufuma apo Eliya aali ukufika ku Yesreele pali amakilomita 30, e lyo Eliya tali mulumendo iyo.a Elenganyeni Eliya apimpa ica kufwala cakwe, no kucikakila mu ntungu pa kuti amolu yakwe yelakobamo pa kubutuka, e lyo atendeka ukubutuka mu musebo ninshi imfula nailoka. Alibutwike sana ica kutila asanga ne celeta lya mfumu Ahabu no kulipitilila alipitilila!

19. (a) Masesemo nshi ayo twingebukisha nga twatontonkanya pa fyo Lesa apeele Eliya amaka? (b) Ilyo Eliya alebutukila ku Yesreele, cinshi ico aishibe?

¹⁹ Lesa alipaalile sana Eliya! Afwile alyumfwile bwino sana pa kukwata amaka napamo ukucila fye na pa maka akwete ku bwaice. Ici cilenga twaibukisha na masesemo ayalanda ukuti mu Paradaise, aba cishinka bakekala bwino ukwabula ukulwala kabili bakaba abakosa. (Belengeni Esaya 35:6; Luka 23:43) Ilyo Eliya aleya alebutuka muli ulya musebo, umwali amatipa, alishibe ukuti Wishi, Yehova, Lesa wa cine eka, alitemenwe ico alecita!

1, 2. Cinshi cacitike pali bulya ubushiku ubwacindeme nga nshi kuli Eliya?

ELIYA apulile mu mfula ulubilo ninshi kuleyakulefitilako fye. Aleya ku Yesreele ukutali nga nshi e lyo pali iyi nshita ninshi mukote. Na lyo line, aleya fye alebutuka ukwabula ukunaka pantu “ukuboko kwa kwa Yehova” kwali pali ena. Tabalile akwatapo amaka ya musango uyu. E mulandu wine abutukile ukucila bakabalwe abaletinta iceleta lya Mfumu Ahabu!—Belengeni 1 Ishamfumu 18:46.