“Nani Afyele Amatoni ya Mume?”

KALEMBA wa lyashi uwa mu mwanda wa myaka uwalenga 19 alondolwele amatoni ya mume nge “fibekobeko fya menshi ifye sonde, ifyapangwa ku mwela.” Kabumba wesu aipwishe icikolwe ca kale Yobo ati: “Nani afyele amatoni ya mume?” (Yobo 38:28) Lesa alefwaya Yobo eshibe ukuti e walengele umume uwaumo mutengo.

Ukulunda pa kuyemba ukwapulama kabili ukwabengeshima, umume muli Baibolo walyampanishiwa kwi paalo, ukufumba, ukupaka, no kubakilile myeo. (Ukutendeka 27:28; Amalango 33:13, 28; Sekaria 8:12) Mu lusuba, “umume wa pa Hermone” walebakilila ifimenwa, muli yo nshila, wabakiliile abantu ba mu Israele. Ulupili lwa Hermone ulwakwate mitengo ne mfula yabuuta lucili lulafumya fubefube wa bushiku uupanga umume ushaifulila. Kemba wa malumbo Davidi apashenye ukupembesula ukuletwa no yu mume ku busuma bwa kwikala pamo na bakapepa banensu aba kwa Yehova.—Ilumbo 133:3.

Amakambisho ya kwa kasesema Mose ku bena Israele yali ayatekanya kabili aya kupembesula, ukupala amatoni ya mume. Atile: “Filekonkoloka ngo mume ifyebo fyandi; ngo bufumi pa cani citeku, nga bacipungufula pa mulemfwe.” (Amalango 32:2) Ilelo, Inte sha kwa Yehova balebilisha imbila nsuma iipeelo mweo iya Bufumu bwa kwa Lesa ku mpela sha pano isonde. (Mateo 24:14) Lesa alelaalika abantu ati: “Iseni; no uleumfwe cilaka ese, uulefwaya abuulepo ica bupe amenshi ya Mweo.” (Ukusokolola 22:17) Amamilioni ya bantu aba nko balepokelela ubu bwite ubwa kupembesula kwa ku mupashi ukufuma kuli Lesa, ukwingabakilila imyeo ku ciyayaya.