Ibungano lya Citungu Ilya Nte sha kwa Yehova Ilya mu 2002 Ilileti “Bakabila ba Bufumu Abapimpa”
1 “Nasaminwe ilyo basosele kuli ine, abati, Tuleya ku ng’anda ya kwa Yehova.” (Amalu. 122:1) Ilyo mulebebeta amashiwi ya kwa kemba wa malumbo, moneni (1) ifyo aumfwile ilyo bamwitile ku kupepa Yehova, (2) abantu abasuma alebishanya na bo, abalefwaisha ukupepa kwa cine, na (3) ukupekanya kwalekabilwa pa kulaalikwa, ukubungana pamo, no kwima ubulendo bwa kuya ku ng’anda ya kwa Lesa.
2 Bushe na ifwe tatumfwa cimo cine ilyo batweba ukuti kuli ukupekanya ibungano lyesu na limbi? Tulasubila ifingi nga twaibukisha insansa twaipakishe pa mabungano yapita kabili tulatontonkanya na pa fyo tukaipakisha ukuba pe bungano lyaibela na banensu abatemwa Yehova. Amapekanyo yalicitwa aya kuti Ibungano lya Citungu ilya nshiku shitatu ilileti “Bakabila ba Bufumu Abapimpa” likabeko mu 2002 mu cifulo conse icisakamanwa na maofeshi ya Zambia. Kanshi ino e nshita ya kuti tutendeke ukupekanya pa kuti tukasangweko no kuyailemena nga nshi umutebeto wa ku mupashi uuletulolela.
3 “Umulashi wa pa ng’anda, uwa cishinka kabili uwacenjela,” napekanya ica kulya ca ku mupashi pa nshita yalinga ico akatupeela pe bungano. (Luka 12:42) Umuputule umo umo naupeelwa ibungano lya kusangwako pa kuti kwikaba ukufulisha pa cifulo ce bungano cimo na cimo. Nalyo line, nga ca kutila kwaba icalenga ukuti muyesangwa kwi bungano limbi ukucila ilyo bamwebele kabili mulefwaya ukwa kwikala, kalemba wa pa cilonganino kuti alomba formu wa Kulomba Umuputule ukufuma ku Sosaite, uulingile ukulembwapo no kupeela ababa muli Komiti wa Mulimo uwa Cilonganino. Na kabili, bamunyina abengi balitendeka ukuteyanya amadipartimenti ye bungano ayalekanalekana pa kuti “fyonse ficitwe busaka busaka kabili mu kukonkana.” (1 Kor. 14:40) Apo fingi fipekanishiwe pa kuti tukaipakishe kabili cikatuwamine, cinshi ifwe pa lwesu tufwile ukucita pa kuiteyanishisha ibungano?
4 Akuiteyanyeni Nomba Ukusangwako Inshiku Shonse Shitatu: Bushe mulekabila ukulomba inshiku ku bene ba ncito pa kuti mukasangwe kwi bungano mwaebwa ukusangwako inshiku shonse? Yehova alishiba ukuti abene ba ncito bamo ‘balyafya ukuteemuna.’ (1 Pet. 2:18, NW) Lelo amabungano yesu yalicindama icine cine, kabili tulefwaya ukuteyanya bwino pa kuti tukasangwe kuli programu yonse. Ebeni Yehova mwi pepo pa lwa iyi milandu, mulombeni ukuti amutungulule pa kuti mufume icisuma.—Nehe. 2:4.
5 Ukwa Kwikala: Ilingi line bamunyinefwe batantika ukwikala na balupwa nelyo ifibusa mupepi no kubelele ibungano. Mu mishi, bamunyinefwe balakuula imisakuta nelyo ukusendama mu fipaka ifyo bakabomba ba kuitemenwa aba kwi bungano bateyanya. Amabungano yamo yabomfya ifikuulwa fya pa masukulu ku kwikalamo abeshile kwi bungano. Nga muleikala kuli bamunyina nelyo balupwa, tacalinga ukulya umundemwa no kwenekela ukwikalako inshiku na shimbi pa kuti mutuusheko pa numa ye bungano. Iyi miputule ya kwikalamo fye pa nshita ye bungano epela. Abalesungwa balingile ukushininkisho kuti bena na bana babo bacindika ing’anda ya kwa shibweni no kukanaonaula nangu cimo nelyo ukusakawila mu fipe nelyo ukwingila uko bashilingile ukwingila. Nga kwaba ubwafya pa lwa ici, bashibweni balingile ukweba Dipartimenti wa Mayanda pe bungano, kabili bamunyinefwe bakaitemenwa ukwafwa.
6 Nelyo cingati abali no kukabila kwaibela basakamanwa sana sana ku ndupwa shabo Abena Kristu, baeluda na bambi mu cilonganino abaishiba pa lwa uko kukabila kuti mu kutemwa bayafwilishako mu kupanga amapekanyo. (1 Tim. 5:4) Ilyo amaformu ya Kulombelapo Umuputule yapeelwa kuli Komiti wa Mulimo uwa Cilonganino, komiti alingile ukupituluka mu milingo ya wipwishe ilyo bashilatuma aya maformu ku Dipartimenti wa Mayanda. Kalemba wa pa cilonganino afwile ukulemba inambala yakwe iya lamya pali formu pa kuti Dipartimenti wa Mayanda engamutumina lamya nga kuliko ifipusho.
7 Moneni mu Cilonganino: Nga ca kutila natwishibako munyinefwe nelyo nkashi uwalemana nelyo uushikwete pa kuma kuboko ica kuti camwafya no ukusangwa kwi bungano, mulandu nshi teti “imitima ikule” mu kutemwa no kumwafwa? (2 Kor. 6:12, 13; Amala. 15:7) Iyi e mibele Paulo akoseleshe pali 2 Abena Korinti 8:14. Cinshi mushingebela aba musango yo ukwenda pamo na imwe pa kuya kwi bungano, nelyo ukubalipililako? Nga ni bapainiya, bafwile balikwata ifya kukumanya ifyo bengamushimikilako pa bulendo. Nga bakoloci mwaba na bo mu cilonganino, bafwile balikwata ilyashi bengamushimikila ilyo mushaumfwapo pa fyo babomba umulimo wa kwa Lesa. Bushe ukubishanya na ba bamunyina na bankashi teti kulete ukusonga kusuma kuli imwe no lupwa lwenu? Bakamutasha pali bukapekape bwenu kabili Yehova akamulambula.—Amapi. 28:27; Mat. 10:42.
8 Bombeniko Umulimo wa Kuitemenwa: Pa nshita ye bungano, imintapendwa ya babomfi ba kuitemenwa balafwilishako pa kuti amadipartimenti yengabomba bwino. Bakapyunga baba mu cibansa na kulya bemika bamotoka balalanga apa kwikala na pa kusungila imyotoka shesu na macinga mu nshita ya kasuba. Dipartimenti wa Busaka alikwata umulimo wa kusungilila ishina lyesu ilyo twapanga ku mulandu wa busaka, no kumona ukuti icifulo ca kupepelapo pa kashita kanono cashala ica busaka ukucila na fintu twacisangile. Bushe kuti twayafwilishako muli aya madipartimenti nelyo yambi ayengafwaya ukwafwa kwesu? Bushe kuti mwaitemenwa ukwafwako pa kubomba “no mutima umo” na bamunyinenwe?—Sefa. 3:9.
9 Ukucilikila Amasanso: Ukuteyanya kwa kwa Yehova kulatucinkulako bwino pa nshita yalinga pa lwa mabungano. Ku ca bulanda, mu mabungano yamo yamo mu myaka yapita, ifipe fya bamo fyalipiile ku mulilo wayambiile ku mulandu wa mulekelesha. Amasanso ya pa musebo nayo yalipeye abantu. Bamunyina bashingamwa pa mabungano, kabili maka maka abafyashi, balelombwa ukusakamana sana ifi fishinka fyakatama pa kuti amabungano yesu yakabe aya kukuulilila no kubishanya kusuma, kabili pa kuti kwikaba ubulanda pa mulandu wa masanso yafuma mu mulekelesha.
10 Ukwabula ukutwishika, icilenga sana ukuti kube ubusanso bwa mulilo pa mabungano te kwipika ifya kulya mupepi no mwa kwikala iyo, lelo bana abo baleka ukwangala no mulilo nelyo abebwa ukusakamana umulilo. E ico, pa kucingililwa mwe bene na bamunyinenwe, mwilaleka abana ukwendauka beka, mwipeela abana umulimo wa kusakamana amenshi yalebilauka, nelyo ukusakamana umulilo muleipikapo. Nalimo ku ng’anda balabomba bwino iyi milimo, lelo icifulo ce bungano caliibela kabili ukusakamana na kumbi kulakabilwa pa kucilikila amasanso ukukanacitika. Abantu abengi bekala mu kupalamana, abana na bo balatemwa ukwangala amangalo ilyo bali na baice banabo bambi. Balapuulaulwa bwangu kabili tabamwena libela ubusanso, e co tushilingile ukubapeela bakandulo, macisa nelyo inyali. Ubwafya bumbi bubako lintu ukulongana kwatendeka e lyo abafyashi basha abana banono beka umo balaala ukwabula uwa kubasakamana. Abana bafwile ukwikala na bafyashi babo pa nshita ya kulongana. Ilyo bakapyunga bamona abana baleendauka pe bungano ukwabula aba kubasakamana, kuti baeba abana ukubwelela ku bafyashi babo. Mwe bafyashi, twapaapaata bombeleni pamo na bapeelwe imilimo pe bungano kabili nga mwacita ifyo ninshi mulelanga ‘ukutemwa aba bwananyina.’—1 Pet. 2:17.
11 Ifilonganino fimo filashima bamotoka ba kubatwala ku fifulo fye bungano. Motoka onse uulebomfiwa ku kutwala bamunyina kwi bungano afwile ukuba uwalinga ukwenda pa musebo, kabili umutuntulu. Bamotoka tabafwile ukusenda ukucila mu cipimo. Cisuma ukuti munyina wakosoka e ufwile ukupeelwa umulimo wa bukapitao ilyo mulepanga amapekanyo. Kapitao akeba ibumba lyakwe ifili amapekanyo, inshita ne ncende apo bakaninina. Amafya yonse ayakumine ibumba ilingi line yali no kutwalwa kuli kapitao uuli no kwishiba ifya kucita. Nga ca kutila ukwafwa, ukufunda, nelyo ukupwisha ubwafya bumo kulekabilwa, bamunyina baibukila kabili abashilimuka bali no kucita ico.
12 Bushe Abantu Cine Cine Balamona Ico Tucita? Ilyo kwali ibungano lya citungu uyu mwaka wapwile, umwaume walekele ukusambilila ne Nte sha kwa Yehova papita ne myaka 20 alebomba mu hotela. Ashimikileko baNte bamo ukuti aletontonkanya pa kwamba na kabili ukusambilila Baibolo no kutendeka ukusangwa ku kulongana. Mulandu nshi alandile ifyo? Ni pa mulandu wa fyo baNte babombele na o pamo mu kutemwa ilyo bali pe hotela.
13 Kashitisha alandile pa lwa bamunyinefwe ukuti: “Ibumba lyenu e lyawamisha. . . . Abantu benu balitekanya kabili ba mucinshi.” Mwandi ici cifwile cilalenga Shifwe wa ku muulu ukusekelela ilyo aletumona tulekonka ukufunda kwa kwa Yesu ukwa kuti: “Ulubuuto lwenu lengeni lubalikile ku cinso ca bantu, ukuti bamone imilimo yenu iisuma, no kucindika Shinwe wa mu muulu”!—Mat. 5:16.
14 Shi natupashanye imibele ya Mfumu Davidi, uwasekelele ilyo aletontonkanya ulwa kuya ku ng’anda ya kwa Yehova iya mapepo. Amabungano yesu aya citungu yaba ni ntulo yacindama iya fya kulya fya ku mupashi kabili lishuko lyapulamo ilya kwampana kusuma. E ico, tulemulaalika ukuti tendekeni ukupekanya pa kuti mukasangweko inshiku shonse shitatu ukutula ulucelo ukufika ne cungulo kwi Bungano lya Citungu uno mwaka ilileti “Bakabila ba Bufumu Abapimpa”!
ICISHIBISHO: Kalemba wa cila cilonganino akalolekesha pali fyonse ifikumine kwi bungano lya citungu no kucincimusha bambi pa lwa lyene. Nga kalemba talipo, eluda umbi uwafikapo afwile ukubomba iyi milimo. Kalemba afwile ukubombelapo bwangu bwangu pali fyonse ififwile ukucitwa ifyo iofeshi lye bungano lyalemba muli bakalata ukukuma ku fintu pamo nga umwa kwikala, umulimo wa kuitemenwa ne ncito iibako ilyo ibungano lishilatendeka na lintu lyapwa. Afwile akwata inshita iikalamba iya kuti engabelenga bakalata be bungano bonse kabili no kubalondolola (te kulanda fye mu mashiwi yakwe IYO). Baeluda bonse, maka maka kalemba, bafwile ukwishiba bwino imipekanishishe ye bungano iyasabankanishiwa muli bakalata na mu Ubutumikishi Bwesu Ubwa Bufumu.
[Akabokoshi pe bula 3]
Inshita ya Kulongana
Ubushiku bwa Kubalilapo no Bushiku bwa Cibili
8:45 hrs. - 16:30 hrs.
Ubushiku bwa Citatu
8:45 hrs. - 16:00 hrs.