Ukusekelela Muli Yehova E Cele Lyesu

“Buno bushiku bwa mushilo kuli Shikulwifwe; mwibombomana, pantu ukusekelela muli Yehova e [cele lyenu, NW].”—NEHEMIA 8:10.

1, 2. (a) Icele cinshi? (b) Ni shani fintu Davidi alangishe ukuti aleuba muli Yehova?

YEHOVA licele lishingalinganishiwako. Na kuba bushe icele cinshi? Caba cifulo cacingililwa, ica mutelelwe nelyo ica kupusukilamo. Davidi wa mu Israele wa pa kale alemona Lesa nge cele lyakwe. Ku ca kumwenako, languluka ulwimbo lwa kwa Davidi ulwalungatikwe ku Wapulishamo “mu bushiku Yehova amupokolwele mu minwe ya balwani bakwe bonse, na mu kuboko kwa kwa Shauli,” imfumu ya Israele.—Ilumbo 18:0, utulembo twa pa muulu.

² Davidi atendeke lulya lwimbo mu kuba na mashiwi ya kukumbamo aya kuti: “Nalimutemwisha, mwe Yehova, ubukose bwandi. Yehova e cilibwe candi icasansuka, licele lyandi, kabili wa kumpokolola; Lesa wandi, cilibwe candi icasansuka umo nguba; ni nkwela yandi, lusengo lwe pusukilo lyandi, camba candi icasansama.” (Ilumbo 18:1, 2) Mu lufyengo alengelwe ukuuluba kabili alisupilwe ku Mfumu Shauli, Davidi aubile muli Yehova, kwati fye fintu umuntu pambi engabutukila mu cifulo cacingililwa ku kupusuka ku kayofi.

3. Mulandu nshi abaYuda ba mu kasuba ka kwa Esra bakumanishishe “ukwanga kukalamba”?

³ Ukusekelela uko Yehova apeela kwaba licele lishifilwa kuli abo abenda mu nshila shakwe pamo nga basunga bumpomfu. (Amapinda 2:6-8; 10:29) Pa kukwata ukusekelela kupeelwa na Lesa, kwena, abantu bafwile ukulacita ukufwaya kwa bulesa. Muli uku kuloshako, languluka icacitike mu Yerusalemu mu 468 B.C.E. Esra kalemba na bambi balengele abantu ukumfwikisha ukupitila mu kubelenga kwabamo ubupilibulo ukwe Funde. Lyene abantu bacincishiwe ukuti: “Kabiyeni, kalyeni ifyanona, munwe ne fyalowa, no kutumapo imilingo ku ushateyanishishiwa, pantu buno bushiku bwa mushilo kuli Shikulwifwe; mwibombomana, pantu ukusekelela muli Yehova e cele lyenu.” Mwalefumo “kwanga kukalamba” ilyo abaYuda balebomfya ubwishibilo baali nabanonka kabili balekwata Umutebeto wa Nsakwe uwaisulamo ukusekelela. (Nehemia 8:1-12) Abo bakwete ‘ukusekelela muli Yehova nge cele lyabo’ balesanga amaka ku kupepa kwakwe no mulimo. Apantu ukusekelela muli Yehova kwali e cele lyabo, tulingile ukwenekela abantu ba kwa Lesa ilelo ukuba abasekelela na bo bene. Cinshi, lyene, caba imilandu imo iya muli kano kasuba iya kubela abasekelela?

‘Ukuba fye Abasamwa’

4. Ni ntulo nshi imo iya kusekelela iyapulamo iya bantu ba kwa Yehova?

⁴ Umulandu umo uwapulamo uwa kubela abasekelela waba kupayanya uko Yehova acita ukwa kulongana capamo. Ukulongana kukalamba na mabungano ya Nte sha kwa Yehova fibaletela ukusekelela ilelo, kwati fye fintu imitebeto ya cila mwaka iyalecitwa na bena Israele yaleleta ukusekelela ku mitima yabo. Abantu ba mu bena Israele baebelwe ukuti: “Inshiku cinelubali mukacite umutebeto we lambo [uwa nsakwe] kuli Yehova Lesa wenu kulya kuntu uko Yehova asala; pantu Yehova Lesa wenu akamupaalila mu cibwesha cenu conse, na mu mulimo onse wa minwe yenu, na imwe mukaba fye abasamwa.” (Amalango 16:13-15) Ee, Lesa alefwaya bene ‘ukuba fye abasamwa.’ Cimo cine na ku Bena Kristu, pantu umutumwa Paulo acincishe abasumina banankwe ati: “Sekeleleni pe muli Shikulu; ndetila kabili, Sekeleleni.”—Abena Filipi 4:4.

5. (a) Ukusekelela cinshi, kabili ni shani fintu Abena Kristu banonka kwene? (b) Ni shani fintu twingasekelela te mulandu ne fya kwesha?

⁵ Apantu Yehova afwaya ifwe ukuba abasekelela, alatupeela ukusekelela nga cimo ica fisabo fya mupashi wakwe. (Abena Galatia 5:22, 23) Na kuba ukusekelela cinshi? Yaba ni nkuntu ya kucankwa iilengwa no kwenekela nelyo ukunonka icintu cimo icisuma. Ukusekelela kwaba mibele ya nsansa sha cine cine, nelyo ukwanga. Ici cisabo ca mupashi wa mushilo uwa kwa Lesa cilatutungilila pe samba lya fya kwesha. “Pa mulandu wa kusekelela ukwabikilwe pa ntanshi yakwe, [Yesu] ashipikishe ku [cimuti ca kucushiwilwapo, NW], ukusuule nsoni, no kwikala ku kulyo kwa cipuna ca bufumu ca kwa Lesa.” (AbaHebere 12:2) Umusambi Yakobo alembele ukuti: “Ishibeni ukuti ca kusekelela fye, mwe bamunyinane, ilintu mwawila mu fya kwesha fya misango misango, pa kwishibo kuti ukulabulwa kwa citetekelo cenu kucito kushipikisha.” Lelo ni shani nga ca kuti tatwishibe ifya kucita pa lwa ca kwesha cimo? Lyene mu kucetekela kuti twapepela amano pa lwa fya kubombelapo. Ukubomba mu kumfwana na mano yafuma ku muulu kutupeela amaka ya kupikulula impika nelyo ifya kubomba ne fya kwesha ifyo fikoselela ukwabula ukulufya ukusekelela kwesu muli Yehova.—Yakobo 1:2-8.

6. Kwampana nshi kwaba pa kati ka kusekelela no kupepa kwa cine?

⁶ Ukusekelela uko Yehova apeela kulatukosha ku kusumbula ukupepa kwa cine. Ico e cacitike mu nshiku sha kwa Nehemia na Esra. AbaYuda ba pali ilya nshita abakwete ukusekelela muli Yehova nge cele lyabo balikoshiwe ku kutwala pa ntanshi amabuseko ya kupepa kwa cine. Kabili ilyo basumbwile ukupepa kwa kwa Yehova, ukusekelela kwabo kwalingilishiweko. E fyo caba na lelo. Pamo nga bakapepa ba kwa Yehova, twalikwata imilandu isuma iya kusekelela kukalamba. Pa milandu iingi twakwata iya kubela abasekelela, lekeni nomba tulangulukepo iyafulilako.

Ukwampana na Lesa Ukupitila Muli Kristu

7. Ukukuma kuli Yehova, mulandu nshi Abena Kristu bakwata uwa kubela abasekelela?

⁷ Ukwampana kwesu ukwapalamisha na Yehova kutulenga ukuba abantu bakwatisha insansa pe sonde lyonse. Ilyo tushilasanguka Abena Kristu, twali ulubali lwa sosaite wa bantunse abashalungama uko e kuti ‘abo amano yaba mu mfifi kabili abanunuka ku mweo wa kwa Lesa.’ (Abena Efese 4:18) Fintu tuli aba nsansa ukuti nomba tatwaba abanunuka ukufuma kuli Yehova! Kwena, cifwaya ukubombesha nga tuli no kutwalilila mu bubile bwakwe. Tufwile ‘ukwikalilila mu citetekelo abakuulwa kabili abashangila kabili te bantu abafutukako ku kucetekela ku mbila nsuma.’ (Abena Kolose 1:21-23) Kuti twasekelela pa kuti Yehova atukuliile ku Mwana wakwe mu kumfwana na mashiwi ya kwa Yesu umwine aya kuti: “Takuli uwingesa kuli ine, kano Tata uwantumine amukula.” (Yohane 6:44) Nga ca kuti mu cine cine tulatesekesha ukwampana kwesu ukwa mutengo na Lesa ukupitila muli Kristu, tukalaibaka ku cili conse icingonaula kwene.

8. Ni shani fintu Yesu asangwilako ku mibele yesu iya kusekelela?

⁸ Ukulekelelwa kwa membu ukupitila mu citetekelo mwi lambo lya cilubula ilya kwa Yesu mulandu ukalamba uwa kukwatila ubuseko pantu ici e cilenga ukuti tukwate ukwampana na Lesa. Ukupitila mu nshila yakwe iya ku mumbo iya lubembu, icikolwe cesu Adamu aletele imfwa pa mutundu wa muntu. Nangu cibe fyo, umutumwa Paulo alondolwele ukuti: “Lesa asokololo kututemwa kwakwe kwine, pa kuti ilyo twali tucili ababembu Kristu alitufwilile.” Paulo na kabili alembele ukuti: “Ifyo ukupuuluka kwa umo kwaletele ukusekwa ku bantu bonse, e fyo ne ca bulungami ca umo e caleto kulungamikwa no mweo ku bantu bonse. Pantu ifyo bucintomfwa bwa muntu umo bwalengele aba cinabwingi babe ababembu, e fyo ne cumfwila ca umo cikalenga aba cinabwingi ukuba abalungama.” (Abena Roma 5:8, 18, 19) Fintu tufwile ukusekelela ukuti Yehova Lesa aliba uwasekelela mu kulubula aba bufyashi bwa kwa Adamu abashukila uku kupayanya!

Ubuntungwa bwa Butotelo no Kubuutushiwa

9. Mulandu nshi twabela abasekelela ukukuma ku fya butotelo?

⁹ Ubuntungwa ukufuma kuli Babiloni Mukalamba, ubuteko bwa calo ubwa butotelo bwa bufi, mulandu na umbi uwa kusekelela. Caba cine ca bulesa e catulubula. (Yohane 8:32) Kabili ubuntungwa ukufuma kuli uyu cilende wa butotelo cipilibula ukuti tatwakanamo mu membu shakwe, ukupokelelako ifinkunka fyakwe, na mu kupelako ukwisaonawilwa pamo na wene. (Ukusokolola 18:1-8) Tapali icili conse ica kulengo bulanda pa lwa kufyuke co conse!

10. Kubuutushiwa nshi tuipakisha pamo nga bantu ba kwa Yehova?

¹⁰ Ukumfwikisha no kubomfya Icebo ca kwa Lesa mu bumi fintu filenga ukusekelela kukalamba. Pa kuba abalubuka ku kusonga kwa butotelo bwa bufi, tulaipakisha ukushilimuka kwa ku mupashi ukulengaminako lyonse ukupayanishiwa na Shifwe wa ku muulu ukupitila mu “musha wa cishinka kabili uwashilimuka.” (Mateo 24:45-47) Pa bantu bonse fye aba pano nse, ni abo beka abaipeelesha kuli Yehova mu kupaatukako e bakwata umupashi wakwe uwa mushilo no kumfwikisha kwapaalwa ukwa Cebo cakwe no kufwaya kwakwe. Cili fye nga fintu Paulo asosele ati: “Lesa atusokolwela [ifintu apekanishisha abamutemwa] mu Mupashi; pantu Umupashi upenenga fyonse, ne fyashika fya kwa Lesa.” (1 Abena Korinti 2:9, 10) Kuti twaba aba kutasha kabili abasekelela pa kuti tuleipakisha ukumfwikisha kulengaminako ukwalangililwa mu mashiwi ya pa Amapinda 4:18 aya kuti: “Inshila ya balungami yaba ngo lubuuto ulwabalika, ululeya no kubuuta kasuka akasuba kasaama.”

Isubilo lya Bufumu no Bumi bwa Ciyayaya

11. Ni shani fintu twayakana isubilo lya Bufumu ilya kulengo kusekelela na bambi?

¹¹ Isubilo lyesu ilya Bufumu nalyo line lilatulenga ukusekelela. (Mateo 6:9, 10) Pamo nge Nte sha kwa Yehova, pa nshita ntali twalibilisha ukuti Ubufumu bwa kwa Lesa e subilo lyeka fye ilya mutundu wa muntu onse. Ku ca kumwenako, languluka umwaka wa 1931, lintu twapokelele ishina lya Inte sha kwa Yehova mu kusuminishanya kwabamo ubuseko uko kwalumbulwilwe pa mabungano 51 ukushinguluke calo. (Esaya 43:10-12) Kulya kusuminishanya ne lyashi lyakatama kuli J. F. Rutherford (uwali pali iyo nshita presidenti wa Watch Tower Society) fyalisabankanishiwe mu katabo kaleti The Kingdom, the Hope of the World. Muli aka katabo mwasanshiwe ukusuminishanya na kumbi ukwapokelelwe pali lilye bungano, ukusuminishanya uko kwapingwile Kristendomu pa mulandu wa busangu bwakwe na pa kusaalula ukufunda kwa kwa Yehova. Na kabili kwabilishe ukuti: “Isubilo lya calo lyaba bufumu bwa kwa Lesa, kabili takwaba isubilo ilili lyonse limbi.” Mu myeshi fye inono, Inte sha kwa Yehova shaanenye amakope ukucila pa mamilioni yasano aya aka katabo mu mbali shonse ishe sonde. Ukutule lyo ilingi line twapampamina pa kuti Ubufumu e subilo fye lyeka ilya mutundu wa muntu.

12. Filolelo nshi ifya bumi ifya kulengo kusekelela ifipembelela abo babombela Yehova?

¹² Tulasekelela, na kabili, pa cilolelo ca bumi bwa ciyayaya pe samba lya kuteka kwa Bufumu. “Umukuni unono” uwa Bena Kristu basubwa wakwata isubilo lya ku muulu ilya kulengo kusekelela. “Abe uwapaalwa Lesa kabili Wishi wa kwa Shikulwifwe Yesu Kristu,” e fyalembele umutumwa Petro, “umwabelo luse lwakwe ulwingi atufyalile libili ku kuba no kucetekela kwa mweo mu kubuuka kwa kwa Yesu Kristu ku bafwa, ku kukwato bupyani ubushingabola, ubushingakowela, ubushingabonsa, ubwabakilwa imwe mu muulu.” (Luka 12:32; 1 Petro 1:3, 4) Ilelo, icinabwingi cikalamba ica Nte sha kwa Yehova balolesha ku ntanshi ku bumi bwa muyayaya muli Paradise mu kati na nkati ka bwikashi bwa Bufumu. (Luka 23:43; Yohane 17:3) Takwaba abantu bambi pe sonde abakwata icili conse ica kulinganyako ku filolelo fyesu ifyaisulamo ukusekelela. Fintu tulingile ukufiteesa!

Bumunyina Bwapaalwa

13. Ni shani fintu tulingile ukumona bumunyina bwesu ubwa pa kati ka nko?

¹³ Ukuba ulubali lwa bumunyina bwa pa kati ka nko bweka fye ubwapaalwa kuli Lesa na co cine caba ni ntulo ya kusekelela kukalamba. Mu nsansa, twakwata aba kubishanya na bo abawamisha pe sonde. Yehova Lesa umwine wine alungike ukusakamana ku kasuba kesu no kutila: “Nkatensha ne nko shonse, fikasuke afiisa ifisuma fya nko shonse, na ine njisusha mu ŋanda iyi ubukata.” (Hagai 2:7) Ca cine, Abena Kristu bonse bantu bashapwililika. Nangu cibe fyo, Yehova alikula abantu umo umo aba musango yo ukwisa ku mwine ukupitila muli Yesu Kristu. (Yohane 14:6) Apantu Yehova alikulila ku mwine abantu abo alanguluka nga basuma, ukusekelela kwesu kukafula nga ca kuti twabalangisha ukutemwa kwa bumunyina, ukubakatamika, ukubombela pamo na bo mu fikonkelelo fya bukapepa, ukubafwilisha mu fya kwesha fyabo, no kubapepelako.

14. Kukoselesha nshi twingakumanya muli 1 Petro 5:5-11?

¹⁴ Ifi fyonse fikasangwilako ku kusekelela kwesu. Mu cituntulu, caba kusekelela muli Yehova e caba icele lya bumunyina bwesu ubwa ku mupashi ukupulinkane sonde lyonse. Ee, ifwe bonse tulacula ku kupakaswa na mafya yambi. Lelo ici cilingile ukutupalamika capamo no kutupeela itontonkanyo lya kwikatana ngo lubali lwa kuteyanya kumo ukwine kwine ukwa kwa Lesa pe sonde. Nga fintu Petro asosele, tulingile ukuipetamika fwe bene pe samba lya kuboko kwa maka ukwa kwa Lesa, ukupoosa pali wene amasakamika yesu yonse ukwishiba ukuti alatusakamana. Tulekabila ukuba abalola pantu Ciwa afwaya ukutulya, lelo tatwaba fweka muli ici, pantu Petro alundapo ukuti: “Mukaanyeni; iminineni abakosa ndi mu citetekelo, pa kwishibo kuti bamunyinenwe ba pano isonde batuulo mutuulo uyo wine wa kucula.” Kabili ubu bumunyina bwa mu kusaalala kwa calo ubwa kulengo kusekelela tabwakatale abubongoloka, pantu twalyebekeshiwa ukuti ‘ilyo tukacula inshita inono, Lesa wa kusenamina konse wene akatulengo kuti tube abapwililila, akatwikasha, akatukosha.’ (1 Petro 5:5-11) Citontonkanye. Bumunyina bwesu ubwa kulengo kusekelela bukatwalilila kuli pe na pe!

Ubumi Bwabamo Imifwaile

15. Mulandu nshi cingasoselwa ukuti Inte sha kwa Yehova shalikwata ubumi bwabamo imifwaile?

¹⁵ Twaliba abasekelela muli cino calo cakwata amacushi pantu twalikwata ubumi bwabamo imifwaile. Twaliseekeshiwa ubutumikishi ubulenga ifwe na bambi ukuba aba nsansa. (Abena Roma 10:10) Mu kushininkisha lyaba lishuko lyabamo ubuseko ukuba bakabomba banankwe aba kwa Lesa. Muli uku kuloshako, Paulo atile: “Nga . . . Apolo cinshi? Paulo na o cinshi? Ni bakapyunga muli abo e mo mwatetekelele; kabili umo umo bukapyunga bwakwe ni filya Shikulu amupeele. Ine nalilimbile, Apolo alitapilile, lelo ni Lesa e wameseshe. E ico nangu uulimba nangu uutapilila tali kantu; kano Lesa uumesha. Awe uulimba no utapilila bamo bene, lelo onse umo umo akapokelele cilambu cakwe cine umwabelo kucucutika kwakwe kwine. Pantu ifwe tuli babomfi ba kwa Lesa abalebombela pamo; icilime ca kwa Lesa, ubukuule bwa kwa Lesa, ni ’mwe.”—1 Abena Korinti 3:5-9.

16, 17. Fya kumwenako nshi twingaloshako ku kushinina ukuti abantu ba kwa Yehova balikwata ubumi bwa kulengo kusekelela ubwabamo imifwaile?

¹⁶ Fingi ifya kumwenako fingaloshiwako ifilangisha ukuti ukubombela Yehova mu busumino kufumamo ubumi bwabamo imifwaile ubo bulenga ukuti twisulemo ukusekelela. Ubu bulondoloshi bwakonkapo buli ca kumwenapo cimo: “Nacencentele Iŋanda ya Bufumu yaisula [pa bushiku bwa kupeelwa kwa iko] kabili pa basangilweko namwene ifilundwa cinekonsekonse ifya lupwa lwandi, ukusanshako ine no mukashi wandi na batatu aba mu bana besu na bena myabo. . . . Ine no mukashi wandi mu cituntulu twakwete ubumi bwa nsansa, ubwabamo imifwaile mu mulimo wa kwa Lesa.”

¹⁷ Na kabili ca kukoselesha ukwiluka ukuti pa mushinku uuli onse umo kuti atendeka ubumi bwabamo ukusekelela ne mifwaile ine ine mu mulimo wa kwa Yehova. Ku ca kumwenako, umwanakashi umo uwasambilile icine ca Baibolo mu ŋanda ya kulelelamo abatishiwe nga umo uwa Nte sha kwa Yehova pa mushinku wa myaka 102. Muli ifyo apwishishe ubumi bwakwe mu kuba ne mifwaile yabamo ukusekelela, ‘ukubela Lesa akatiina, no kubaka amafunde yakwe.’—Lukala Milandu 12:13.

Icele Lishingafilwa

18. Cinshi pambi icingacitwa ku kucimfya ukubombomana no kwingilishako ukusekelela kwesu?

¹⁸ Ukusekelela muli Yehova kwaba licele lishingafilwa ku ba busumino. Nalyo line, ukukwata uku kusekelela tacipilibula ukuti tatwakatale atukumanya utushita twa bulanda kwati ni tulya twalengele Yesu mu Getsemane ukusoso kuti: “Kwafiitisha ku mutima wandi, cikanga ne mfwa.” (Marko 14:32-34) Tutile twanakila ku fikonkelelo fya kaso kabili mwafuma ukubombomana. Lyene lekeni twalule inshila yesu iya bumi. Nga ca kuti ukusekelela kwesu kwalishibantukila pa mulandu wa kuti mu kubulwa akaso tulasenda ifipe fyafinisha ifya fishingamo fya mu Malembo, napamo kuti twateulukako pa kuti cailululako ukukanshika no kubwesha imibele yesu iya kusekelela. Ukulundapo, Yehova akatupaala mu kuba no kusekelela nga ca kuti twafwaya ukumutemuna pa kucincintila mu kubilingana umubili wa lubembu, icalo cibifi, ne Ciwa.—Abena Galatia 5:24; 6:14; Yakobo 4:7.

19. Ni shani fintu tulingile ukumona amashuko ayali yonse ayo twakwata mu kuteyanya kwa kwa Lesa?

¹⁹ Ni pali iyi milandu twalanshanya, na imbi iingi, e po twakwatila ukusekelela kukalamba. Nampo nga tuli bakasabankanya ba mu cilonganino nelyo tuleakana mu musango umo uwa mulimo wa nshita yonse, ifwe bonse kuti twakwata ifingi ifya kucita mu mulimo wa kwa Shikulu, kabili mu kushininkisha ici cikasangwilako ku kusekelela kwesu. (1 Abena Korinti 15:58) Te mulandu na mashuko twakwata mu kuteyanya kwa kwa Yehova, lekeni tube aba kutasha pali yene kabili mu kusekelela tutwalilile ukubomba umulimo washila kuli Lesa wesu uwa kutemwa, uwa nsansa.—1 Timote 1:11.

20. Lishuko nshi twakwata ilyakulisha, kabili ni ku lwa cinshi twingaba abashininkisha?

²⁰ Twalikwata umulandu wa kusekelela maka maka pe shuko lyesu ilya kusende shina likalamba ilya kwa Yehova nge Nte shakwe. Ee, tatwapwililika kabili tulolenkana ne fya kwesha ifingi, lelo lekeni tutwalilile ukusunga mu muntontonkanya amapaalo yesu ayawamisha pamo nge Nte sha kwa Yehova. Kabili ibukisheni, Shifwe wa ku muulu uwakwato kutemwa takatale atulenge nsoni. Kuti twaba abashininkisha ukuti lyonse tukaba abapaalwa nga ca kuti ukusekelela muli Yehova e cele lyesu.

Kuti Wayankulako Shani?

◻ “Ukusekelela muli Yehova” cinshi?

◻ Ni shani fintu Abena Kristu banonka ukusekelela kwa cine?

◻ Milandu nshi imo iyo Inte sha kwa Yehova babela abasekelela?

◻ Mulandu nshi ukusekelela muli Yehova kwabela icele lishingafilwa?