ISAMBILILO 14
Kuti Twacita Shani pa Kuti Tulepepa Lesa Ukulingana ne fyo Afwaya?
Nga fintu twasambilile mwi sambililo lyafumako, te mipepele yonse iipepa Lesa ukulingana ne fyo afwaya. Na lyo line kuti twapepa Kabumba wesu mu nshila iingalenga aba ne nsansa. “Mipepele” nshi Lesa atemwa? (Yakobo 1:27) Natumone ifyo Baibo isambilisha.
1. Ni kwi twingasambilila ifya kupepa Lesa ukulingana ne fyo afwaya?
Kuti twasambilila ifi mu Baibo. Yesu aebele Lesa ukuti: “Icebo cenu e cine.” (Yohane 17:17) Imipepele imo taikonka ifyaba mu Cebo ca kwa Lesa Baibo. Ikonka ifyo abantu basambilisha e lyo ne ntambi. Lelo Yehova tatemwa abantu ‘abasuula amafunde ya kwa Lesa.’ (Belengeni Marko 7:9.) Nomba nga tulemupepa ukulingana ne fyo atweba mu Baibo, tukalenga umutima wakwe ukusekelela.
2. Bushe tufwile ukulapepa shani Yehova?
Apo Yehova e Kabumba wesu, alilinga ukulamupepa fye eka. (Ukusokolola 4:11) Ici cilolele mu kuti tulingile ukumutemwa sana no kulapepa fye ena ukwabula ukubomfya ifilubi nelyo ifipasho.—Belengeni Esaya 42:8.
Imipepele yesu ifwile ukuba ‘iyasanguluka kabili iyo Lesa engapokelela.’ (Abena Roma 12:1) Ici cilolele mu kuti tufwile ukulaumfwila amafunde yakwe ayalanda pa kuba ne mibele iisuma. Ku ca kumwenako, bonse abatemwa Yehova balitemwa ifyo alanda pa cupo kabili balafikonka. Na kabili tabacita ifingonaula ubumi bwabo pamo ngo kupeepa fwaka, ukubomfya imiti bubi bubi, ukubomfya imiti babinda nelyo ukunwesha ubwalwa.a
3. Cinshi tulingile ukulapepela Yehova capamo na Bena Kristu banensu?
Ukulongana tukwata cila mulungu, kulatupeela ishuko lya ‘kulumbanya Yehova mu lukuta.’ (Amalumbo 111:1, 2) Inshila imo iyo tulumbanishishamo Lesa, kumwimbila inyimbo. (Belengeni Amalumbo 104:33.) Ico Yehova atwebela ukuti tuleya mu kulongana ni co alitutemwa, kabili alishiba ukuti ukulongana kuti kwalenga twaba ne nsansa umuyayaya. Ilyo tuli pa kulongana tulakoseleshanya.
SAMBILILENI NA FIMBI
Sambilileni ico Yehova atukaanisha ukulabomfya ifimpashanya pa kumupepa. Kabili moneni inshila ishacindama isho twingalumbanishishamo Lesa.
4. Tatufwile ukubomfya ifimpashanya ilyo tulepepa
Twaishiba shani ukuti Lesa tafwaya tulebomfya ifimpashanya pa kumupepa? Tambeni VIDIO, lyena lanshanyeni icipusho cakonkapo.
Finshi fyacitike ilyo abantu ba kwa Lesa bamo aba ku kale babomfeshe icimpashanya pa kupepa Lesa?
Abantu bamo balabomfya ifimpashanya pa kupepa Lesa, pantu bamona kwati e lyo bengapalama sana kuli ena. Na kuba ukucita ifi kulenga fye Lesa ataluka sana kuli bena. Belengeni Ukufuma 20:4-6 na Amalumbo 106:35, 36, lyena lanshanyeni aya mepusho:
Fintu nshi fimo nelyo fimpashanya nshi ifyo mumona abantu babomfya pa kupepa?
Bushe Yehova omfwa shani abantu nga balebomfya ifimpashanya pa kumupepa?
Bushe mulemona ukuti caliba fye bwino ukubomfya ifimpashanya pa kupepa?
5. Nga tulepepa fye Yehova eka tulalubukako ku fisambilisho fya bufi
Moneni ifyo ukupepa Yehova ukulingana ne fyo afwaya kwingatulubula ku fisambilisho fya bufi. Tambeni VIDIO.
Belengeni Amalumbo 91:14, lyena lanshanyeni ici cipusho:
Tulanga ukuti twalitemwa Yehova nga tulemupepa fye eka, nomba finshi alaya ukuti e fyo akatucitila nga tulemupepa fye eka?
6. Tulapepa Lesa ilyo tulelongana
Tulalumbanya Yehova no kukoseleshanya nga tuleimba no kwasukapo ilyo tuli pa kulongana. Belengeni Amalumbo 22:22, lyena lanshanyeni aya mepusho:
Bushe mulatemwa ukumfwa bambi ba-asukapo pa kulongana?
Bushe kuti mwatemwa ukupekanya ukuya-asukapo pa kulongana?
7. Yehova alatemwa nga ca kuti tule-ebako abantu ifyo tulesambilila
Kwaliba inshila ishingi isho twingabomfya pa kwebako abantu icine ca mu Baibo. Belengeni Amalumbo 9:1 na 34:1, lyena lanshanyeni ici cipusho:
Ni finshi fimo ifyo musambilile mu Baibo ifyo mwingatemwa ukwebako abantu?
ABANTU BAMO BATILA: “Apo Lesa alamona mu mitima yesu, kuti twalenga alasekelela te mulandu ne nshila tulemupepelamo.”
Imwe muletipo shani?
IFYO MUSAMBILILE
Tulalenga Kabumba wesu ukusekelela nga tulemupepa fye eka, nga tulemulumbanya ilyo tuli pa kulongana, kabili nga tule-ebako abantu ifyo tulesambilila.
Ukupitulukamo
Kuti twacita shani pa kuti tusambilile ukulapepa Yehova ukulingana ne fyo afwaya?
Mulandu nshi tulingile ukulapepela fye Yehova eka?
Cinshi tulingile ukulapepela pamo na bantu abafwaisha ukulenga Lesa asekelela?
ISHIBILENIPO NA FIMBI
Belengeni icalengele umwanakashi umo abe ne nsansa pa numa ya kuleka ukubomfya ifilubi pa kupepa.
“Nalileka Ukubombela Utulubi” (Ulupungu lwa kwa Kalinda, July 1, 2011)
Sambilileni ifyo mwingacita pa kuti muleasukapo pa kulongana.
“Mulelumbanya Yehova mu Cilonganino” (Ulupungu lwa kwa Kalinda, January 2019)
Moneni ifyo umulumendo umo anonkelemo mu kusangwa ku kulongana, nangu ca kuti calemukosela ukusangwako.
Abantu abengi bamona kwati umusalaba e ulingile ukulenga abantu babeshiba ukuti Bena Kristu, nomba bushe tulingile ukulabomfya umusalaba pa kupepa?
“Cinshi Inte sha kwa Yehova Bashibomfesha Umusalaba pa Kupepa?” (Icipande ca pa jw.org)
a Ifi twalandapo tukafisambililapo mu masambililo yali ku ntanshi.